Ստյոպա Սաֆարյանի ամենաուրախ Ամանորը, սպասված նվերը, Ամանորի գիշերն արձակած «սալյուտների» հետևանքներն ու 2014 թ-ի բարեմաղթանքները

2013 թվականն իր տեղ է զիջում 2014 թվականին: Ոմանց համար 2013-ը հաջողակ, ոմանց համար պարզապես սովորական տարի էր: Սակայն, մեկ բան հաստատ է՝ յուրաքանչյուրս հավատում ենք հրաշքների, որոնք անպայման պետք է իրականանան հենց Ամանորի գիշերը: Ամանորի հետ կապված իր հիշողություններով ու դրական լիցքերով Operativ.am-ի  հետ կիսվեց «Ժառանգություն» կուսակցության գլխավոր քարտուղար, ավագանու «Բարև Երևան» խմբակցության անդամ Ստյոպա Սաֆարյանը: Հարցազրույցը ներկայացնում ենք ստորև.

-Պարոն Սաֆարյան ի՞նչ ձեռքբերումներ ունեցաք 2013 թվականին և ինչո՞վ այն նշանավորվեց Ձեզ համար:

Գոհ չեմ 2013 թվականից անձնապես, որովհետև ես ինքս քաղաքականությունից շատ կախված եմ, և քաղաքականությունն ինձ համար նաև մասնագիտություն է: Եվ այդ կտրվածքով, իհարկե, իմ վրա չափազանց ազդել են տարվա հիմնական իրադարձությունները:

-Ձեզ համար ամենահիշվող Ամանորը կամ զվարճալի դեպքն Ամանորի հետ կապված 

Ինձ համար, թերևս ամենաքաղցր Ամանորը կմնա այն տարին, երբ 2 տարի առաջ հայրս մեզ հետ էր նշում: Դա ամենագեղեցիկ Ամանորն էր վերջին տարիներին, որովհետև Ամանորին ամբողջ ընտանիքով միասին էինք՝ երեխաներով հավաքված մի տեղ: Ես շատ պահպանողական եմ Ամանորը նշելու առումով և բացառապես սիրում եմ այն անցկացնել ընտանիքիս հետ: Իսկ զվարճալի դեպքերից, երբ շատ-շատ տարիներ առաջ քրոջս երեխաները փոքր էին, որոշել էինք, որ պետք է Ամանորը նշենք հայրենի գյուղում' տատիկի և պապիկի հետ: Երեխաների համար, բնականաբար, վերցրել էի շատ-շատ հրավառության պարագաներ, ինչպես նաև տարբեր տեսակի գլխարկներ, որոնցից Հայաստանում չկար և 12-ին զանգերը խփելու ժամանակ տվեցի քրոջս տղային սալյուտը, որպեսզի նա օդ պահի, սակայն նա պահեց ուղիղ հարևանի դեզի վրա: Ճիշտն ասած, բախտներս բերել էր, որովհետև ես այդ պահին մտածում էի, որ մենք Ամանորի գիշերը կանցկացնենք պարզապես կրակ հանգցնելով, որը բավականին մոտ էր մեր տանը: Բացի այդ, այդ ամենը նաև մեր գլխներին էր ընկնում և բոլոր գլխարկները խաշվել էին: Թերևս, դա էր ամանորյա ամենազվարճալի դեպքը:

-Իսկ ո՞րն է եղել Ամանորին ստացած և տված ամենաառանձնահատուկ և հիշվող նվերը:

