Նոր մանրամասներ` հայ-ադրբեջանական սահմանը հատած հայ «դիվերսանտի» մասին. վերջինս հոգեկան շեղումներ ունի (լուսանկարներ, տեսանյութ)

Երեկ ադրբեջանական ԶԼՄ-ները տեղեկություն տարածեցին, որ Տավուշի շրջանում գերի են վերցրել հայ դիվերսանտի:

Նրանք հայտարարել էին, որ գերի են վերցրել Տավուշի մարզի Վերին Կարմրաղբյուր գյուղի բնակիչ Մամիկոն Խոջոյանին:

Դեպքի մասին ավելի մանրամասն տեղեկանալու համար Operativ.am-ի թղթակիցը կապ հաստատեց Վերին Կարմրաղբյուր գյուղի գյուղապետ Կամո Չոբանյանի հետ:

Թղթակցի այն հարցին, թե արդյո՞ք Մամիկոն Խոջոյանը անցել է սահմանը և գտնվում է Ադրբեջանական կողմում պրն. Չոբանյանը պատասխանեց.«Այո, այդ տեղեկությունը համապատասխանում է իրականությանը: Նա տառապում է հոգեկան խանգարմամբ: Մամիկոն Խոջոյանը 77 տարեկան է: Տնից դուրս է եկել երեկ՝ կեսօրվա կողմերը՝ ժամը 11:00-12:00 -ին ու գնացել է գերեզմաների կողմերը: Այդ պահին գերեզմաններում մահվան տարելից է եղել: Մարդիկ այդ ժամանակ նրան նկատել են ու տեսել , որ ձեռքում դույլ կա և հարցրել են, թե ուր ես գնում, նա էլ պատասխանել է, թե գնում եմ խաղող ու մոշ հավաքելու: Հավաքվածներն էլ, թե այ մարդ տարվա էս ժամանակ ի՞նչ խաղող: Բայց տեսնելով որ նա իրենն է կրկնում, երկու կին ասել են, որ քո տղա Հայկազը մոշը քաղել ու բերել է տուն: Բայց Մամիկոնը չի հավատացել ու իջել է այգիներ»:

Պրն. Չոբանյանը նշեց, որ այդ այգիները 8 կմ հեռու են գյուղից, իսկ Ադրբեջանի սահմանից դեպի իրենց այգինները մինչև 1-2 կմ են:

«Իջել է այգիներ ու այդ ժամանակ անձրև է եղել ու թանձր մառախուղ, երևի ինքը շփոթվել է ու չի իմացել, թե ուր է գնում: Այգեպարից մինչև կամուրջը, հին Սովետական ճանապարհ կա, որը այժմ չի աշխատում: Այդտեղ կամուրջից այն կողմ արդեն ադրբեջանական կողմն է և հենց այդ կամուրջի տակով էլ մտել է Ադրբեջանի սահմանը»,- ասաց պրն. Չոբանյանը: 

Թղթակցի այն հարցին, թե ինչպե՞ս նրան չեն նկատել մեր սահամանպահները պրն. Չոբանյանը պատասխանեց, «Երևի ոչ մեկի մտքով անգամ չի անցել, որ խելացի մարդը կարող էր կամուրջի տակով  անցնել, գումարած դրան էլ եղել է թանձր մառախուղ և անձրև»:

Operativ.am-ի թղթակցի այն հարցին, թե այժմ ի՞նչ քայլեր են ձեռնարկվում նրան ետ վերադարձնելու համար պրն. Չոբանյանը պատասխանեց, որ այժմ նրանք չունեն ոչ մի հստակ տեղեկություն. «Ինձ նոր զանգահարեցին Կարմիր Խաչից և հայտնեցին, որ այժմ գալիս են գյուղ: Սպասում ենք Կարմիր Խաչին, որ տեսնենք, թե ինչ է լինելու»:

Զրուցեց Մարիա Կ.