Ռուսաստանին շատ են պետք ե՛ւ Թուրքիան, ե՛ւ Ադրբեջանը. քաղաքագետ

Հայաստանում դաշնակից բառը շատ հաճախ ընկալվում է ինչ-որ հարազատ տարրերի մեջ։ Այս մասին NEWS.am-ի հետ զրույցում ասաց քաղաքագետ Ալեքսանդր Իսկանդարյանը։

Նա պարզաբանեց, որ դաշնակիցն այն երկիրն է, որի հետ քո շահերը համընկնում են տվյալ պահին՝ տվյալ ձեւաչափով։

«Երբ պայմանագիր էր կնքվում, այլ իրավիճակ էր։ Արդեն այն ժամանակ Ռուսաստանի հետ փոխգործակցության լուրջ խնդիր կար։ Բայց ուկրաինական պատերազմի բռնկումից հետո իրավիճակն էլ ավելի բարդացավ, եւ այն նույնը չէ, ինչ 2020 թվականին էր։ Այն, ինչ Ռուսաստանն այժմ գործի է դնում ղարաբաղյան խնդրի ոլորտում, քաղաքական-դիվանագիտական գործիք է։ Այդ գործիքները պակասում են։

Ռուսաստանը գտնվում է բարդ իրավիճակում, Ռուսաստանին շատ են պետք ե՛ւ Թուրքիան, ե՛ւ Ադրբեջանը։ Հայկական կողմից կա լուրջ խնդիր եւ դժգոհություն, որ Ռուսաստանը չի անում, եւ դա բնական է»,-հավելեց փորձագետը։

Նա կոչ արեց փորձել ինչ-որ կերպ փոխել այս իրավիճակը, քանի որ դրա ուղիները տարբեր են։

«Խնդիրներ միշտ եղել են։ Չի կարելի ասել, որ Հայաստանը ՀԱՊԿ-ի հետ փոխգործակցությունում խնդիրներ չի ունեցել Սերժ Սարգսյանի նախագահության օրոք։ Եղել են, անընդհատ առաջացել են։

Այն հայտարարությունը, թե Սերժ Սարգսյան-Վլադիմիր Պուտին հարաբերությունները հրաշալի են եղել, միֆ է։

Խնդիրներ կային, դրանք շատ քիչ էին, բայց դրանք այլ կերպ էին լուծվում։ ԼՂՀ անվտանգությունն ապահովում են ռուսները։ Մյուս կողմից, շատ բան նրանք չեն անում, եւ այստեղ դժգոհություն է առաջանում»,-նշեց Իսկանդարյանը։