Ալբոմ: Ես չունեի նկարների ալբոմ, քանի որ ես նկարները չէի հավաքում և նկարներս մշտապես թափառում էին: Երբ նոր էինք ամուսնացել, կինս, տեսնելով, որ նկարներս այստեղ-այնտեղ են թափառում, խոստացավ ինձ ալբոմ նվիրել' մեկը ծննդյանս օրը, մյուսն էլ Ամանորին: Եվ վերջապես կար մի բան, ուր ես կարող էի իմ հիշողությունները հավաքել: Ես Ամանորին երբեք չեմ մտածում նվեր ստանալու մասին, բայց միշտ հաճույքով վերներ մատուցել եմ հարազատ մարդկանց: Տարբեր բաներ եմ նվիրել, նայած որ տարին ում ինչ է հարկավոր եղել: Իհարկե, ինձ ամենամեծ հաճույքը պատճառել է քեռիի պարտականություն կատարելը: Ինձ համար գերագույն հաճույք էր նրանց համար Ամանորին նվերներ գնելը: Հիմնականում նվերներն արտերկրից էին, քանի որ այնպես էր ստացվում, որ Ամանորի նախաշեմին գործուղման էի լինում և հաճույքով նրանց համար նվերներ էի ընտրում:

 Իսկ երբևէ նամակ գրե՞լ եք Ձմեռ պապիկին և հավատացե՞լ եք արդյոք նրա գոյությանը:

Իհարկե հավատացել եմ, հիմա էլ եմ հավատում և ուզում եմ, որ նա լինի: Բաներ կան, որոնք անբացատրելի են: Սակայն, այն, ինչ դու չես կարողանում այս պահին անել և ուզում ես, որ ինչ-որ մեկը քեզ համար դա անի: Թե դրա անունը Ձմեռ պապիկ կլինի կամ ինչ-որ ուժ. ամեն դեպքում ուզում ես, որ լինի Ձմեռ պապիկ:

 Ի՞նչ կմաղթեք մարդկանց 2014 թվականին: Եվ Ձեր սպասելիքները 2014 թվականից:

Ես նախ շատ ոգևորված եմ, որ Ձիու տարի է, քանի որ չափազանց զզվում եմ օձերից և ուրախ եմ, որ հրաժեշտ եմ տալու այդ տարուն: Եվ, առհասարակ, անցած 2 տարիներն ինձ համար չափազանց տհաճ տարիներ էին' շատ առումներով: Ես շատ սպասում եմ կապույտ ձիու տարուն, քանի որ շատ եմ սիրում այդ կենդանուն: Իմ ամենասիրելի կենդանիները ձիերն ու շներն են, որոնք ես հաճույքով կպահեմ, ընկերություն կանեմ: Ուզում եմ, որ ձին, որպես երազներում և այլ մեկնաբանություններում նպատակի իրականացման խորհրդանիշ, որպես մուրազ, պարզապես բոլորին հաջողություն բերի: Հաջողություն բերի մեր ազգին, ազգի զավակներին, որտեղ էլ նրանք կլինեն՝ Հայաստանո՞ւմ, թե՞ Հայաստանից դուրս: Ուզում եմ, որ բոլոր բաժանված ընտանքները միանան. բաժանված ամենատարբեր առումներով: Ցանկանում եմ, որ գերդաստանները վերադառնան, միանան և վայելեն իրենց' բոլորի քաղցրությունը: Ուզում եմ, որ 2014 թվականին հայրենիքը լքող չլինի, այլ վերադարձողներ լինեն: Ուզում եմ, որ նրանք, ովքեր չեն վերադառնալու, սակայն օգնելու են իրենց հայրենիքին, էլ ավելի ամուր կապերով կապվեն իրենց երկրի հետ: Եվ մեկ բան' մարդկային պարզ, հասարակ երջանկություն բոլորին:

Իմ ջերմագին շնորհավորանքները Operativ-ի ամբողջ անձնակազմին, որի հետ անցյալ տարի չափազանց լավ աշխատել ենք: Մաղթում եմ Ձեզ երկար ճանապարհ, համագործակցություն լավ մարդկանց հետ:

Operativ.am-ի անձնակազմը շնորհավորում է Ստյոպա Սաֆարյանին և իր ընտանիքին Ամանորի կապակցությամբ՝ մաղթելով անսահման երջանկություն 2014 թվականին:

Զրուցեց՝ Գայանե Մելիքյանը