Ադրբեջանին հանձնած զենքով թող պահեին ԼՂ-ն. Հայաստանում Ղարաբաղ չկա, որ, դրոշը ծածանելով, ուզում են. Արա Խուդավերդյան

Երկրապահ կամավորական միության հիմնադիր անդամ, «Կոռնիձոր» ջոկատի հրամանատար Արա Խուդավերդյանի խոսքով՝ ընդդիմության ներկայացուցիչների և Լեռնային Ղարաբաղի լուծարման հրամանագիրը ստորագրած Սամվել Շահրամանյանի՝ վերջին շրջանում արած հայտարարությունները հատուկ նպատակ են հետապնդում: Խուդավերդյանը կարծում է, որ նրանք պատվեր են կատարում, որը հրահանգել է Ռուսաստանը:

«Ի՞նչ են ասում․ «Ես կծախեմ, ես կուտեմ, կթալանեմ, կբնաջնջեմ, կլուծարեմ Ղարաբաղը, Եվլախում ծնկի կգամ, կորոշեմ մի ամբողջ էթնիկ ժողովրդի ճակատագիրը, բայց միշտ մատնացույց կանեմ Հայոց պետականությունն ու Հայաստանի իշխանություններին, կասեմ՝ իրենք են մեղավոր»։ Այս բոլորը Ռուսաստանից եկած պատվեր է, կարելի է կապել նաև պանթուրքիզմի հետ, քանի որ արանքում դրված է ՀՀ պետականության ոչնչացման խնդիրը։ Մի քանի օր է՝ դաշտում տեսնում ենք թափառող կարկառուն դեմքերին, որոնք պատրաստ են հոշոտելու Հայաստանը և կեղծ ինֆորմացիայով բթացնելու ժողովրդին»,- «Հայկական ժամանակ»-ի հետ զրույցում ասում է նա։

Վերջինիս խոսքով՝ թե՛ ընդդիմությունը, թե՛ Շահրամանյանը նպատակ ունեն Հայաստանն էլ վերածելու «Անիի ավերակների»․ «Ավերեն ՀՀ իշխանությանը, վերացնեն նրա առաջնորդին՝ Նիկոլ Փաշինյանին: Այսինքն՝ բազմաբնույթ ագենտուրան, ենթարկվելով Ռուսաստանին, ուզում է քանդել Հայաստանը՝ դրա դիմաց ունենալով միլիոնավոր դոլարի փշրանքներ»։

Անդրադառնալով Սամվել Շահրամանյանի այն հայտարարությանը, թե Լեռնային Ղարաբաղի լուծարման վերաբերյալ իր ստորագրած փաստաթուղթը իրավական ակտ չունի և հակաօրինական է՝ Խուդավերդյանը նկատում է՝ «դա հորինված ստերի հերթական շարանն է, որը բնորոշ է թե՛ ԼՂ ներկայացուցիչներին, թե՛ ընդդիմությանը»։

«Թող հարց տան իրենց՝ մինչ փաստաթղթի ստորագրումը ղարաբաղյան ռազմաքաղաքական իշխանություններն ինչպիսի բարոյահոգեբանական դրսևորում են ցուցաբերել, որպեսզի մենք հաղթանակ տանենք։ Հակառակը՝ լրացրին մեկը մյուսին, ծափահարություններ հնչեցրին Եվլախում, 20 ձայնով ընտրված մենեջերը 10 օրում հանձնեց Ղարաբաղը, փակել տվեց Լաչինի միջանցքը, որ Հայաստանից օգնություն չհասնի, Ղարաբաղի համար չկռվեցին, դիրքերում կանգնած զինվորի հետ կապը կորցրին, հիմա էլ հասել են Հայաստան ու Ղարաբաղ են փրկում։ Թող այն զենքով, որը հանձնեցին Ադրբեջանին, փրկեին ԼՂ-ն մարտի դաշտում, ոչ թե այստեղ Ղարաբաղ ուզեն, Հայաստանում Ղարաբաղ չեն ուզում ու դրոշն էլ չեն ծածանում»,- ասում է նա։

Զրուցակիցը կարծում է, որ Հայաստանի ընդդիմությունից և ԼՂ որոշ ներկայացուցիչներից կարելի է սպասել ամեն ինչ։ Ըստ նրա՝ վերջիններիս ներկայությունը Հայաստանում խարխլում է ՀՀ անվտանգությունը․ «Իրենցից պետք է ամենավատից վատը սպասել։ Հիմա էլ սինխրոն գործում են Ռուսաստանի, Ադրբեջանի հետ ու կրակի վրա բենզին են լցնում զախարովաների, լավրովների, լուկաշենկոների միջոցով։ Նպատակ ունեն Հայաստանը դարձնել խոցելի, թուլացնել տարածքները, որպեսզի այստեղ էլ 10 ձայնով նորից մենեջեր ընտրեն, ու նա էլ անի իր գործը»։

Մանրամասները՝ սկզբնաղբյուրում։