ԱԺ-ն ընդունեց ՀՀ-ին 102 մլն եվրոյի վարկ տրամադրելու համաձայնագիրը վավերացնելու նախագիծը

Ազգային ժողովն ապրիլի 18-ի նիստին առաջին ու երկրորդ ընթերցմամբ և ամբողջությամբ ընդունեց մի շարք նախագծեր:

Վերջիններիս թվում է ՀՀ-ի և ՎԶՄԲ-ի միջև «Համընդհանուր առողջապահական ծածկույթի ծրագրի իրականացում» վարկային համաձայնագիրը վավերացնելու մասին նախագիծը, որով նախատեսվում է ՀՀ-ին տրամադրել 102 մլն եվրո արժողությամբ վարկ: Ծրագրի նպատակն է բարելավել առաջնային բժշկական օգնության որակը և իրագործումը, բարձրացնել առողջապահական ծախսերի արդյունավետությունը, նվազեցնել առողջապահական ծառայություններից օգտվելու ֆինանսական խոչընդոտները:

Առաջին ընթերցմամբ ընդունված նախագծերի թվում են «Կրիպտոակտիվների մասին» նախագիծը և «Պետական վերահսկողական ծառայության մասին» և կից օրենքներում փոփոխություններ նախատեսող օրենսդրական փաթեթը: Առաջինը միտված է Հայաստանում կրիպտոակտիվների ոլորտի կարգավորմանը, իսկ երկրորդ նախագծով նախատեսում է ՀՀ ֆինանսների նախարարության կողմից Հայաստանի պետական բյուջեի կատարման նկատմամբ հսկողության իրականացման գործառույթը փոխանցել Պետական վերահսկողական ծառայությանը:

Առաջին ընթերցմամբ քննարկված, բայց չընդունված նախագծերից մեկն էլ վերաբերում էր Հարկային օրենսգրքում առաջարկվող փոփոխություններին, որը ներկայացրել էր «Հայաստան» խմբակցությունը: Նախագծով առաջարկվում է կասեցնել աստիճանական ներդրվող՝ քաղաքացիների անշարժ գույքի հարկման բեռի ավելացման վերջին փուլը՝ բացառությամբ 200 միլիոն դրամից ավելի հարկման բազա ունեցող անշարժ գույքի հարկման դեպքի, որի պարագայում գործող կարգավորումներն առաջարկվում է թողնել անփոփոխ: «Քաղաքացիական պայմանագիր» խմբակցության ղեկավար Հայկ Կոնջորյանը հայտարարեց, որ դեմ են քվեարկելու նախագծին:

Երկրորդ ընթերցմամբ ընդունված նախագծերի թվում է ««Ձերբակալված և կալանավորված անձանց պահելու մասին» օրենքում լրացումներ և փոփոխություններ կատարելու մասին» օրենքի նախագիծը: Օրինագծի ընդունման արդյունքում միասնական չափանիշների հիման վրա կապահովվի ՀՀ-ում ձերբակալված անձանց պատշաճ բժշկական զննությունն ու դրա արդյունքների ամբողջական արձանագրումը: