Գերագույն դատարանի որոշումից հետո Նեթանյահուն պաշտոնից ազատել է իր գլխավոր դաշնակցին

Գերագույն դատարանի որոշումից հետո Իսրայելի վարչապետ Բենիամին Նեթանյահուն աշխատանքից ազատել է նախարարների կաբինետի առանցքային դաշնակցին՝ այսպիսով խորացնելով դատարանների իշխանության շուրջ տարաձայնությունները, հաղորդում է PA Media-ն:

Նեթանյահուն կառավարության նիստում հայտարարել է ներքին գործերի եւ առողջապահության նախարար Արիեհ Դերիին պաշտոնանկ անելու մասին։ Անցյալ շաբաթ Իսրայելի Գերագույն դատարանը վճռել էր, որ Դերին չի կարող ծառայել որպես նախարար՝ անցյալ տարի հարկային իրավախախտումների համար դատապարտված լինելու պատճառով:

Ծայրահեղ աջ Նեթանյահուի կառավարությունը ցանկանում է թուլացնել Գերագույն դատարանի ազդեցությունը, սահմանափակել դատական ​​վերահսկողությունը եւ ավելի շատ լիազորություններ տալ քաղաքական գործիչներին։

Քննադատներն ասում են, որ այդ քայլը կվերացնի երկրի հակակշիռները եւ կվտանգի Իսրայելի ժողովրդավարական հիմքերը:

Նեթանյահուն Դերիին ասել է, որ ինքն այդ քայլին գնում է «ծանր սրտով եւ մեծ տխրությամբ»։ «Այս դժբախտ որոշումը անտեսում է ժողովրդի կամքը», - ասել է Նեթանյահուն Դերիին․ «Ես մտադիր եմ գտնել ցանկացած օրինական ճանապարհ, որպեսզի դուք շարունակեք ձեր նպաստն ունենալ Իսրայել պետության մեջ»:

Դերին ասել է, որ ինքը կշարունակի ղեկավարել իր կուսակցությունը եւ կօգնի կառավարությանը առաջ մղել իր օրակարգը, ներառյալ իրավական բարեփոխումները:

Սպասվում է, որ Դերիի պաշտոնանկությունը ցնցելու է Նեթանյահուի իշխող կոալիցիան, մի դաշինք, որին աջակցում են ծայրահեղ ազգայնական եւ ծայրահեղ ուղղափառ կուսակցությունները, ներառյալ Դերիի «Շաս»-ը, որը կառավարության երրորդ ամենամեծ կուսակցությունն է:

Աջակողմյան Նեթանյահուի կառավարությունը իր օրակարգի առանցքը դարձրել է երկրի դատական ​​համակարգի բարեփոխումները: Ծրագիրը սուր քննադատության է արժանացել բարձրաստիճան իրավաբանների, արդարադատության համակարգի, նախկին օրենսդիրների եւ տասնյակ հազարավոր իսրայելցիների կողմից, ովքեր բազմիցս բողոքել են:

Տասնյակ հազարավոր իսրայելցիներ նախօրեին կրկին դուրս են եկել Թել Ավիվի փողոցներ։ Վերջին ակցիյի ժամանակ ցուցարարները լցրել են քաղաքի փողոցները՝ բարձրացնելով Իսրայելի դրոշներ եւ «Գերագույն դատարան» ու «Իսրայել, մենք խնդիր ունենք» գրություններով պաստառներ։ Նրանց թվում՝ ընդդիմության առաջնորդ, նախկին վարչապետ Յաիր Լապիդը։

Բողոքի ակցիաներ են անցկացվել նաեւ Երուսաղեմ, Հայֆա եւ Բերշեբա քաղաքներում։

Դերին նախկինում բախվել է իրավական մարտահրավերների: Նա 2000 թվականին երեք տարվա ազատազրկման է դատապարտվել կաշառակերության, խարդախության եւ վստահության խախտման համար՝ 1990-ականներին ներքին գործերի նախարարի պաշտոնը զբաղեցնելիս: Նա 22 ամիս բանտում է անցկացրել, սակայն 2013 թվականին վերադարձել է քաղաքականություն։