Հուշեր և հիշողություններ մարտի դաշտից. պատմում են ազատամարտիկները
Operativ.am-ի թղթակիցը զրույց ունեցավ արցախյան ազատամարտի քաջարիների հետ, ովքեր փորձեցին դրվագներ հիշել պատերազմյան տարիներից:
-Ի՞նչ ապացուցեց Արցախյան ազատամարտը:
Արցախյան ազատամարտը եկավ ապացուցելու ևս մեկ անգամ, որ հայ ժողովուրդը գուցե որոշ դեպքերում անկայուն է, չեն հաշտվում մեկը մյուսի հետ, սակայն, երբ ժամն է հասնում հայրենիքի պաշտպանության, նրանք կարողանում են միահամուռ կերպով համախմբվել և պայքարել մեկ գաղափարի համար, այն է՝ պաշտպանել հայրենիքը թշնամու վայրագություններից: - Աշոտ Սարգսյան
-Երբ առաջին անգամ զենքը վերցրեցիք ի՞նչ զգացողություն ունեցաք:
17 տարեկան էի, երբ պատերազմը սկսվեց: Տեսնելով հորս, պապիս և նրանց մարտական ընկերների ոգևորվածությունը, ցանկացա գնալ մարտի դաշտ և կռիվ տալ թշնամու դեմ: Պապս հրաժարվեց ինձ մարտի դաշտ տանել, սակայն հայրս ոգևորված նայեց ինձ, ուրախության արցունքները աչքերին ասաց, որ հպարտ է, որ ինձ պես զավակ ունի: Երբ զենքը դրեց զեռքիս ասաց. «Տղաս, երբեք մարդ չսպանես: Դու սպանում ես թշնամուն, որը փորձում է գրավել հայրենի հողդ և գետնին տապալել ընտանիքդ»: Չգիտեմ, թե ինչ կատարվեց այդ պահին հետս, բայց ես այլևս վախ չէի զգում ոչնչից: - Արամ Հովհաննիսյան
Կփորձե՞ք հիշել որևէ հետաքրքիր դեպք Արցախյան ազատամարտից:
Պատերազմի թեժ պահն էր, երբ ուտելիքը վերջանում էր: Մեզ մոտ այլևս ուտելիք չկար: Ես ու ընկերս էինք: Առավոտ էր: Հանկարծ նկատեցինք, որ 3 մրջյուն մեջքներին ձմերուկի կորիզներ են տանում, ես ու ընկերս վերցրեցինք այդ կորիզները և կերանք: Մի քանի րոպե անց նկատեցինք, որ կրկին մրջյուններ են գալիս՝ ձմերուկի կորիզներով: Կրկին վերցրեցինք: Այդպես ևս մի 4-5 անգամ: Ես և ընկերս որոշեցինք հայտնաբերել ձմերուկի կորիզների «օջախը»: Գնացինք մրջյունների հետևից: Երբ տեղ հասանք, փոքր-ինչ տհաճություն զգացինք: Ձմերուկի կորիզները մեզ էին հասնում աղբի միջից: - Սարգիս Միքայելյան
Թշնամուն տված ծանր հարվածներից որևէ մի դեպք կարո՞ղ եք պատմել:
Թշնամին մտել էր հայկական գյուղերից մեկը: Գյուղի երեխաներից մեկը՝ 15-ամյա Աշոտը, կարողացավ հասնել լեռները և մեզ զգուշացնել: Մենք, րոպե անգամ չկորցնելով, շտապ հասանք գյուղ այն պահին, երբ արդեն թշնամին գյուղից քշում էր գյուղացիների անասունները: Արագ շրջափակեցինք նրանց և սկսեցինք սեղմել օղակը: Նրանք, տեսնելով մեզ, խուճապի մատնվեցին և զենք-զինամթերք թողնելով՝ փախուստի դիմեցին: - Մանվել Սևումյան
Սոնա Բախշյան