«Գուզեմ օր միշտ խնդաս, իմ սրտի քաղաք». Կարեն Սարուխանյանը դիմել է գյումրեցիներին

ԱԺ «Քաղաքացիական պայմանագիր» խմբակցության պատգամավոր Կարեն Սարուխանյանը «Ֆեյսբուք»-ի իր էջում անդրադարձել է հարցին, թե ինչու է ինքը, ունենալով պատգամավորի մանդատ, ցանկանում դառնալ Գյումրու քաղաքապետի պաշտոնակատար:

«Սիրելի՜ Գյումրեցիներ,

Հայաստանի Հանրապետության Վարչապետ Նիկոլ Փաշինյանի կոչով դեկտեմբերի 8-ից 10-ը Գյումրիում անցկացվելու է փրայմերիզ՝ Գյումրի համայնքի ղեկավարի ժամանակավոր պաշտոնակատարի ընտրություն կատարելու նպատակով։

«Քաղաքացիական պայմանագիր» կուսակցության վարչության որոշմամբ փչայմերիզի մասնակիցներից մեկը հանդիսանում եմ ես։

Շատերն են հարցնում, թե ինչո՞ւ եմ ինքնաառաջադրվել՝ լինելով Ազգային Ժողովի պատգամավոր, ունենալով առաջնային մանդատ՝ ինչո՞ւ եմ ցանկանում դառնալ քաղաքապետի պաշտոնակատար։

Սիրելի՜ Գյումրեցիներ,

Աշխատելով որպես Շիրակի մարզպետ, Ազգային Ժողովի 7-րդ, 8-րդ գումարման պատգամավոր, ԱԻՆ նախարարի տեղակալ՝ միշտ ապրել եմ իմ հարազատ քաղաքում, խորապես տեղյակ եմ քաղաքի խնդիրներին, գիտեմ Գյումրեցուն բնորոշ բնավորության գծերը, մեզ կապող հոգևոր արժեքները, որոնք երբեք բառերով չես կարող նկարագրել, տիրապետում եմ կառավարչական հմտություններին. կարծում եմ՝ սրանք այն կարևորագույն չափանիշներն են, որոնցով պետք է օժտված լինի Գյումրի համայնքի ղեկավարը։

Չնայած մամուլում տարածված կեղծ ու սին զրպարտանքներին իմ անձի նկատմամբ՝ ուզում եմ ևս մեկ անգամ նշել, որ նման արատավոր երևույթներին միշտ դեմ եմ եղել և միշտ եմ լինելու. ունեմ 2 որդի, որոնց համար իմ վարքով ու քայլերով ձգտում եմ լինել օրինակելի հայր և իսկական Գյումրեցի։

Սիրելի՜ Գյումրեցիներ,

Պատրաստ եմ ողջ ներուժս դնել իմ սիրելի քաղաքի համար, որպեսզի իմ Գյումրին ծաղկի, դառնա այն քաղաքը, որը շատերի համար կլինի ապրելու ու աշխատելու համար երազանքի քաղաք։

Կարևորագույն նպատակ եմ համարում սերունդներին փոխանցել բարեկեցիկ, զարգացած քաղաք՝ պահպանելով Գյումրու կոլորիտն ու հմայքը։

Ես գալու եմ աշխատելու, թեթևացնելու Գյումրեցու հոգսը, ծառայելու իմ հայրենի քաղաքին՝ քաղաքը դարձնելով շինհրապարակ, զբոսաշրջության կենտրոն, ժպտացող մարդկանց քաղաք։

Սիրելի՜ Գյումրեցիներ,

Դուք ունեք հնարավորություն դեկտեմբերի 8-ից 10-ը կատարել ընտրություն՝ Ձեր քվեն տալով Գյումրիում ծնված, Գյումրիում ապրող, Գյումրեցու յոլ ու ղայդեն լավ իմացող փորձառու և կարողունակ քաղաքական գործչին, եթե փրայմերիզի շրջիկ խմբերը մոտենան Ձեզ։

Նաև կոչ եմ անում ակտիվ մասնակցություն ունենալ նախընտրական քարոզարշավին, եթե ինձ եք տեսնում որպես Գյումրի համայնքի ղեկավար։

Գուզեմ օր միշտ խնդաս իմ սրտի քաղաք»,- գրել է Սարուխանյանը:

Օրերս վարչապետ Նիկոլ Փաշինյանը հայտարարեց, որ առաջիկայում Գյումրիում տեղի կունենան նախնական քվեարկություններ, կամ նախնական ընտրություն՝ բացատրելով դրա իմաստը:

«Մենք կխնդրենք ՔՊ անդամների, համակիրների, համախոհների շրջանակից առաջադրվեն կամ ինքնառաջադրվեն թեկնածուներ, նրանց որոշակի չափանիշներով կգրանցենք, ոմանց գրանցումը հնարավոր է մերժենք, այստեղ զուտ քաղաքական հայեցողության չափանիշ է գործելու, որից հետո մենք Գյումրու բնակիչների շրջանում, իհարկե, ոչ բոլորի, որոշակի սկզբունքով, ինչ-որ առումով նաև պատահականության սկզբունքով կիրականացնենք քվեարկություն և դրանց արդյունքներով հաղթած թեկնածուհին կնշանակենք Գյումրու քաղաքապետի պաշտոնակատար, որը մեծ հավանականությամբ կլինի նաև մեր թեկնածուն Գյումրիի քաղաքապետի կամ ավագանու առաջիկա ընտրություններում»,- ասել էր երկրի ղեկավարը:

ՀՀ վարչապետը դեկտեմբերի 3-ի ուշ երեկոյան էլ հայտնել է, որ «Քաղաքացիական պայմանագիր» կուսակցության Վարչության որոշմամբ՝ Գյումրիի քաղաքապետի նախնական ընտրություններին կմասնակցեն քաղաքապետի պաշտոնակատարի հետևյալ թեկնածուները՝ Լևոն Անանյան, Դավիթ Առուշանյան, Շավարշ Արամյան, Էմմա Բարսեղյան, Սարիկ Մինասյան, Վահագն Մկրտչյան, Կարեն Սարուխանյան։