Կինոարդյունաբերությունը բացասաբար է ազդում շրջակա միջավայրի վրա. Լևոն Ազիզյան

Շրջակա միջավայրի նախարարության Հիդրոօդերևութաբանության և մոնիթորինգի կենտրոնի տնօրեն Լևոն Ազիզյանը ֆեյսբուքյան իր էջում գրել է.

«Կինոարդյունաբերությունը բացասաբար է ազդում շրջակա միջավայրի վրա:

Արդյունաբերության շատ ոլորտներ ազդում են բնության վրա, և կինոարտադրությունը բացառություն չէ: Ոչ բոլոր ստուդիաներն ունեն բնապահպան, ով երաշխավորում է, որ նկարահանումները չվնասեն շրջակա միջավայրին: Plus-one հրատարակությունը խոսել է բնության համար բացասական հետևանքների մասին, որոնք առաջանում են ֆիլմեր ստեղծելիս և ցուցադրելիս։

Համաձայն Կայուն արտադրական դաշինքի (SPA) (աշխարհի առաջատար կինո, հեռուստատեսային և ստրիմինգային ընկերությունների համագործակցությունն է, որի նպատակն է արագացնել զվարճանքի բիզնեսի վերածումը ավելի կայուն արդյունաբերության), մեկ օրվա ընթացքում լիամետրաժ ֆիլմի նկարահանման ժամանակ մոտ 33 տոննա ածխածնի երկօքսիդ (CO2) է արտանետվում դեպի մթնոլորտ։ Ֆիլմի արտադրությունը տևում է միջինը մեկից երեք ամիս, որի ընթացքում արտանետումները կարող են գերազանցել 3000 տոննան: Բրիտանական կինոյի ինստիտուտի (BFI) տվյալներով՝ CO2-ի արտանետումների մոտ 50%-ը գալիս է տրանսպորտից (30%-ը՝ օդային թռիչքների և 70%-ը՝ ցամաքային փոխադրումներից), 34%-ը՝ էլեկտրաէներգիայից և գազից, 15%-ը՝ դիզելային գեներատորներից։

Ածխածնի երկօքսիդի արտանետումները կինոարդյունաբերության կողմից շրջակա միջավայրին հասցվող վնասի միակ տեսակը չէ: Դեկորացիաներ, պլաստմասե ամաններ և շշեր, կոստյումներ. հաճախ այս ամենը նկարահանման ավարտից անմիջապես հետո հայտնվում է աղբավայրում, որտեղ տասնամյակներ շարունակ քայքայվում են: Տեսանյութերի դիտումը նաև արագացնում է գլոբալ տաքացումը. ստրիմինգային (երբ առցանց տեսանյութը հեռարձակվում է ինտերնետով իրական ժամանակում) ծառայությունները կազմում են CO2 արտանետումների 0,3%-ը, ինչը համեմատելի է
Չիլիի չափ երկրի ածխածնի արտանետման հետ:

Վերջին տարիներին կինոարտադրողները փորձում են նվազեցնել շրջակա միջավայրի վրա իրենց ազդեցությունը: Այսպես, Netflix-ը սկսել է օգտագործել էլեկտրական մեքենաներ ֆիլմերի նկարահանումների վրա, իսկ դիզելային գեներատորները փոխարինել է ջրածնային վառելիքի միավորներով: Բնության պահպանման համար պայքարին է միացել նաեւ WarnerMedia մեդիա հոլդինգը՝ այն օգտագործում է LED լամպեր։ Նաև փորձում է գնել երկրորդային հումքից ստացված թուղթ և արտադրության մնացորդները կոմպոստացնել: