Վերջին հաշվով գոլ է խփվել, կարևոր չէ գոլը խփվել է խաղից, թե 11 մետրանոց հարվածից. Հրանտ Բագրատյան

Operativ.am-ի թղթակիցը հետընտրական գործընթացների մասին խոսեց ՀՀ նախագահի նախկին թեկնածու, «Ազատություն» կուսակցության նախագահ Հրանտ Բագրատյանի հետ.

-Պրն. Բագրատյան, ընտրություններից հետո ի՞նչ ծրագրերով եք հանդես գալու, ԱԺ-ում որպես «Ազատության», թե՞ ՀԱԿ-ի պատգամավոր եք լինելու:

-Ես մնում եմ ՀԱԿ-ի պատգամավոր, ճիշտն ասած իրավական կողմը չգիտեմ այն առումով, որ ստիպված եմ մնալ ՀԱԿ-ի պատգամավոր. այդպես է օրենքը, և այդպես ծավալելու եմ գործունեությունս, պարտադիր չէ, որ այդ գործունեությունն ամբողջությամբ կամ մասամբ կապված լինի ՀԱԿ-ի ֆրակցիայի հետ:

-Այլ գործունեություն չե՞ք ծավալում:

-Մենք ընդլայնում ենք Ազատություն կուսակցության գործունեությունը քաղաքական դաշտում և կուսակցաշինարարության հետ կապված այլ խնդիրներ:

-Պրն. Բագրատյան, Րաֆֆի Հովհաննիսյանի հանրահավաքին Դուք Ձեր սատարումն ինչպե՞ս եք իրականացնում:

-Ես եղել եմ Ազատության հրապարակում, ժողովրդի հետ եմ ինձ համարում, կարծում եմ, որ ժողովրդի պահանջները պետք է քննարկվեն:

Մտավախություն չկա,՞ որ կարող են կրկնվել մարտի մեկի դեպքերը:

-Իհարկե կա, ես այդ մասին գրել եմ:

-Ինչպե՞ս խուսափել հնարավոր բախումներից:

-Ես դրա պրոֆեսորը չեմ և արդեն ասել եմ, որ լավ կլիներ, եթե երկխոսություն լիներ:

-Որոշ քաղաքագետների կարծիքով՝ Րաֆֆի Հովհաննիսյանի հավաքած ձայները ոչ թե իր ձայներն են, այլ ընդդիմությանը տրված և իշխանությանը դեմ քվեարկած մարդկանց ձայներն են, Դուք է՞լ եք այդպես կարծում:

-Այս պահին դա նշանակություն չունի, թե ինչ ձայներ են, վերջին հաշվով գոլ է խփվել, կարևոր չէ գոլը խփվել է խաղից, թե 11 մետրանոց հարվածից:

-Ձեր կարծիքով հնարավո՞ր է, որ Րաֆֆի Հովհաննիսյանը մտնի կոալիցիա:

-Նման հարցերը պետք է տալ Րաֆֆի Հովհաննիսյանին:

-Ինչպե՞ս եք վերաբերում այն հանգամանքին, որ ՀԱԿ-ը և ՀՅԴ-ն ընտրություններից հետո սատարում են Րաֆֆի Հովհաննիսյանին, սակայն ընտրություններից առաջ պասիվ կեցվածք էին դրսևորել:

-ՀՅԴ-ն հայտարարել է, որ ժողովրդի հետ է, սատարման մասին չգիտեմ. այդտեղ նրբություններ կան:

ՀԱԿ-ը բոյկոտում է քառօրյա նիստերը, Դուք մասնակցելու՞ եք նիստերին:

-Ես առնչություն չունեմ իրենց հայտարարությունների հետ. իրենք հայտարարում են այն, ինչ ուզում են:

Մինչ ընտրությունները ՀԱԿ անդամների հետ որևէ գժտություններ եղե՞լ են:

-Ոչ, ի՞նչ գժտություններ կարող էր լինել իրենց հետ:

Խնդիրն այն է իրենք հայտարարում էին, որ տեղյակ չեն եղել Ձեր առաջադրվելու փաստին:

-Այդ մասին չեմ ուզում խոսել. առանց մեկնաբանության:

Զրուցեց Սեդա Ղուկասյանը