Միզապարկի իջեցում. պատճառները

Միզապարկի իջեցումը զարգանում է, երբ կնոջ միզապարկի պատն արտանկում է հեշտոցապատին: Սա կարող է առաջացնել տարբեր գանգատներ, սակայն դեպքերի մեծ մասի համար այն բուժվող և մասամբ կանխարգելվող խնդիր է:

Հիվանդության մյուս անվանումներն են՝ միզապարկի պատի իջեցում, միզապարկի պրոլափս, միզապարկի արտանկում կամ ցիստոցելե: Միզապարկի իջեցումը զարգանում է, երբ կնոջ միզապարկի և հեշտոցի միջև պատի մկանները թուլանում են, ինչպես նաև միզապարկն իր դիրքում պահող կապանները:

Միզապարկի իջեցումը կանանց շրջանում տարածված խնդիր է: Այն հատկապես հաճախ է հանդիպում բնական ճանապահով ծննդաբերած կանանց շրջանում: Որքան բնական ծննդաբերությունների թիվը մեծանում է, այդքան միզապարկի արտանկման հավանականությունը բարձրանում է: Միզապարկի իջեցմանը նպաստում է նաև բնական ծննդալուծման ժամանակ օժանդակող միջոցների կիրառումը, ինչպիսիք են մանկաբարձական աքցանները, փոխանցում է Aysor.am-ը։

Միզապարկի իջեցման այլ պատճառներից են՝

դաշտանադադար (մենոպաուզա), երբ կրճատվում է էստրոգեն հորմոնը, որը ապահովում է կոնքի հատակի մկանների ուժը,
մեծ տարիք, քանի որ տարիքի հետ վերոնշյալ մկանները և միզապարկը պահող մկաններն ու կապանները թուլանում են
աղիների գործունեության դժվարացում կամ քրոնիկ փորկապություն,
տևական ժամանակ քրոնիկ կամ կայուն հազ,
մարմնի ավելորդ քաշ կամ գիրություն,
ծանրության հաճախակի բարձրացում,
ժառանգականորեն թույլ կոնքի հատակ,
կոնքի հատակի շրջանում գինեկոլոգիական, կամ այլ վիրահատական միջամտություն:

Միզապարկի իջեցմամբ որոշ կանանց մոտ որևէ անհանգստացնող գանգատ չի առաջանում: Մյուսների մոտ կարող են ի հայտ գալ հետևյալ ախտանիշները՝

ծանրության, փքվածության, ձգվածության կամ անհարմարավետության զգացում,
միզարձակման հետ կապված խնդիրներ, հաճախամիզություն կամ զգացողություն, որ միզելիս միզապարկը լրիվությամբ չի դատարկվում,
անմիզապահություն (մեզի ակամա արտահոսք), հատկապես հազալիս, ծանրություն բարձրացնելիս, որովայնի մկանները լարելիս,
սեռական հարաբերությանն ուղեկցող խնդիրներ կամ ցավ:

Բուժումը կարող է ներառել՝

ապրելակերպի բարելավում,
կոնքահատակի մկաններն ամրապնդող ֆիզիոթերապևտիկ միջոցառումներ,
հորմոնային բուժում, օրինակ՝ Էստրոգենի քսուք, որը կօգնի կոնքահատակի մկանների ամրապնդմանը,
վիրահատություն:

Ծանր արտանկման դեպքերում սովորաբար պահանջում է վիրահատական բուժում: Կան վիրահատության տարբեր մեթոդներ, որոնց օգուտների և ռիսկերի մասին կարող եք տեղեկանալ բժշկից:

Հետվիրահատական վերականգնումը սովորաբար տևում է 6 շաբաթ, որի ընթացքում պետք է խուսափել ծանր վարժանքներից, ծանրություն բարձրացնելուց և սեռական հարաբերությունից:

Միզապարկի իջեցման կանխարգելումը

Որոշ դեպքերւմ որևէ կերպով հնարավոր չի լինում կանխարգելել միզապարկի պատի արտանկումը, հատկապես, եթե այն ունի ժառանգական բնույթ կամ պատճառվել է ծննդաբերությունից:

Սակայն կան որոշ միջոցներ, որոնք կարող են դառնալ օգտակար՝

պետք է ամեն օր կատարել կոնքահատակի ամրապնդման վարժանքներ,
խուսափել հաճախակի ծանրություններ բարձրացնելուց, այդ թվում՝ երեխաներին գրկելուց,
պահպանել մարմնի քաշը նորմալ միջակայքում,
բարելավել սննդակարգը և կանխարգելել փորկապությունը,
ամեն օր կատարել թույլից մինչև չափավոր ծանրաբեռնվածության ֆիզիկական վարժանքներ:

Անհրաժեշտ է դիմել բժշկի, եթե անհանգստացած եք, որ կարող եք ունենալ միզապարկի պատի իջեցում կամ ունեք այս հիվանդությանը բնորոշ գանգատներ։