Ի՞նչ էին քննարկում ԲՀԿ պատգամավորները Աշոտյանի ելույթի ժամանակ

Operativ.am-ի թղթակիցը այսօրվա ԱԺ նիստերի դահլիճում, ԿԳ նախարար Արմեն Աշոտյանի ելույթի ժամանակ նկատեց, որ ԲՀԿ խմբակցության պատգամավոր Տիգրան Ուրիխանյանը անընդհատ ինչ-որ հարց էր քննարկում իր կուսակից ընկերների՝ Վահե Էնֆիաջյանի և Վահան Բաբայանի հետ և մի քանի անգամ դուրս եկավ նիստերի դահլիճից Աշոտյանի ելույթի ժամանակ:

Operativ.am-ի  թղթակցի այն հարցին, թե ինչու՞ չէիք լսում նախարարի ելույթը. արդյոք այն Ձեզ չէ՞ր հետաքրքրում. Ուրիխանյանը վրդովված պատասխանեց.

«Ոնց թե չէի լսում, ի՞նչ եք խոսում, ես ոչ միայն առանձին քննարկումներ եմ ունեցել, այլև իմ եզրակացությունն եմ ներկայացրել այդ հարցի շուրջ, տարբեր բուհերի ռեկտորների հետ հանդիպումներ եմ ունեցել, այդ քննարկումներին մասնակցել է նաև Էնֆիաջյան Վահեն, դահլիճում էլ նաև այդ հարցն էինք քննարկում:

Բացի այդ յուրաքանչյուր պատգամավոր իրավասու է էթիկայի նորմերի շրջանակներում անել իր աշխատատեղում այն ամենն ինչ բխում է իր սեփական հայեցողությունից»:

Պատգամավորը մեկնաբանեց իր կարծիքը նախագծի հետ կապված.

«Ես ունեմ վերապահումներ այդ օրիանգծի հետ կապված. մի կողմից կրթությունը այն լրջագույն ոլորտներից է, որը պետք է երկարաժամկետ հեռանկարի առումով դիտարկվի, ուստի պետք է ամեն ջանք ներդնել, որպեսզի կրթությունը լինի որակյալ, նույնը վերաբերում է նաև բժշկության ոլորտին, հակառակ դեպքում՝ տարիներ անց կհանդիպեք, մեղմ ասած, դիլետանտների հետ, բայց կա նաև մեդալի հակառակ կողմը. այսօրվա իրավիճակում, երբ երկրում ոչ մի կերպ թույլատրելի չէ կոմերցիոն ձեռնարկություններ փակվելը, այդ թվում նաև մասնավոր կառույցներ, որոնք կրթություն են տրամադրում պետական համապատասխան արտոնագրերի հիման վրա, խրարխուսելի չէ, քանի որ աշխատատեղերի, մեղմ ասած, պակաս է մեր երկրում, գործազրկությունն է մեծ թվերի հասնում և այլն, ուստի հարկավոր է ճիշտ լուծում գտնել»,- նշեց Ուրիխանյանը: