Փրկարար ծառայության աշխատակիցների երեխաները մեկնեցին «Եռասերունդ Երկրապահ» ուսումնառազմական ճամբար

Ներքին գործերի նախարարության և Երկրապահ կամավորականների միության վարչության հետ համատեղ ծրագրով նախատեսված հուլիսի 20-ից օգոստոսի 25-ը Փրկարար ծառայության ենթակա ստորաբաժանումների աշխատակիցների երեխաներն իրենց ամառային հանգիստը կանցկացնեն «Եռասերունդ Երկրապահ» ուսումնառազմական ճամբարում, տեղեկացնում են ՀՀ ՆԳՆ փրկարար ծառայությունից։

«8-ից 15 տարեկան երեխաներին հնարավորություն է ընձեռված ամառային արձակուրդը վայելել Գեղարքունիքի մարզի հրաշալի բնության գրկում: Ճամբարի օրակարգում ընդգրկված են ինչպես ուսումնամարզական, այնպես էլ հանգստի ժամեր։ Երեխաների բուռն և հագեցած օրերը կզուգակցվեն արշավներով, տարբեր ճամբարականների հետ հանդիպումներով:

Վաղ առավոտից Փրկարար ծառայության շարահրապարակում հավաքված պատանիներն անհամբերությամբ շտապում էին հասնել ճամբար՝ մասնակցելու ուսումնառազմական և հանգստի համալիրում անցկացվող ճամբարային հավաքներին:

Պատանի ճամբարականների առաջին խմբին շարահրապարակից ճանապարհեց Փրկարար ծառայության տնօրենի պարտականությունները ժամանակավոր կատարող, փ/ծ գնդապետ Ե. Կարապետյանը՝ մաղթելով վերջիններիս ուրախ, միևնույն ժամանակ ուսումնառատ հանգիստ:

Ծնողները ևս մեծ ոգևորությամբ ճանապարհեցին երեխաներին, վստահ լինելով, որ նմանատիպ նախաձեռնության շնորհիվ երեխաները ոչ միայն կծանոթանան իրենց հասակակից երկրապահների հետ և կվայելեն ամառային հանգիստը, այլև ձեռք կբերեն ռազմական գիտելիքներ»,-նշված է հաղորդագրության մեջ: