Ադրբեջանական ագիտպրոպագանդան անորակ ֆեյք է ստեղծել հայ կնոջ մասին, որը ցանկանում է ադրբեջանական անձնագիր ստանալ

Ադրբեջանական ագիտպրոպագանդան հասել է անորակ ֆեյքերի ստեղծման այնպիսի մակարդակի, որ իրենք էլ չեն հավատում դրան։

Ոգեւորված Ղարաբաղի ժողովրդին ուղղված Ադրբեջանի ղեկավարի երեկվա «ով չի ուզում լինել Ադրբեջանի քաղաքացի, թող կորչի» ոգով հայտարարություններից, մի քանի հատկապես նախանձախնդիր ադրբեջանական լրատվամիջոցներ շտապել են «հաղորդագրություն» հրապարակել «Խանքենդիի հայկական ծագումով բնակչուհու մասին», որն իբր օգնություն է խնդրել ադրբեջանցի ռազմական փորձագետ Ուզեիր Ջաֆարովից YouTube-ի ուղիղ եթերի ժամանակ։

Թե երբ է եղել եթերը, պատմությունը ոչինչ չի ասում, ինչպես նաեւ կեղծ է քարոզչության գլխավոր հերոսի անունը։ «Պարոն գնդապետ Ջաֆարով, ես ծնվել եւ մեծացել եմ Շուշիում։ Հոկտեմբերին (!) այնտեղից մեկնել ենք Խանքենդի։ Ես եւ իմ ընտանիքը ուզում ենք ադրբեջանական անձնագրեր ստանալ։ Որտեղ կարելի է դա անել Խանքենդիում»,- գրել է Լ.Ի․-ն։ Ի պատասխան՝ ադրբեջանցի ռազմական փորձագետը մատնանշել է գործող թեժ գիծը, որտեղ հանգիստ կարելի է դիմել։ Զանգահարողների անանունությունը, ըստ Ջաֆարովի, ապահովվում է։ Ուզեիր Ջաֆարովը, վերադառնալով խայտառակությունից եւ իշխանությունների բարեհաճությունից, նշել է, որ եթե հայերն ընդունեն Ադրբեջանի օրենքները եւ ցանկանան ապրել Ղարաբաղում, ապա նրանց համար կստեղծվեն բոլոր պայմանները։ Ընդհանուր առմամբ, սյուժեն կարծես գովազդային հոլովակ լինի։

Թե՛ Հայաստանում, թե՛ Ադրբեջանում բոլորի համար բացարձակապես պարզ է, որ նման բան չի եղել եւ չէր էլ կարող լինել։ Ֆեյքը նախատեսված է երրորդ կողմերի, միջազգային դիտորդների համար, որոնք այնքան էլ մտահոգված չեն Լեռնային Ղարաբաղի 120 000 բնակչության ճակատագրով, միջազգային կազմակերպությունների բարձրաստիճան աշխատակիցների համար։ Իսկ թե ինչպես են վերաբերվում հայ կանանց Ադրբեջանում, եվրոպացի պաշտոնյաները կարող են ծանոթանալ՝ հետաքրքրվելով 2016-ի ապրիլյան պատերազմի, 2020-ի 44-օրյա պատերազմի, 2022-ի սեպտեմբերյան ագրեսիայի ժամանակ ադրբեջանցի զինվորների սարսափելի հանցագործությունների մասին։