Ճապոնիան ցանկանում է, որ G-7-ը միավորվի Չինաստանի «տնտեսական հարկադրանքի» դեմ

Ճապոնիան ցանկանում է, որ G-7-ն այս տարի որդեգրի համակարգված մոտեցում՝ ուղղված «տնտեսական հարկադրանքի» կանխմանը, որը Չինաստանը կիրառում է իր որոշ առեւտրային գործընկերների նկատմամբ, գրում է Bloomberg-ը։

Վերջին տարիներին Չինաստանի ձեռնարկած գործողությունները, ինչպիսիք են թայվանական արքայախնձորների եւ ավստրալական գինու ներմուծման կասեցումը, «ակնհայտ եւ ներկա վտանգ» են ներկայացնում ամբողջ աշխարհի տնտեսությունների համար, Վաշինգտոնում ասել է Ճապոնիայի էկոնոմիկայի եւ առեւտրի նախարար Յասուտոսի Նիսիմուրան: «Մենք ակնկալում ենք, որ այս տարվա G-7-ի գագաթաժողովում տնտեսական հարկադրանքի արդյունավետ պատասխանը լինի գլխավոր խնդիրը»:

Այս տարի Ճապոնիան կգլխավորի G7-ը եւ կհյուրընկալի խմբի գագաթաժողովը: Նիսիմուրան ասել է, որ «հակամիջոցներ» կարող են անհրաժեշտ լինել՝ օգնելու երկրներին եւ տարածաշրջաններին, որոնք թիրախ են դարձել «ավտորիտար ռեժիմների նյութապաշտական գործողությունների համար»: Նրա խոսքով, օգտակար կլինի նաեւ բացահայտել այն խոչընդոտները, որոնք կարող են օգտագործվել նման ռեժիմների կողմից։

Պեկինն, իր հերթին, քննադատել է G7-ի անդամներին Չինաստանի տնտեսության վերականգնումը կանխելու իրենց իսկ պրոտեկցիոնիստական գործողությունների համար: Չինաստանի արտաքին գործերի նախարարությունը նախազգուշացրել է, որ Բայդենի վարչակազմի կողմից կիսահաղորդիչների արտահանման վերահսկողությունը վնաս է հասցնում համաշխարհային տնտեսությանը եւ ամերիկյան բիզնեսին: Անցյալ տարվա վերջին Չինաստանը նաեւ քննադատել է Մեծ Բրիտանիային՝ չիպերի գործարանի հետ գործարքը չեղարկելիս պետական իշխանությունը չարաշահելու համար:

Այնուամենայնիվ, Նիսիմուրան հայտարարել է նման քաղաքականությունը խթանելու իր մտադրության մասին՝ առեւտրի նախարար Ջինա Ռայմոնդոյի հետ հանդիպումից հետո մեկնաբանություններում:

Եթե Ճապոնիան կատարի չիպերի արտադրությամբ զբաղվող տեղական ընկերություններին, այդ թվում՝ Tokyo Electron Ltd.-ին եւ Nikon Corp.-ին սահմանափակելու պլանը, դա Բայդենի վարչակազմի համար մեծ հաղթանակ կլինի իր ավելի ու ավելի ագրեսիվ արշավում, որը թույլ չի տա Չինաստանին ձեռք բերել հիմնական արտասահմանյան տեխնոլոգիաներ:

Ճապոնիայի էկոնոմիկայի նախարարն ասել է, որ ավելի քան երկու տասնամյակ առաջ դեմոկրատական տերությունները սխալ են գործել՝ ենթադրելով, որ Չինաստանի եւ հետագայում Ռուսաստանի՝ Առեւտրի համաշխարհային կազմակերպությանն անդամակցելու միջոցով խորացող տնտեսական փոխկախվածությունը «անշուշտ կհանգեցնի խաղաղության ամբողջ աշխարհում» սառը պատերազմի ավարտից հետո:

Սակայն բարգավաճումը չի նպաստել խաղաղության հաստատմանը, այլ միայն մեծացրել է աշխարհաքաղաքական ռիսկերը, ասել է Նիսիմուրան։ Ավտորիտար կառավարություններն օգտագործել են տնտեսական աճը եւ տեխնոլոգիական առաջընթացը՝ իրենց իշխանությունը մեծացնելու համար:

«Ազատ առեւտրի համակարգը, ի վերջո, մեծացրել է ավտորիտար ռեժիմների օրինականությունը, ասել է նա,- Մեր ընդունած պատրանքը ի վերջո ուժեղացրել է հեգեմոն տերությունների սպառնալիքը»: Միաժամանակ, «ժամանակը հետ շրջելու» տարբերակ չկա, եւ տնտեսական ամբողջական տարանջատումն «անհնար է», նշել է նա։

Ճապոնացի նախարարն ազատ շուկայի երկրների միջեւ ավելի մեծ համակարգման կոչ է արել, ներառյալ արտահանման վերահսկումը, մատակարարման շղթայի կայունության բարձրացումը եւ էներգետիկ անվտանգությունը:

Նա նաեւ ասել է, որ հաշվի առնելով վեճերի լուծման մեխանիզմը՝ ԱՀԿ-ն այժմ փաստացիորեն կաթվածահար է, այն բանից հետո, երբ Թրամփի վարչակազմը կաթվածահար արեց բողոքարկման մարմինը 2019 թվականին՝ Ճապոնիան, ԱՄՆ-ը, Եվրոպան եւ այլ համախոհ գործընկերները պետք է «ջանասիրաբար աշխատեն ԱՀԿ բարեփոխումների վրա»: Սա կլինի «ամենամեծ խնդիրներից մեկը, որի վրա մենք պետք է աշխատենք այս տարի»,- ասել է նա: