Ուտեստների ցուցադրությունից և թատերական ներկայացումից մինչև լարախաղաց և ռոք համերգ․ «Թումո Գյումրի»-ն նշում է Բարեկենդանը
![](/timthumb.php?src=disc/11-02-24/765cc42f333eeeb70999802fcda2155d.jpg&w=450)
Ուտեստների ցուցադրությունից և թատերական ներկայացումից մինչև լարախաղաց և ռոք համերգ՝ հենց այսպես է փետրվարի 11-ին «Թումո Գյումրի»-ն նշում Բարեկենդանը։
Ինչպես տեղեկացնում է «Արմենպրես»-ը, ավանդույթի համաձայն՝ ազգայինը պահելու ու տարածելու կարևոր նպատակով «Թումո» ստեղծարար տեխնոլոգիաների կենտրոնն օրը վերածում է տոնակատարության. միջոցառումը ոչ միայն հետաքրքիր է, այն նաև ուսուցողական է տարբեր տարիքի մարդկանց համար, քանի որ տարբեր աշխատարաններում տարիքային սահմանափակում չկա։
«Մենք շատ ենք կարևորում ու արժեւորում մեր մշակույթն ու ավանդույթները։ Այս տոնի համար արդեն բավական մեծ պորտֆոլիո ունենք՝ սա «Թումո» ստեղծարար տեխնոլոգիաների կենտրոնի կողմից կազմակերպվող արդեն 4-րդ Բարեկենդանն է. նշել ենք Երևանում, Գյումրիում, Դիլիջանում, Ստեփանակերտում։ Շատ ենք կարևորում կրթական էլեմենտը։ Այս տարի տոնը կրկին որոշեցինք անել Գյումրիում։ Կարծում ենք՝ Գյումրուն տոնը շատ է սազում, ու տոնին տվել ենք գյումրվա կոլորիտ՝ բացի դիմակների պատրաստման աշխատարանից, ունեցանք նաև Գյումրուն հատուկ «Պանրխաշ»-ի աշխատարան՝ «Գվուգ Գաստրո տան» հետ միասին։ Աշխատարան կար նաև «Մեղր և Բույս»-ի հետ»,- ներկայացնելով միջոցառման առանձնահատկությունները՝ «Արմենպրես»-ին նշեց «Թումո»-ի հաղորդակցման, միջոցառումների և հանրության հետ կապերի բաժնի ղեկավար Զառա Բուդաղյանը։ Նա հավելեց՝ «Թումո»-ն հոգացել է Բարեկենդանի ուտեստների (խաշիլ, փաթիլա, բխբխիկ, Ղարաբաղի փախլավա և այլն) և դրանց բաղադրատոմսերի ցուցադրության մասին ևս։
Օրն ազդարարվեց թատերական ներկայացումով՝ Հենրիկ Մալյանի անվան թատրոնի դերասանների օգնությամբ հանդիսատեսը զգաց թումանյանական շունչը։
«Ինչպես և խոստացել էինք ի սկզբանե, երբ սկսեցինք աշխատել «Թումո Գյումրի»-ին հատկացված շենքի վերականգնման վրա, պետք էր պատմական բեմը քաղաքին վերադարձնել, ու այսօրը ևս դրա ապացույցն էր՝ թատերական ներկայացումը պատմական շենքի նորացված բեմահարաթակին է։ Մուտքն ազատ էր բոլոր ցանկացողների համար»,-հավելեց Զառա Բուդաղյանը։
Ըստ օրվա խորհրդի՝ զուգահեռ աշխատարանների թեման կենդանիների, թեմատիկ դիմակների պատրաստումն էր անսպասելի լուծումներով՝ թղթե տոպրակներից մինչև կտորե գույնզգույն դիմակներ։ Դիմակների ու տիկնիկների պատրաստման գործում թումոյականներին աջակցեց Հենրիկ Իգիթյանի անվան գեղագիտության ազգային կենտրոնի Գյումրու մասնաճյուղը՝ ղեկավար Սուսաննա Մկրտչյանի գլխավորությամբ:
Օրվա ընթացքում Գյումրու կենտրոնական զբոսայգում բացօթյա հանդես էր՝ «Գայլն ու այծը» դիմակահանդես, լարախաղաց, ազգագրական երաժշտություն, խմբակային պարեր, տոնական խաղեր, խարույկ և աղանձի հյուրասիրություն։
Երեկոյան տոնի շրջանակներում ելույթ կունենան «Թումո»-ի «Զրանգի» և «Կանգառ» բենդերը: