Արագ հոսքը կտանի ինձ դեպի երկինք, նույնիսկ առանց թևի. այսօր՝ հերոս Ռուբեն Իսկանդարյանի ծննդյան օրը, բացվեց նրա հիշատակի անկյունը (լուսանկարներ և տեսանյութ)

Հունիսի 23-ին, ապրիլյան քառօրյա պատերազմի հերոս Ռուբեն Իսկանդարյանի ծննդյան օրն է: Այսօր Հայ-Ռուսական համալսարանի՝ Արցախյան ազատամարտի հերոս Լեոնիդ Ազգալդյանի անվան լսարանում բացվեց հերոսի անվան հիշատակի անկյունը:

Ռուբեն Իսկանդարյանը Հայ-Ռուսական համալսարանի, «Էկոնոմիկայի և բիզնեսի ինստիտուտի, սոցիալ-մշակութային սերվիս և տուրիզմ» բաժնի շրջանավարտն էր:

Համալսարանի ղեկավարությունը և ուսանողները շատ հուզիչ մի փոքրիկ ֆիլմ էին նկարահանել Ռուբենի մասին, որտեղ խոսում էին դասախոսները և նրա կուրսեցիները: Ցերեկույթին ներկա էին նրա ընկերներն ու հարազատները, ինչպես նաև այլ հյուրեր: Համալսարանի ուսանողուհիներից Էլինա Աղաբաբյանը, ում ծննդյան օրն էլ էր այսօր, բանաստեղծություն էր պատրաստել Ռուբենի մասին, որը մատուցեց ներկաներին:

Համալսարանի ռեկտորի՝ ուսանողության հարցերով խորհրդական Հռիփսիմե Մարգարյանի խոսքով՝ Ռուբենն ուսանողության կողմից եղել է շատ սիրելի ու լավ ընկեր, իսկ դասախոսների կողմից՝ հարգված ու սիրված ուսանող:

«Մենք հպարտանում ենք և մշտապես հիշելու ենք մեր հերոսներին»,- ասաց Հռիփսիմե Մարգարյանը Operativ.am-ի թղթակցի հետ զրույցում:

Առավել մանրամասն՝ տեսանյութում:

Միջոցառման բացման արարողության մեկնարկը տվեց Հայ-Ռուսական համալսարանի ռեկտոր Արմեն Դարբինյանը:

Նրա խոսքով՝ չկա որևէ սփոփանք, որ կարելի է փոխանցել Ռուբենի ծնողներին, հարազատներին:

«Ես կարծում եմ, որ մեր պարտքն է, ունենալ այս անկյունը համալսարանում՝ Ռուբեն Իսկանդարյանի անկյունը, որպեսզի մենք հիշենք և երբևիցե չմոռանանք նրան: Շատ խորհրդանշական է, որ մենք հավաքված ենք Լեոնիդ Ազգալդյանի անվան լսարանում, որովհետև մենք համալսարանում շատ մեծ պատվով և խորը հարգանքով ենք վերաբերում բոլոր նրանց, ովքեր օրինակ կարող են ծառայել մեր նոր սերնդին: Ռուբենն իր սերնդակիցներից  նույնպես չի տարբերվել՝ հանգիստ, զուսպ, համեստ իր վարք ու կեցվածքով»,- ասաց Արմեն Դարբինյանը և իր շնորհակալությունն ու խորին ակնածանքը հայտնեց Ռուբենի ծնողներին, որ նման տղա են դաստիարակել:

«Կառավարման, բիզնեսի և զբոսաշրջության» ամբիոնի վարիչ  Արզիկ Սուվարյանի խոսքով՝ շատ դժվար էր, բայց իրենք որոշեցին այսօր՝ Ռուբենի ծննդյան օրը, ինչ-որ մի հուշ, մի հետաքրքիր անկյուն ստեղծել ապրողների համար, որովհետև Ռուբենը հավերժության ապրողների մեջ է:

Միջոցառմանը ներկա էր նաև ՀՀ ՊՆ տեղեկատվության և հասարակայնության հետ կապերի վարչության պետի տեղակալ, գնդապետ Վանիկ Մինասյանը, ով նույնպես մեծարեց մեր հերոսներին և Պաշտպանության նախարարի անունից, պաշտպանության նախարարության զինված ուժերի ողջ անձնակազմի անունից շնորհակալություն հայտնեց հերոսների ծնողներից և գլուխ խոնարհեց նրանց արջև:

Ռուբենի հորաքրոջ տղան շնորհակալություն հայտնեց կազմակերպիչներին և խնդրեց հավաքվածներին մեկ րոպե լռությամբ հարգել զոհերի հիշատակը:

Ռուբենի մայրն ամբողջ ընթացքում չկարողանալով զսպել արցունքները. լալիս էր, բայց, երբեմն՝ տղայի մասին գովեստի խոսքեր լսելիս թույլ ժպտում: Նրա ժպիտն առավել զգացվեց ֆիլմը դիտելիս, բայց նույն արցունքների ներքո: Միջոցառման վերջում չկարողանալով զսպել արցունքները, նա իր խորին շնորհակալությունը հայտնեց կազմակերպիչներին, համալսարանի ղեկավարությանը, Ռուբենի ընկերներին և հյուրերին:

Առավել մանրամասն՝ տեսանյութում

Ռուբեն Իսկանդարյանի մասին է պատմում նրա եղբայրը՝ Վահեն: