Ախուրյանում իշխանափոխությո՞ւն է սպասվում. ավագանու 3 անդամներ լքել են իշխող թիմը

Շիրակի մարզի Ախուրյան խոշորացված համայնքի ավագանու անդամներ՝ Սամսոն Հովհաննիսյանը, Արիստակես Չալոյանը դիմում են ներկայացրել համայնքապետ Արծրունի Իգիթյանին՝ «Ախուրյան» դաշինքը լքելու մասին: Ավագանու մի անդամ էլ՝ Մանուկ Առաքելյանը, դիմում է ներկայացրել «Հաղթանակ» դաշինքը լքելու մասին:

NEWS.am-ի հետ զրույցում համայնքապետ ասաց, որ ավագանու 3 անդամները ցանկություն են հայտնել մնալ ավագանու անկախ անդամներ։

Նշենք, որ Ախուրյանում իշխանությունը ձևավորվել է «Հաղթանակ» և «Ախուրյան» դաշինքների կոալիցիայով: Արծրուն Իգիթյանը 14 ձայն էր ստացել, «Քաղաքացիական պայմանագիր» կուսակցության թեկնածու Ալբերտ Այվազյանը՝ 13 ձայն։

Արծրունի Իգիթյանի խոսքով՝ «Քաղաքացիական պայմանագիր» կուսակցությունն այժմ զբաղված է ավագանու անդամեր «փախցնելու» գործով:

«Ընտրված օրվանից ՔՊ-ն մշտապես ջանք ու եռանդ չի խնայել՝ ավագանու անդամեր փախցնելու համար: Համայնքում լարվածությունը ՔՊ-ն է ստեղծում, մարզպետը և ՔՊ-ական պատգամավոր Կարեն Սարուխանյանը: Նրանք չեն կարողանում հանդուրժել այլ կարծիք, այլ խմբակցության: Նրանք չեն հանդուրժում նույնիսկ ժողովրդի կամքն ու ընտրությունը: Իրենք ուզում են, որ իրենց կամակատարը լինի ղեկավար, ես էլ իրենց չեմ ենթարկվում, իրենց մարդը չեմ դրանից էլ իրենց դուրը չեմ գալիս: Նրանք ամեն ինչ անում են, որ ինձնից ազատվեն: Փորձում են նիստերը տապալել, որ նոր ընտրությունների գնանք. ես և մեր կոալիցիան պատրաստ է նոր ընտրության, սակայն նրանք գնահատելով իրենց ուժերը, հիմա էլ գնում են այլ ճանապարհով՝ ավագանու անդամներին ճնշումներով հանում են մեր խմբակցությունից»,- ասաց Արծրունի Իգիթյանը:

Անդրադառնալով ՔՊ-ական պատգամավոր Կարեն Սարուխանյանի այն հայտարարությանը, որ Ախուրյանում ստեղծվել է ոչ կառուցողական և անառողջ մթնոլորտ, և, որ իրենց թեկնածուն՝ Զավեն Մանուկյանը, կարող է հասնել Ախուրյան խոշորացված համայնքի համաչափ և դինամիկ զարգացմանը, Ախուրյանի համայնքապետն ասաց. «Կարեն Սարուխանյանին խորհուրդ եմ տալիս՝ իր պարտականությունները կատարի: Այսքան ժանանակ Ազգային ժողովում մարզին վերաբերող ոչ մի լուրջ հարցով ելույթ չի ունեցել, օրենսդրական որևէ նախաձեռնությամբ հանդես չի եկել: Միայն կադրային հարցերով է զբաղված, թող գործով զբաղվի, ոչ թե այստեղ իշխանափոխություն անի: Մարզում 1 տարի աշխատեց, ի՞նչ արեց մարզի համար, հիմա Ազգային ժողովում է, ի՞նչ է անում այնտեղ»: