Ես և Քրիստինե Պեպելյանն ընկերուհիներ չենք. Անահիտ Շահբազյանն՝ իր հասցեին հնչող քննադատությունների մասին

«Հայաստանի ձայնը» նախագծի մասնակից Անահիտ Շահբազյանն ամենաշատն է քննարկվում` միմյանց հակասող կարծիքներ և մեկնաբանություններ: Operativ.am-ի թղթակցի հետ զրույցում Անահիտը պատասխանեց վերջին շրջանում իր անվան շուրջ պտտվող մի շարք հարցերի:

-Անահիտ, ինչո՞ւ որոշեցիք մասնակցել «Հայաստանի ձայնը» նախագծին: Շատ է քննարկվում այն փաստը, որ դուք արդեն հայտնի և մեծ բեմերում երգելու փորձ ունեցող երգչուհի եք:

-«Հայաստանի ձայնը» մրցույթին մասնակցում են ինչպես սկսնակ, այնպես էլ երգելու փորձ ունեցող երգիչներ: Եթե որոշ մարդիկ ինձ տեսել են տարբեր համերգներում՝ որպես սկսնակ երգիչ, դա պատճառ չէ, որ ես հրաժարվեի այս նախագծից: Ես ինձ հայտնի չեմ համարում: Եթե ես լինեի այդքան հայտնի, Արմենիա հեռուստաընկերությունն ինքը թույլ չէր տա, որ ես մասնակցեի մրցույթին: Ես կարող էի երգել որպես հյուր, մրցույթից դուրս: Այո, ես շատ-շատ մրցույթների եմ մասնակցել, ունեմ բազմաթիվ մրցանակներ, բայց դրա մասին քիչ մարդ գիտի, քիչ է լուսաբանվել, այդ ամենն ինձ ճանաչում չի բերել, սա ուղղակի շատ լավ միջոց էր իմ մասին բարձրաձայնելու, որ կա այսպիս մարդ: Ես չեմ եկել հաղթելու, ապացուցելու, մրցելու սկսնակների հետ: Նախագծում կան մասնակիցներ, ովքեր նույնչափ, նույնիսկ ավելի շատ են եղել մեծ բեմերում, մասնակցել են տարբեր նախագծերի, տեսահոլովակներ ունեն, բայց նրանց անունն այնքան չշոշափվեց, որքան իմը: : Շատ դեպքերում գրում են վատ մեկնաբանություններ, վատ ինֆորմիացիա է պտտվում իմ շուրջ: Ես չեմ հասկանում, թե ինչու:

-Միգուցե պատճառը Քրիստինե Պեպելյանի և Ձեր հարաբերություննե՞րն են: Այս հարցը ևս շատ քննարկվեց: Դուք իսկապե՞ս մտերիմ ընկերուհիներ եք:

- Չգիտեմ՝ որտեղից են այդ լուրերը: Ես Քրիստինեի ընկերուհին չեմ, ես շատ երջանիկ կլինեի Քրիստինե Պեպելյանի ընկերուհին լինել, որովհետև ինքն իսկապես շատ բարի, արտակարգ մարդ է, բայց մենք ընկերուհիներ չենք: Ես Քրիստինեի հետ ծանոթացել եմ ընդամենը 1 տարի առաջ` Հայկոյի ստուդիայում, երբ ես և էլի մի քանի երգիչներ առաջարկ էինք ստացել նրա երգի մեջ աշխատելու, ապա` 2 ամիս անց, առաջարկ ստացա  իր մենահամերգին որպես բեք-ոկալ աշխատել:

- Ձեր ելույթից հետո Քրիստինե Պեպելյանը շատ բուռն արձագանքեց, դա էլ նման խոսակցության առիթ դարձավ:

-Բան չունեմ ասելու, երբ ես վերջացրի երգս, ինքը դուրս եկավ, ինձ գրկեց, դա ինձ համար ամեն ինչից առավել էր, բայց դա մարդիկ սխալ ընկալեցին և խոսակցության տեղիք տվեց:  Ուզում եմ նորից ասել` մենք ընկերներ չենք, այո' մենք միասին միևնույն բեմահարթակում ենք եղել, միասին աշխատել ենք, որ մենահամերգը հրաշալի անցնի, իհարկե իրար սիրում ենք, հրաշալի զգում ենք, բայց ընկերություն չկա, նա իմ մարզիչն է, իմ ավագ ընկերն է, այս պահին ինձ մեծ ուժ տվող ամենաթանկ մարդը:

- Անահիտ, իսկ Ձեր ընտրությունն ինչո՞վ էր պայմանավորված, ինչո՞ւ հենց Քրիստինե Պեպելյանին ընտրեցիք: Այս առումով էլ տարբեր մեկնաբանություններ հնչեցին:

-Շուշան Պետրոսյանին ճանաչում եմ 2008 թ., որտեղ նա ինձ մրցանակ տվեց, շատ համերգներում միասին երգել ենք, տարբեր ջազ համերգներին նույն բեմում ենք եղել, իմ սիրելի Շուշան Պետրոսյանն ինձ այնքան դրական խոսքեր ասաց ելույթից հետո,  որ ես վստահ կարող էի լինել, որ կհայտնվեի ֆինալում: Հայկոյին շատ սիրում եմ, Անահիտ Սիմոնյանն իմ ընկերուհին է: Այսինքն ում էլ ընտրեի, խոսակցություններ լինելու էին: Միայն Միքայել Պողոսյանի դեպքում հնարավոր է՝ չխոսեին, ամեն դեպքում դա իմ ընտրությունն է, ես չեմ հասկանում՝ ինչու պետք է բացատրություն տամ, ինչու են մարդիկ այդ մասին խոսում: Ես ընդհանրապես չեմ զղջում իմ ընտրության համար: Քրիստինեից այնքան ուժ եմ ստանում, ինչը ինձ պակասում է, այնպես ենք իրար հասկանում, ես ինձ այդ թիմում շատ լավ եմ զգում: 

-Անահի'տ, ելույթներից հետո հնչող քննադատություններին ինչպե՞ս եք վերաբերվում:

- Սա մրցույթ է, յուրաքանչյուրը կարող է ունենալ իր ֆավորիտը, փորձում եմ մի փոքր սառնասրտորեն մոտենալ, ես հասկանում եմ, որ կան մարդիկ, ում ֆավորիտը ես չեմ: 

-Ձեզ տեսնո՞ւմ եք  «Հայաստանի ձայնը» նախագծի հաղթող:

- Բոլորին, ովքեր հիմա կան նախագծում կարող են տեսնել «Հայաստանի ձայնը» նախագծի հաղթող, հարցն այն է, որ մեզանից յուրաքանչյուրը պետք է կարողանա ուժերը հավաքել և լավ ելույթ ունենալ: Կարծում եմ, որ ճիշտ կլինի հաղթող լինի որևէ սկսնակ մեկը: Ժյուրին անաչառ է, ես գիտեմ, որ եթե ես լինեմ, էլ ավելի խոսակցություններ կլինեն, բացի այդ ըստ քվեարկության, ես տեսնում եմ, որ հաղթողի դերում չեմ, ու ինքս էլ ինձ հաղթողի դերում չեմ տեսնում:

զրուցեց Գայանե Շահինյանը