«Տեսախցիկի շնորհիվ կանխվեց բռնությունը մանկապարտեզում»․ ծնողները կո՞ղմ են տեսախցիկներին

Օրերս հայտնի դարձավ, որ տեսախցիկներ են տեղադրվել մայրաքաղաքի որոշ մանկապարտեզներում՝ թվով չորսում։ Երեկ MediaHub–ը պարզեց, որ մանկապարտեզներում տեղադրված տեսախցիկներին ծնողները հասանելիություն չեն ունենալու։

Անգամ եթե, օրինակ, երեխայի վրա կապտուկներ լինեն, ու ծնողը դիմի պարզելու, թե ի՞նչ է կատարվել, այդ դեպքո՞ւմ էլ ծնողին չի տրամադրվելու տեսագրությունը, քաղաքապետարանից արձագանքել էին՝ ոչ․ «Եթե ծնողը մեր վերահսկողական գործառույթի իրականացնելուց հետո շարունակում է կարծել և պնդել, որ դեպքը տեղի ունեցել, և եթե գործ հարուցվի, ապա գործի շրջանակում որևէ մեկը չի կարող չտրամադրել հասանելի տեղեկատվություն: Բայց ուղղակի գրության մակարդակում, պահանջի մակարդակում հասանելիություն ծնողին չի տրվելու, դա միանշանակ է»։

Միանշանակ է, որ ծնողները կողմ են քաղաքապետարանի այս որոշմանը, որ երևանյան բոլոր մանկապարտեզներում տեղադրվելու են տեսախցիկներ: Որոշակիորեն, սակայն, ունեն անհանգստություն այն մասով, որ իրենց հասանելիություն չի տրվելու։

MediaHub-ը ծնողների շրջանում հարցախույզ անցկացրեց, պատասխանները ներկայացնում ենք ստորև:

«Ճիշտ կլիներ այն դեպքում, եթե ծնողը ցանկացած պահի հնարավորություն ունենար հետևելու իր երեխաներին, հակառակ դեպքում օգուտը կգնահատեմ 50%»։

«Իհարկե, որպես ծնող կողմ եմ, հենց տեսախցիկ լինելու շնորհիվ ես կարողացա հասնել նրան, որ դայակը, որն իրեն նորմալ չէր դրսևորել և արժանի չէր աշխատելու, հեռացվեց մեր խմբից, արդյունքում կանխվեց բռնություն, որը հետագայում կարող էր վերածվել ընդհուպ մինչև ծեծի և մի շարք տրավմաների երեխաների մոտ»։

«Միանշանակ, ճիշտ որոշում է։ Կարծում եմ՝ փոքր ինչ զգոն կլինեն թե՛ մանկապարտեզի աշխատակիցները և թե՛ ծնողները»։

«Իսկ ես այդպես չեմ մտածում, տեսախցիկը խանգարում է աշխատողին և ծնողին։ Մի երեխան իմ բալիկին, օրինակ, նեղացրեց, ինչո՞ւ շուտ չտեսան, կամ նույնը մյուս ծնողը դիմի, ու պատկերացնում եք՝ ինչ խառնաշփոթ է լինելու։ Ես, որպես մայր, ինչու ոչ՝ նաև տատիկ, երբեք չեմ մտածել, որ իմ բալիկներն ապահով չեն, նրանք ձեր տանից ձեզանից էլ ապահով են, եկեք վստահենք այդ պատասխանատու աշխատանքը կատարող անձանց»։

«Մեկ է, խմբում կա այնպիսի անկյուն, որը տեսախցիկին հասանելի չէ։ Եթե մտադրված լինեն ինչ-որ բան անելու, կանեն»։

«Հրաշալի որոշում է, օրինակ, երեխան ասում է, որ հարվածել են, դաստիարակը կամ դայակն ասում են՝ «երեխան է ստում և իր երևակայության արդյունքն է», դեպքերը շատ են»։

«Տեսախցիկի մեջ վատ բան չկա, դրանով իրականում բոլոր կողմերն էլ ավելի հանգիստ կլինեն»։

«Եթե ծնողը հասանելիություն չի ունենալու տեսախցիկին, էլ իմաստը ո՞րն է»։

«Ամեն դեպքում ավելի զգոն են լինելու։ Լավ է»։

«Իհարկե, լավ է, որ տեղադրվի բոլոր պարտեզներում։ Շատ բան կա փոխելու այդ ոլորտում, եթե առողջ սերունդ ենք ուզում, ապա պիտի սկսենք հենց մանկապարտեզներից։ Ավելի լավ է երեխան տանը մնա, քան հոգեբանությունն ու ապագան խեղաթյուրվեն չկայացած ու չարացած դաստիարակների պատճառով»։

Նշենք, որ գործող պայմանագրով՝ տեսախցիկների մյուս խմբաքանակը շուտով կմեկնարկվի, պլանավորում են մինչև 50 մանկապարտեզներում տեղադրել տեսախցիկներ։ Երևանի քաղաքապետարանի ենթակայությամբ գործում է 162 մանկապարտեզ: