Դավիթաշենի բնակիչները հերթական անգամ կփակեն ճանապարհը․ վերջին քայլը

Անաստաս Միկոյան 64 շենքի բնակիչները օրերս՝ ապրիլի 16-ին եկել էին Երևանի քաղաքապետարան՝ հանդիպելու քաղաքապետ Տիգրան Ավինյանին։

Դավթաշեն վարչական շրջանի Անաստաս Միկոյան 64 շենքի բնակիչները տևական ժամանակ է, ինչ ահազանգում են ապօրինի որոշումներով խլված 4000 քմ կանաչապատ բակային տարածքի մասին։

Նորակառույց շենքի բնակիչները նախորդ շաբաթ նույնիսկ բողոքի ակցիա էին իրականացրել ՀՀ կառավարության շենքի առաջ, գնացել «ԱՄԻՕ» բանկ, այնուհետև հանդիպել Տիգրան Ավինյանին։

Միկոյան 64 շենքի բնակիչներից Հայկ Սմբատյանը ArmLur.am-ի հետ զրույցում նշեց, որ քաղաքապետը նույնիսկ շատ ցանկության դեպքում որևէ կառուցման, շինարարության թույլտվություն չի կարող տրամադրել։

«Մենք այդ հայտարարությունից հասկացանք, որ կառուցապատողի համար էլ էր դա անակնկալ ու մենք ներկայացրեցինք, որ ամեն դեպքում, եթե այդ ամբողջն ինչ-որ նախագծով եղել է, պետք է իրականացվի, առնվազն անհասկանալի է, թե ինչու է առանձնացումը ձեր կողմից տրամադրվել։ Ես հասկացա, որ իրենք ինչքան էլ միգուցե ներքուստ ընդունեցին, որ իրենց մեղավորությունն էլ կա, բայց ցույց չտվեցին։ Այսինքն դա տեղափոխեցին կառուցապատողի դաշտ»,- ասաց ArmLur.am-ի զրուցակիցը։

Հարցին, թե ի՞նչ են պատրաստվում անել հաջորդիվ, Միկոյան 64 հասցեի բնակիչը պատասխանեց․

«Այսօր մենք հանդիպելու են սնանկության կառավարիչի հետ։ Եթե սնանկության կառավարիչը մեր պահանջները չիրականացնի, բնականաբար, մենք պատրաստվում ենք ավելի մեծ թափով մեր ակցիաները սկսել»։

Նշենք նաև, որ Միկոյանի բնակիչները սնանկության կառավարչից պահանջելու են, որ հողամասը վերադառնա Անաստաս Միկոյան 64 հասցեին և ապահովվի 3,38 հեկտարը, որը բնակիչները ձեռք են բերել գնման իրավունքով։