«Պետք է օգտագործել առկա մեծ ներուժը»․ ԵՊՀ Արևելագիտության ֆակուլտետի շրջանավարտները միություն են հիմնել

ԵՊՀ Արևելագիտության ֆակուլտետի՝ նախորդ տասնամյակների շրջանավարտներն իրենց փորձն ու ներուժը մեկտեղելու և այն Հայաստանի կրթության ու գիտության ոլորտում առկա խնդիրների լուծմանն ուղղելու նպատակով հիմնել են Հայաստանի արևելագետների միությունը («Ex Oriente»):

Այսօր հրավիրված մամուլի ասուլիսում միության հիմնադիր անդամ Արսեն Գասպարյանը նշեց, որ Խորհրդային միության տարիներին ֆակուլտետն արևելագիտության լավագույն դպրոցներից էր, այդ թվում՝ Արևելյան Եվրոպայում, որտեղ ունիվերսալ կադրեր էին պատրաստվում։ Հաշվի առնելով տարբեր տարիների շրջանավարտների ունեցած փորձը, կապերն ու հնարավորությունները՝ որոշել են նրանց մի տանիքի տակ մեկտեղել՝ առկա ներուժն օգտագործելու համար։

«Մեր ֆակուլտետի շրջանավարտները կանգնած են եղել պետականաշինության ակունքներում։ Եթե նայենք ԱԳՆ-ում, ապա արցախյան երկրորդ պատերազմից հետո մեր դիվանագետներից շատերը դուրս եկան ԱԳՆ-ից, որոնք 25-30 տարվա փորձ ունեին։ Մենք չէինք ունեցել դիվանագիտական ավանդույթ ՀՀ-ում հայտնի պատճառով, և մեր ավանդույթները 25-30 տարի էր՝ 1991-92-ից աշխատած այն դիվանագետներն էին, որոնք ատաշեից ծառայեցին մինչև արտակարգ և լիազոր դեսպան։ Այդ փորձը կա, գիտելիքը կա, արևելագետներից շատերը նույնպես սովորել են աշխարհի լավագույն համալսարաններում և վերադարձել ՀՀ։ Կարծում եմ՝ այդ բոլորի ներուժը մենք կարող ենք օգտագործել։ Գրեթե բոլոր բնագավառներում ունենք խնդիրներ՝ հատկապես ամենամեծ խնդիրները կրթության ու գիտության ոլորտում են։ Հետևաբար մեր երկրին պետք է նոր լուսավորչական շարժում, որը քաղաքական միտք կձևավորի ՀՀ-ում։ Հայաստանում Խորհրդային Միության փլուզումից հետո հանրային դիվանագիտություն չի եղել, հիմա ժամանակն է ուղղել այդ սխալը, չնայած որ դա պետության գործն է»,- շեշտեց Գասպարյանը։

Արևելագետների միությունում գործում է երկու կառույց՝ Միջազգային հարաբերությունների ուսանողական խորհուրդը և Քաղաքացիական դիվանագիտության նախաձեռնությունը։ Միության համահիմնադիր Զարմինե Զեյթունցյանը նկատում է՝ տարիներ շարունակ փորձեր են արվում կառուցելու կամ վերակառուցելու մեր ազգային կերպարը` համաշխարհային հանրությանը մեկ ընդհանուր դիմագծով ներկայանալու համար, բայց դա կարծես թե դեռ չի ստացվում։

«Քաղաքացիական դիվանագիտությունը համակարգված և միասնական հանրային կարծիքի վրա ձևավորման գործիք է ներքին և միջազգային հանրության համար։ Այս նախաձեռնության շրջանակներում փորձելու են բարելավվել Հայաստանի և հայ ժողովրդի մասին ընկալումներն ու ըմբռնումները Կովկասի, Մերձավոր Արևելքի և Հարավային Ասիայի երկրների հանրության շրջանում»,- նշեց Զեյթունցյանը։

Միության համահիմնադիր Արթուր Խաչիկյանը նշեց, որ Միջազգային հարաբերությունների ուսանողական խորհուրդի նպատակն է միավորել Հայաստանի բոլոր բուհերի ուսանողներին, որոնք մասնագիտանում են միջազգային անվտանգության բնագավառում։

«Նրանց հնարավորություն կտրվի ներկայացնել իրենց աշխատանքները, որոնք կանցնեն որոշ մրցակցություն, որից հետո ուսանողները հնարավորություն կունենան դրանք ներկայացնելու միմյանց և դասախոսներին, հետագայում կդրվի դրանց հրատարակման հարցը։ Դա թույլ կտա ավելի պրոֆեսիոնալ, վերլուծական ձևով մոտենալ միջազգային անվտանգության խնդիրներին, որպեսզի ձևավորվի փորձագետների էլիտա, որոնք կկարողանան ճիշտ ձևով դատել ոչ միայն Հայաստանի անցյալի ու պատմության, այլև ներկայի ու ապագայի մասին։ Նրանք պետք է կարողանան տեսնել, թե ինչ է կատարվում Հայաստանի շուրջ և աշխարհում»,- նշեց Խաչիկյանը։