Մխիթարյանի սիրտն ազա՞տ է

Հայաստանի ազգային հավաքականի և Դոնեցկի «Շախտյորի» կիսապաշտպան Հենրիխ Մխիթարյանի հարցազրույցը տեղ է գտել «Շախտյորի» ամսագրում: Ձեր ուշադրությանն ենք ներկայացնում այն հատվածը, որը ներկայացրել է թիմի պաշտոնական կայքը: 

-Զգո՞ւմ ես, որ ֆուտբոլիստների կողմից հարգանք ես վայելում, գնալով էլ ավելի ես հայտնի դառնում, թիմում ձայնի իրավունք ունե՞ս:

-Ձայնի իրավունք առայժմ չունեմ, որովհետև թիմում կան ֆուտբոլիստներ, որոնք ինձնից առաջ են: Մենք ավագ ունենք և ավագին փոխարինող, որոնք ձայնի իրավունք ունեն: Ես կարող եմ դաշտում անել իմ աշխատանքը: Ահա իմ իրավունքը:

-Ինչպե՞ս ես վերաբերվում այն բանին, որ աղջիկների կողմից սիրված ես դարձել. շատ աղջիկներ քեզ իբրև պոտենցիալ փեսացու են ընկալում և ուզում են ծանոթանալ քեզ հետ:

-Առայժմ ոչ մեկի հետ չեմ ծանոթացել, ոչ ոք չի համապատասխանել (ժպտում է): Իսկ առհասարակ, հաճելի է գտնվել աղջիկների ուշադրության կենտրոնում:

-Այդուամենայնիվ դու շարունակում ես ապրել բազայի հաշվին և այնտեղից քիչ ես դուրս գալիս…

-Դե ինչո՞ւ: Երբեմն դուրս եմ գալիս: Ուղղակի ես գիտեմ, որ ինչի համար եմ մարզվում, ինչի համար եմ խաղում: Չեմ բացառում, որ կարելի է համատեղել մեկը մյուսի հետ: Բայց հիմա, երբ արդեն կուռք եմ դարձել և սկսել եմ շատ գոլեր խփել, ես չեմ ուզում մոռանալ ֆուտբոլի մասին և փոխել ճանապարհս. այն ինձ համար միակն է, և ես պատրաստվում եմ ամեն ինչ համատեղել: