ԲՏԱ նախարարն այցելել է «Սինոփսիս Արմենիա». ընդգծվել է տեխնոլոգիական ոլորտի բարձրակարգ մասնագետներ պատրաստելու անհրաժեշտությունը
![](/timthumb.php?src=disc/04-03-24/b48a2907153b8139ac3ff1b92e1457b7.jpg&w=450)
ՀՀ ԲՏԱ նախարար Մխիթար Հայրապետյանն այցելել է «Սինոփսիս Արմենիա» ընկերություն, ծանոթացել ընկերության գործունեությանը, արձանագրված հաջողություններին և ձեռքբերումներին: Այդ մասին նա տեղեկացրել է ֆեյսբուքյան իր էջում:
«Շրջայց եմ կատարել ընկերության Ուսումնական դեպարտամենտում տեղակայված լսարաններում, զրուցել ուսանողների հետ, կարևորել նոր գաղափարների ու մոտեցումների կիրառումն արտադրական գործընթացներում:
Ընկերության նախագահ Երվանդ Զորյանը և Ուսումնական դեպարտամենտի տնօրեն Վազգեն Մելիքյանը մանրամասներ են ներկայացրել իրականացվող կրթական ծրագրերի վերաբերյալ, մասնավորապես, խոսել ենք «Արտադրություն-ԲՈՒՀ» համագործակցության կրթական մոդելով իրականացվող ծրագրի մասին։
Հանդիպման ընթացքում ընդգծվել է Հայաստանի տեխնոլոգիական ոլորտի համար բարձրակարգ մասնագետներ պատրաստելու անհրաժեշտությունը»,- գրել է նա։