Մարտուն Գրիգորյանը Ղուկասյանին միացել է Երևանից եկող ազդակների ճնշման տակ. այդպես երկար չի մնա. Սարիկ Մինասյան

Նույնիսկ մեկ քաղաքական թիմի մեջ են առաջանում խնդիրներ, ուր մնաց չորս տարբեր քաղաքական ուժերի, չորս տարբեր բնավորությունների տեր մարդկանց և ավագանու անդամների մեջ: Այս մասին NEWS.am-ի հետ զրույցում նշեց Գյումրու ավագանու ՔՊ խմբակցության ղեկավար Սարիկ Մինասյանը՝ անդրադառնալով իր ավելի վաղ արած հայտարարությանը, թե Գյումրիում քաղաքական ճգնաժամ է լինելու:

«Արդեն լուրեր կան, որ ուժերից մեկը փորձում է գործարքի գնալ, քաղաքի ինչ-որ մի բաժին ցանկանում է ստանալ: Այսպես կշարունակվի, կխորանա, համոզված եմ, որ անպայման ճգնաժամ առաջանալու է, որովհետև հնարավոր չէ տարբեր ուժեր համատեղ, համերաշխ, երկարատև աշխատանք ունենան»,-ասաց նա:

Դիտարկմանը, որ ՔՊ-ում ակնկալում էին, որ Մարտուն Գրիգորյանը չի միանա Վարդան Ղուկասյանին, բայց արդյունքում բոլոր 4 ուժերը միացան և քաղաքապետ ընտրեցին Վարդան Ղուկասյանին, Սարիկ Մինասյանն ասաց. «Իմ համոզմամբ, Մարտուն Գրիգորյանը միացել է Երևանից եկող ազդակների ճնշման արդյունքում, որովհետև բազմիցս հայտարարել էր, որ չեն միանալու: Ամենավերջին հայտարարությունը իր կողմից եղել է Պետրոսի մոտ հաղորդմանը, որտեղ հստակ հարցին, թե 100% ձեր ընտրողները համոզված լինե՞ն, որ դուք ձեր ձայնը այլ թեկնածուի չեք տալու, Մարտուն Գրիգորյանը ասել է՝ այո, իմ ձայնը ոչ մեկին չեմ տալու: Կա տեսագրությունը, և այդ իր լռությունը հենց դրա արդյունքն էր, որ ինքը իր հետ անհաշտ էր և չգիտեմ ինչ ճնշումների միջոցով ստիպեցին, որ նա գնա այդ քայլին:

Բայց ցանկացած ստիպողաբար կատարած քայլ, ուշ թե շուտ տանելու է հետ քայլի կամ հակառակ արդյունք է ունենալու անպայման: Չի կարող երկար այսպես լինել, անպայման ճաքեր է տալու, որովհետև այն ինչ ստիպողաբար է, այն ինչ քո սրտով չի, այդտեղ երկար չի կարող լինել հաջողություն: Ստիպողաբար ամուսնությունների արդյունքը էլ լինում է ապահարզանը»:

Ինչ վերաբերում է մյուս ուժերին, Սարիկ Մինասյանն ասաց. «Մյուս ուժերից երկրորդ ուժը Ռուբեն Մխիթարյանը Հանրապետական կուսակցության փոքրիկ մասնիկ է: ՀՀԿ-ի նախագահ Սերժ Սարգսյանի և Վարդան Ղուկասյանի միջև կան խորը հակասություններ, և ցանկացած պահի, կարծում եմ՝ նրանք Վարդան Ղուկասյանին ինչ-որ կերպ հասկացնելու են, որ դու մեր շնորհիվ ես նաև դարձել քաղաքապետ, և այստեղ նույնպես կլինեն հակասություններ: Չի կարող երկրի երրորդ նախագահին մեղադրանքներ հնչեցնել հրապարակային, շատ ծանր հանցագործությունների մեջ կասկածելով, և այդ մարդը հանդուրժի, որ դու մնաս Հայաստանի երկրորդ քաղաքի քաղաքապետ 2026 թվականին ընդ առաջ։ Կարծում եմ՝ նաև Վարդան Ղուկասյանը պետք է հետևություններ անի ու արել է արդեն, համոզված եմ, այդքան քաղաքական հոդառություն, փորձ ունի: Կապրենք, կտեսնենք, ինչպես կդասավորվի»:

Նա բացառեց, որ ավագանու ՔՊ-ական անդամները կարող են ճամբարափոխ լինել եւ անցնել Վարդան Ղուկասյանի կողմը. «Մենք շատ լավ թիմ ենք, թիմը ձևավորվել է ոչ թե քաղաքական պրոցեսների, այլ մինչքաղաքական պրոցեսները ընկերական, մարդկային, ճիշտ հարաբերություններով: Այն, ինչ վերաբերում է մեր քաղաքի խնդիրների լուծմանը, մենք նաև ունենք ծրագրեր, այդ ծրագրերը հստակ ներկայացնելու ենք, մասնակցելու ենք այդ պրոցեսներին, բայց քաղաքի իշխանության ձևավորմանը չենք մասնակցելու, անձնական շահերին վերաբերվող հարցերին միշտ դեմ ենք լինելու»,-ասաց նա: