Իսրայելի ու Սիրիայի միջև ռազմական բախումները սպասելի են

Այսօր Իսրայելը հրթիռակոծել է սիրիական ռազմավարական նշանակություն ունեցող ալ-Մազզա ռազմակայանը. Թեև Իսրայելը խուսափում է ուղղակիորեն ներքաշվել սիրիական ռազմաքաղաքական գործընթացներում, այնուհանդերձ, Իսրայելի ու Սիրիայի միջև ուղղակի ռազմական առճակատումներ ժամանակ առ ժամանակ տեղի են ունենում.

Այս ռազմական միջադեպը, ինչպես և համանման բախումները թերևս հարկավոր է ավելի շուտ դիտարկել երկու երկրների միջև առկա քաղաքական, տարածքային և գաղափարական հակադրությունների, քան սիրիական ճգնաժամին իսրայելական կողմի ներքաշման միտման հարթությունում. 

Իսրայելի ու Սիրիայի միջև ռազմական բախումները սպասելի են նաև միջազգային հարաբերություններում տեղի ունեցող վերջին վերադասավորումների համատեքստում.

Մասնավորաբար «Brexit»-ից հետո և ԱՄՆ նախագահական ընտրություններին Թրամփի հաղթանակով, Միացյալ Նահանգների այսպես կոչված «ետքաշման» քաղաքականության ֆոնի ներքո մերձավորարևելյան տարածաշրջանային առաջատար դերակատարները, այդ թվում և Իսրայելը, փորձում են ամրապնդել դիրքերը նոր աշխարհաքաղաքական ձևավորվող իրավիճակում.

Կարելի է հաստատել, որ սիրիական ալ-Մազզա ռազմակայանի իսրայելական հրթիռակոծման միջադեպը դժվար ունենա լուրջ ռազմական ընթացք թե սիրիական, և թե իսրայելական կողմից. Եվ ամենայն հավանականությամբ, հարցը այլ շահագրգիռ կողմերի` առաջին հերթին Ռուսաստանի միջնորդությամբ, կկարգավորվի բանավոր փոխպայմանավորվածությամբ:

Կարեն Վերանյան. Ֆեյսբուք