Գիտնականները պարզել են, թե ինչպես են շաքարախտի և Ալցհեյմերի գեները տարածվել բրոնզեդարյան Եվրոպայում

Գիտնականների միջազգային թիմն ավարտել է Եվրոպայի և Ասիայի հնագույն բնակիչների 5 հազար գենոմների աշխարհի ամենամեծ տվյալների հավաքածուի վերլուծությունը: Հետազոտությունը աննախադեպ մանրամասնությամբ բացահայտել է Արևմտյան Եվրասիայի նախապատմական մարդու գենոֆոնդները: Չորս հոդված՝ կատարված աշխատանքի վերաբերյալ հիմնական եզրակացություններով, տպագրվել է Nature գիտական ​​ամսագրում։

Լայնածավալ նախագծին մասնակցել են 175 հետազոտողներ Մեծ Բրիտանիայի, ԱՄՆ-ի, Գերմանիայի, Ավստրալիայի, Շվեդիայի, Դանիայի, Նորվեգիայի, Ֆրանսիայի, Լեհաստանի, Շվեյցարիայի, Հայաստանի, Ուկրաինայի, Ռուսաստանի, Ղազախստանի և Իտալիայի համալսարաններից և թանգարաններից: Նրանք աշխատել են Կոպենհագենի համալսարանի փորձագետների ղեկավարությամբ։ Նախաձեռնությունը համախմբել է հնագիտության, էվոլյուցիոն կենսաբանության, բժշկության, հնագույն ԴՆԹ-ի հետազոտության, վարակիչ հիվանդությունների և համաճարակաբանության մասնագետների։

Մասնավորապես, գիտնականները կարողացել են քարտեզագրել գեների շարժը մի քանի հիվանդությունների համար, այդ թվում՝ 2-րդ տիպի շաքարախտի և Ալցհեյմերի հիվանդության՝ ավելի քան 5 հազար տարի առաջ Եվրասիայում բնակչության միգրացիայի արդյունքում։

Հետազոտողները նաև գտել են նոր գիտական ​​ապացույցներ, որոնք բացատրում են, թե ինչու մարդկանց վերաբնակեցման արդյունքում Սկանդինավիայում ցրված սկլերոզի տարածվածությունը երկու անգամ ավելի բարձր էր, քան հարավային Եվրոպայում:

Հնագույն եվրասիական տվյալների բազան վերակառուցվել է ոսկորների և ատամների վերլուծության միջոցով: Նմուշների տարիքը տատանվում էր մեզոլիթից մինչև բրոնզի և երկաթի դարեր, վիկինգների ժամանակաշրջան և միջնադար:

Աշխատանքի մասնակիցների խոսքով՝ հավաքված գենետիկական տեղեկատվությունը, քանի որ այն մշակվում է, հասանելի կդառնա բոլոր գիտնականներին և կծառայի նոր բացահայտումների, փոխանցում է shantnews.am-ը։