Ի՞նչ պետք է իմանալ հայտարարագիր լրացնելու մասին

Մաքսային բարեփոխման արդյունքում, ֆիզիկական անձանց ոչ անձնական օգտագործման ապրանքների համար հայտարարագիր կարող են լրացնել ոչ միայն ֆիզիկական անձը կամ մաքսային միջնորդը, այլ դա կարող է անել նաև մաքսային մարմինն՝ առցանց և անվճար:

Մաքսային մարմնի կողմից հայտարարագիր լրացնելու համար պետք է կատարել հետևյալ քայլերը.

Քայլ 1

Պետք է փոխադրող ընկերության կողմից տրամադրված էլեկրտոնային փոստի հասցեին ուղարկել նույնականացման քարտի երկկողմանի լուսանկարը կամ անձնագրի հիմնական էջերի լուսանկարները, գրանցման հասցեն և բջջային հեռախոսահամարը:

Քայլ 2

Անհրաժեշտ է [email protected] էլեկտրոնային փոստի հասցեին ուղարկել դիմում՝ www.trade.gov.am հարթակում գրանցվելու համար օգտանուն և գաղտնաբառ ստանալու վերաբերյալ:

Քայլ 3

Պետք է [email protected] էլեկտրոնային փոստի հասցեին ուղարկել դիմում («Հայփոստ»-ի դեպքում՝ [email protected] հասցեին)՝ ֆիզանձի փոխարեն մաքսային մարմնի կողմից ապրանքների հայտարարագիր լրացնելու համար։

Այս քայլերը ճիշտ կատարելուց հետո՝ 5 աշխատանքային օրվա ընթացքում, Մաքսային մարմնի կողմից կլրացվի հայտարարագիրը և այն կուղարկվի ֆիզանձին: Ներկայացված տեղեկությունների ու փաստաթղթերի թերի լինելու դեպքում՝ դրանք էլեկտրոնային փոստի միջոցով կվերադարձվեն հետ, որտեղ նշված կլինի վերադարձման պատճառն ու անհրաժեշտ լրացուցիչ տեղեկությունների ցանկը։Հայտարարագիրը ստանալուց հետո՝ 3 աշխատանքային օրվա ընթացքում, պետք է վավերացնել այն՝ էլեկտրոնային կամ ձեռքով ստորագրությամբ և էլեկտրոնային փոստի միջոցով տրամադրել մաքսային ծառայողին։

Ապրանքների հայտարարագիրը վավերացնելու համար նախ և առաջ պետք է մուտք գործել www.trade.gov.am հարթակ, ընտրել «Ապրանքների հայտարարագիր» բաժինը և լրացնել ապրանքների հայտարարագրի հերթական համարը, այնուհետև սեղմել «Որոնել» կոճակը, ընտրել հայտարարագիրը և տպել այն, որից հետո հայտարարագրի 54-րդ դաշտում ստորագրել ձեռքով կամ դնել էլեկտրոնային ստորագրություն։

Առաջացած մաքսային վճարները, հարկերը և տուրքերը ֆիզանձը կարող է վճարել ցանկացած բանկի, դրա բջջային հավելվածի կամ վճարային տերմինալների միջոցով՝ փոխանցում կատարելով և պարտադիր նշելով 90 կոդը: Կարելի է վճարումը կատարել նաև առցանց եղանակով: Նշված գործողությունները ճիշտ կատարելու դեպքում մաքսային մարմնի կողմից կիրականացվեն համապատասխան մաքսային գործառնություններ, և ֆիզանձը կարող է ապրանքներն ստանալ առաքանիներ փոխադրող ընկերությունից: