Հայ-ադրբեջանական սահմանի ամբողջ երկայնքով ուժերը բալանսավորված են. վերլուծաբան

Այսօր՝ հունիսի 19-ին, լրագրողների հետ հանդիպման ժամանակ «Razm.info» մասնագիտացված կայքի վերլուծաբաններ Գագիկ Հարությունյանը և Տարոն Հովհաննիսյանը խոսեցին շփման գծում տիրող իրավիճակի, լարվածության հնարավոր աճի և հակառակորդի հավանական քայլերի մասին: 

«Ադրբեջանը գրեթե միշտ սրում է իրավիճակն այն ժամանակ, երբ իրենք ուզում են որևէ ներքին հարց լուծել կամ որևէ խնդրից շեղել իր հանրությանը»,- ասաց Գարիկ Հարությունյանը՝ հավելելով, որ  դա կարող է լինել նավթի գնի անկում, ներքին քաղաքական խնդիր, անգամ ներքին լրտեսական սկանդալներ: 

Վերլուծաբան Տարոն Հովհաննիսյանն էլ մատնանշելով մեր հասարակության մեջ առկա թերությունները, նկատեց, որ հայ հասարակության պարագայում գործ ունենք երկու տարբեր բևեռների հետ՝ մի պարագայում գերագնահատում ենք թշնամուն, մյուսում՝ թեդրագնահատում:

«Մեզ մոտ առհասարակ մի բաց կա Ադրբեջանի հետ կապված՝ շատ քիչ ենք ուսումնասիրում Ադրբեջանը և շատ ենք թերագնահատում իրենց՝ չհասկանալով նաև նրանց վարած քաղաքականության նրբությունները»,- նշեց Հովհաննիսյանը:

Ըստ բանախոսների՝ Ադրբեջանը իր ներքին խնդիրները փորձում է բարդել մեզ վրա, սակայն սխալ է միայն մի կողմից հարցին նայելը:

«Նրանց ձգտումներն ու տեսակետները՝ կապված Արցախի հետ, մաքսիմալիստական են, և նրանցից պետք չէ սպասել որևէ քայլ՝ փոխզիջման առումով: Ինչպես արդեն նշվեց՝ Ադրբեջանի կառավարությունը սեփական հասարակությանը շեղելու խնդիր ունի»,- նշեց Հովհաննրսյանը՝ մասնավորեցնելով. «Այդ խնդիրները այժմ իրենց մոտ բավականին շատ են՝ կապված նավթի գների, ինչպես նաև Ադրբեջանի միջազգային բանկի սնանկացման հետ: Վերջինս պետք է ֆինանսավորեր Իրաք-Ադրբեջան երկաթուղու կառուցումը: Սակայն չի կարելի ասել, որ այս ամենից ելնելով այդ երիկաթուղին չի կառուցվի, քանի որ այստեղ Ռուսաստանն էլ ունի իր շահերը և երկաթուղու կառուցումը չի կարող կիսատ մնալ, բայց ամեն դեպքում այն հերթական անգամ հետաձգվում է՝ իր հետ բերելով Ադրբեջանի հերթական ֆինանսական կորուստները»:

Ըստ բանախոսների՝ Ադրբեջանի վարած քաղաքականության կարևոր խնդիրը հայ հասարակության վրա ճնշում գործադրելն է: Այս հանգամանքը ևս շատ է կարևորվում նրանց կողմից:

«Հայ հասարակությունը չունի պատկերացում Ադրբեջանում տիրող վիճակի և նրանց բանակի մասին: Սխալ է նաև մեր հասարակության մեջ տարածված այն կարծիքը, որ երբ ուզենք, կարող ենք մտնել Բաքու և գրավել այն, կամ որ նրանք համատարած ոչխարներ են»:

Լրագրողների այն հարցին, թե արդյո՞ք Ադրբեջանում այս օրերին անցկացվող զորավարժությունները որևէ դերակատարում ունեն սահմանում տեղի ունեցող սրացումների հետ, Գարիկ Հարությունյանը պատասխանեց.

«Պետք չէ սահմանում տեղի ունեցող սրացումները անմիջապես կապել Ադրբեջանում անցկացվող զորավարժությունների հետ: Չնայած  զգոնությունը մեզ մոտ ավելանում է այդ օրերին»: 

Նա նաև հավելեց, որ Ադրբեջանի պարագայում պետք չէ սպասել, որ եթե ԵԱՀԿ Մինսկի խումբը համապատասխան հայտարարությամբ է հանդես գալիս, ապա նշանակում է, որ Ադրբեջանը ընդունում է այդ ամենը: Անկախ նրանից, թե ինչ է կատարվում, մեր զորքերը պետք է պատրաստակամ լինեն: Քանի որ, եթե մեզ մոտ զոհերի թիվը հստակ մատնանշում ենք, ապա Ադրբեջանի պարագայում շատ հաճախ զոհերի իրական թիվը թաքցնում են և մենք երբեք չենք կարող իմանալ ադրբեջանական կողմի ունեցած զոհերի հստակ թիվը: 

Լրագրողների այն հարցին, թե ի՞նչ պետք է սպասենք Ադրբեջանից, Գ. Հարությունյանը պատասխանեց. Ադրբեջանն այս առումով անկանխատեսելի պետություն է և սխալ է որևէ կանխատեսումներ անելը: 

Հովհաննիսյանն իր խոսքը եզրափակեց՝ նշելով, որ Ադրբեջանի զոհերի թիվը չի կարող մեզ մխիթարել, սակայն զուտ ռազմական տեսանկյունից կարող է սթափեցնող գործոն լինել թշնամու համար: