Օլիգարխի պատճառով քաղաքացին իր բնակարանում իրեն մարտի դաշտում է զգում

Operativ.am-ը   ահազանգ ստացավ հուսահատ քաղաքացի Անժելա Գևորգյանից` խնդրելով լուսաբանել իր խնդիրների մասին: Նա նշեց,  որ բազմիցս դիմել է տարբեր  լրատվամիջոցների, սակայն վերջիններս իմանալով ում անվան հետ է կապված խնդիրը, հրաժարվել են լուսաբանելուց: Մեր զրուցակիցը մասնավորապես նշեց.

 «Իմ և իմ երեխայի հանգիստ ապրելու իրավունքները կոպիտ ոտնահարվում են, խնդիրն այն է, որ իմ բնակարանի տակ` նախկինում գործում էր տնտեսական խանութ, հետո օլիգարխ Կարեն Վարդանյանը գնեց այդ տարածքը: Նա բաժանում է այդ տարածքը երեք մասնաբաժինների` նկուղ քանդում, վերելակ կառուցում, սրճարան բացում:

Սկզբում շատ ուրախացա, որ մեր շենքում Գրանդ Քենդի է լինելու, բայց իմ մտքով չէր էլ անցնում, որ հզոր սարքավորումներ են տեղադրվելու, և ես հանգիստս կորցնելու եմ, այնպիսի ձայներ են լինում, որ տպավորություն է ստեղծվում, թե ռազմի դաշտում ենք ապրում, մի խոսքով` մեր հանգիստը կորցրել ենք այն օրվանից, ինչ ինքը սեփականատեր է դարձել»:

Անժելայի խոսքով` ինքը բազմիցս է բարձրաձայնել իր խնդիրների մասին, ճիշտ է, անձամբ Կարեն Վարդանյանի հետ չի կարողացել խոսել, բայց դժգոհությունը արտահայտել է. «Եկան վերելակի ձայնը որոշ չափով իջեցրին, սեղան-աթոռների ձայնը, բայց խնդիրը նաև այն է, որ  դա հինգհարկանի քարե ստալինյան շենք է, որտեղ վերելակ կառուցելը արգելվում է»,- վրդովված նշեց Գևորգյանը:

«Երբ բողոքում եմ քաղաքապետարանում, ինձ ասում են` դա նորմայի սահմաններում է, սանեպետկայան եմ դիմել, գալիս են, կապիկություն են անում, թե սարքավորումներն անջատված են: Ինձ էլ ասում են` եթե դուրդ չի գալիս մեր պատասխանը, դիմիր դատարան, բայց ես ի վիճակի չեմ դատարան դիմելու, քանի որ վճարունակ չեմ, այրի կին եմ, միայնակ երեխա եմ մեծացնում»:

Գևորգյանի խոսքով` շինարարական աշխատանքների պատճառով շենքի սեյսմիկ կայունությունն էլ է ընկել, իրենց բնակարանի պատերը ճաքճքել են:

Մեր զրուցակիցը նշեց, որ նույնսիկ նախագահին է երկու անգամ նամակ ուղարկել և այլևս չի պատկերացնում` ում դիմի իր խնդրով:

Նշենք, որ Անժելա Գևորգյանը բնակվում է Տիգրան Մեծ պողոտայում` 71 շենքում: