Դերասան Գնել Սարգսյանը պատրաստվում է տպագրել իր երրորդ գիրքը

Operativ.am-ի թղթակիցը զրուցեց Գնել Սարգսյանի հետ, ում շատերը ճանաչում են որպես դերասան, ով վերջերս նկարահանվում էր «Շանթ» հեռուստաընկերության «Անծանոթը» սերիալում, մարմնավորում Վահանի կերպարը: Բայց քչերը գիտեն Նոր-Այր գրական անունով բանաստեղծին, ով հենց Գնելն է: Նրա առաջին «…Վերջ: Սկսվում է…» բանաստեղծությունների ժողովածուն տպագրվել է 2002 թվականին, իսկ երկրորդը Նոր-Այրը լույս է ընծայել 2009 թվականին Ամերիկայում, որն անվանել է «Քայլ արևին»: Այնուհետև շարունակել է ստեղծագործել և զբաղվել դերասանական գործունեությամբ:

( Կնոջ՝ Աննայի հետ)

Իսկ թե այժմ ինչո՞վ է զբաղվում սիրված դերասան ու գրող Գնել Սարգսյանը, տեղեկանում ենք նրանից.

- Երբ դերասանը սերիալում այլևս չի նկարարահանվում, կերպարին «սպանում» են, սովորաբար ասում են՝ կամ ներկայացումների է մեկնել, կամ ֆիլմի անձնակազմի հետ է վիճել, կամ էլ այլ հեռուստաընկերություն է տեղափոխվել: Ձեր դեպքում ո՞րն էր պատճառը:

- Դեռ պատրաստ չեմ այդ մասին խոսելու, հեռուստաընկերության հետ ընդհանուր հայտարարի չեկանք, թեև հնարավոր է, որ կրկին կանչեն: Պայմանագիր կա, որը դեռ լուծարված չէ, համենայն դեպս՝ իմ կողմից:

- Իսկ այժմ ինչո՞վ եք զբաղվում:

- Հիմա ընտանիքիս հետ եմ անցկացնում, հանգստանում եմ: Առաջիկայում ունեմ երկու ներկայացումներում խաղալու առաջարկ: Նախատեսվում են նաև հյուրախաղերով շրջագայություններ: Պատրաստվում եմ նաև իմ երրորդ գիրքը տպագրել, որն ավելի հաստափոր է լինելու, տարբեր գործեր են ընդգրկվելու, նաև՝ արձակ: Կարծում եմ՝ այդ մասին շուտով կտեղեկանաք:

- Ի՞նչ կարող եք պատմել Ձեր որդու մասին:

- Արդեն 1 տարեկան է որդիս: Կրում է հորս` պապի անունը՝ Ալեք: Շատ լավ իմանալով անվան իմաստն ու էությունը, որը նշանակում է արեգ, արեգակ, լինելով հայրապաշտ, հայրենասեր մարդ, որոշեցի տղայիս անունն Ալեք դնել: Ես ու կինս ամեն ինչ անում ենք, որ նա լավ մարդ, արժանավոր հայ լինի:

Հ.Գ. Ի դեպ՝ Գնելն իր «…Վերջ: Սկսվում է…» գրքում ունի դեռ չծնված որդուն նվիրված բանաստեղծություն, որտեղ նրան խրատներ է տալիս, հայրենասիրության կոչ անում…

(Որդին՝ Ալեքը)

ՈՐԴՈՒՍ

… Սիրիր երկիրդ,

Որ սիրես դու քեզ,

Որ ինքզիդ հանկարծ

Օտար չհամարես:

Քայլիր ոչ թե

Տեսքով ամոթխած,

Այլ՝ ինքնավստահ,

Այնպես, որ հարցնեն

Ազգությունը քո,

Իսկ դու առանց ամաչելու

Երկրիդ լեռների

Գոռ արտաքինով

Ու վահագնյան

Կայծակների

Շանթակող ձայնով,

Հրկիզիր նրանց

Միայն մի բառով,

Բառ, որ նշանակում է

Հայ:

Հայ մնա, որդիս,

Իմ Ալեք բալա…

Զրուցեց Մարինե Ամիրյանը