Դատարանում ծեծի ենթարկված Արայիկ Խանդոյանը գլխի ու երիկամների ցավեր ունի. պաշտպան
Tert.am-ը գրում է.Ավան և Նոր Նորք վարչական շրջանների ընդհանուր իրավասության առաջին ատյանի դատարանում ծեծի ենթարկված ՊՊԾ գունդը զավթելու մեջ մեղադրվողներից Արայիկ Խանդոյանը չնայած գործով տուժող է, բայց պատշաճ փորձաքննության չի ենթարկվել, քննիչն էլ այցելել է ընդամենը մեկ անգամ: Այս մասին հայտնել է Արայիկ Խանդոյանի պաշտպաններից Արայիկ Պապիկյանը:
«Խանդոյանի մոտ բժիշկ է գնացել, հետը զրուցել է, արտաքնապես զննել են ու վերջ: Սկզբի օրերն էլ, որ ասում էին, թե ոչինչ չկա Խանդոյանի մոտ, սուսիկ-փուսիկ տարել ու սիստեմա են միացրել, որովհետև իրականում Խանդոյանը լավ չէր»,- ասաց պաշտպանը:
Ինչ վերաբերում է Խանդոյանի առողջական վիճակին, Պապիկյանն ասաց.«Գլխացավեր ունի, երիկամներ ցավեր, այդ խնդիրներ իր մոտից չեն վերացել»:
Հարցին, թե եթե մակերեսորեն է զննվել, ինչպես է եզրակացություն կազմվելու, և բացի այդ, դրա հիման վրա՞ է փորձաքննության եզրակացությունը տրվելու, Արայիկ Պապիկյանն ասաց.«Մենք չգիտենք, բայց իրենց ինչ պետք է, դա էլ կգրեն: Որ ստանանք այդ եզրակացությունը նոր կհասկանանք, թե իրենցից ինչ է պահանջվել անել և ինչ է զննվել»:
Արայիկ Պապիկյանն ասաց, որ մեկ ամսվա ընթացքում ընդամենը մեկ անգամ քննիչ է այցելել և այլ գործողություն չի կատարվել:
«Ես գրեթե չեմ էլ կասկածում, որ ի վերջո ոչ ոք չի պատժվելու, նրանք սովոր են նման գործերը կոծկելու փակելու, արդյունքում ոչ մեկ չի պատժվի»,- ասաց Պապիկյանը, հավելելով, որ դեռ տեղյակ չէ, թե ում է առաջադրվել մեղադրանքը: