Աչքերի տակ «պարկեր». առաջացման պատճառները

Ամենատարածված կոսմետիկ խնդիրներից են աչքերի տակ գտնվող պարկերն ու մուգ շրջանակները, որոնք ծերացնում են դեմքը՝ ավելացնելով միանգամից մի քանի տարի։ Աչքերի տակ պարկերը մարդկանց հյուծված ու հոգնած տեսք են հաղորդում, իսկ դեկորատիվ կոսմետիկան կարող է միայն մասամբ քողարկել այս խնդիրը։

Աչքերի տակ պարկեր կարող են առաջանալ ցանկացած տարիքի մարդկանց մոտ։ Երբեմն դրանք որոշ ժմանակ հետո անհետանում են, երբեմն՝ մշտապես առկա են, բայց ամեն դեպքում կապված են պերիորբիտալ ճարպային հյուսվածքի ծավալի ավելացման հետ։ Այն կարող է աճել ինչպես ֆիզիոլոգիական այտուցի, այնպես էլ հյուսվածքների պաթոլոգիական տարածման պատճառով:

Աչքերի տակի պարկերը, որոնք առաջանում են այտուցներից, հաճախ ժամանակավոր են։ Դրանք հայտնվում են ավելորդ ավշային հեղուկի ներհոսքի պատճառով և անհետանում են 20-24 ժամվա ընթացքում։ Շատ գործոններ կարող են ազդել մաշկի և ենթամաշկային հյուսվածքի վրա, քանի որ այս հատվածում ճարպային հյուսվածքը շատ թուլացած է, և այտուցը բավականին հեշտությամբ է առաջանում: Սակայն որոշ դեպքերում էլ աչքերի տակ պարկեր են առաջանում տարբեր հիվանդությունների պատճառով, օրինակ՝ վարակիչ կամ երիկամների հիվանդությունների, փոխանցում է Aysor.am-ը։

Եթե ​​խոսենք ֆիզիոլոգիական այտուցների մասին, ապա դրանց պատճառները կարող են լինել հետևյալը.

Սնուցում. Հատկապես գիշերը ընդունած աղի և կծու կերակուրները հաճախ այտուցներ են առաջացնում, քանի որ աղը իր մեջ ջուր է պահում: Բայց կալիումը, որը պարունակում է հատիկաընդեղենը, մաղադանոսը, սունկը, ընդհակառակը, հակառակ ազդեցությունն է ունենում։ Երբ սննդակարգում այն ​​բավարար է, օգնում է աչքերի տակ այտուցի անհետացմանը։ Բացի աղից, շաքարը նույնպես հեղուկ է պահում, և պետք է խուսափել դրանից:

Ջուրն, ընդհանուր առմամբ, շատ կարևոր է օրգանիզմի և մասնավորապես մաշկի առողջության համար, սակայն այտուցներից և պարկերից խուսափելու համար այն չի կարելի խմել քնելուց առաջ։ Իսկ գազավորված ըմպելիք ընդհանրապես չպետք է խմել ողջ օրվա ընթացքում։ Սպառված հեղուկի ընդհանուր ծավալը պետք է լինի մոտ երկու լիտր:

Քնի պակասը այս խնդրի ամենատարածված պատճառներից մեկն է: Բավարար քունն օգնում է նորմալացնել արյան և ավշի միկրոշրջանառությունը աչքերի տարածքում:

Փորի վրա, դեմքով ներքև քնելը հանգեցնում է մազանոթների գերբնակվածության, ինչը ժամանակի ընթացքում առաջացնում է այտուցներ։ Փորձեք քնել միայն մեջքի վրա։

Նստակյաց ապրելակերպ. Մկանային ակտիվության բացակայությունը, որը նպաստում է հեղուկի հեռացմանը, կարող է նաև առաջացնել հեղուկի լճացում, այդ թվում՝ աչքերի շրջանում։

Վատ սովորություններ. Ե՛վ ալկոհոլը, և՛ ծխելը վնասում են աչքերի գեղեցկությանը: Սա ներառում է նաև գաջեթներից կախվածությունը՝ դրանց հաճախակի օգտագործումը հանգեցնում է աչքերի կարմրության և այտուցման:

Աչքերի խնամքի սխալներ. Կոպերի միջոցները պետք է քսել քնելուց առնվազն մեկուկես ժամ առաջ, հակառակ դեպքում կա այտուցի վտանգ։ Բացի այդ, քսուքը պետք է քսել ուղեծրի ոսկորի երկայնքով, այլ ոչ թե բուն կոպի վրա։

Աչքերի տակ պարկերը, ի տարբերություն այտուցների, ժամանակի ընթացքում չեն անհետանում և կամ բնածին են, գենետիկորեն պայմանավորված, կամ առաջանում են առողջական խնդիրներով, երբեմն՝ բավականին լուրջ:

Դրանք կարող են պայմանավորված լինել հետևյալ հիվանդություններով.

միզուղիների համակարգի պաթոլոգիաները, օրինակ՝ երիկամային սուր անբավարարություն, գլոմերուլոնեֆրիտ,

հոգե-հուզական խանգարումներ, դեպրեսիա, սթրես,

սրտանոթային համակարգի և շնչառական օրգանների հիվանդություններ,

ուռուցքաբանական հիվանդություններ,

ալերգիկ ռեակցիաներ,

էնդոկրին համակարգի և լյարդի հիվանդություններ։

Երբեմն կապտուկներն ու աչքերի տակ այտուցները դառնում են սկզբնական հիվանդության առաջին նշաններից մեկը, ուստի չպետք է դրանք անտեսել կամ վերագրել սովորական հոգնածությանը: Եթե ​​կարծում եք, որ դա հոգնածություն է, պարզապես հանգստացեք և տեսեք, թե արդյոք այս ախտանիշները անհետանո՞ւմ են: Եթե ​​այտուցը չի անհետանում, պետք է դիմել բժշկի՝ հետազոտության։