Եվրախորհրդարանի կոռուպցիոն սկանդալը մռայլեցրել է Բորելի այցը Մարոկկո․ AFP

Չորեքշաբթի ԵՄ-ն հանդես է եկել իր դիվանագիտության ղեկավար Ժոզեպ Բորելի Մարոկկո կատարած այցի պաշտպանության օգտին։ Մարոկկոն Կատարի հետ կապված է Եվրախորհրդարանում ծավալվող կոռուպցիոն սկանդալի հետ, գրում է AFP-ն։

Քանի որ այս փուլում իրավախախտումների վերաբերյալ «ոչ մի ապացույց չկա», Եվրամիության արտաքին քաղաքականության ղեկավար Ժոզեպ Բորելի այցը հինգշաբթի եւ ուրբաթ պետք է տեղի ունենա, ասել է Բորելի ներկայացուցիչ Փիթեր Ստանոն:

«Ոչ ոք պաշտոնապես չի ասել, որ դատական ​​տեսանկյունից Մարոկկոն որպես երկիր մեղավոր է եւ միջազգային շփումներում Մարոկկոյից պետք է խուսափել»,- հավելել է նա։

Սկանդալը սկսվել էր անցյալ ամիս, երբ բելգիական ոստիկանությունը խուզարկություններ էր կատարել մի քանի հասցեներում, որոնք օգտագործվում էին Եվրախորհրդարանի որոշ օրենսդիրների եւ օգնականների, լոբբիստների եւ հասարակական կազմակերպությունների ղեկավարների կողմից:

Խուզարկությունների ընթացքում հայտնաբերվել է 1,5 միլիոն եվրո (1,6 միլիոն դոլար) կանխիկ գումար, որը, ենթադրաբար, վճարվել է Եվրախորհրդարանի որոշումների վրա ազդելու փորձերի շրջանակներում:

Չորս կասկածյալներ գտնվում են կալանքի տակ, այդ թվում՝ Եվրախորհրդարանում Հունաստանից պատգամավոր Եվա Կայլին։

Կայլին, ով ձերբակալվելուց հետո զրկվել էր խորհրդարանի 14 փոխնախագահներից մեկի պաշտոնից, շարունակում է պնդել իր անմեղությունը։

Իր փաստաբանի միջոցով նա հայտնել է, որ տեղյակ չէ Բելգիայի իր նստավայրում հայտնաբերված 150,000 եվրո կանխիկ գումարի մասին:

Հաղորդվում է, որ նրա իտալացի զուգընկեր Ֆրանչեսկո Ջորջին՝ պատգամավորի օգնականը, խոստովանություն է արել բելգիացի դատախազներին, որոնք նույնպես հաստատում են Մարոկկոյի մասնակցությունը:

Եվրախորհրդարանի պատգամավորները մտահոգություն են հայտնել Մարոկկոյի հնարավոր ներգրավվածության վերաբերյալ այն բանից հետո, երբ դեպքի մանրամասները հրապարակվել են բելգիական թերթերում:

Այս գործը ստվեր է գցել ԵՄ այլ կառույցների վրա եւ սեւեռել է լրատվամիջոցների ուշադրությունը ԵՄ հանձնակատարների եւ բարձրաստիճան պաշտոնյաների գործունեության վրա, որոնք վերջերս գործ են ունեցել Կատարի եւ Մարոկկոյի հետ:

Ստանոն հայտարարել է, որ գործը «գտնվում է բելգիական դատական մարմինների ձեռքում, եւ մենք լիովին վստահում ենք մեղադրանքների հետաքննությանն ուղղված նրանց աշխատանքին»:

Բելգիայում նախնական կալանքի տակ են գտնվում չորս կասկածյալներ՝ Կայլին, Ջորջին, իտալացի նախկին պատգամավոր Պիեր Անտոնիո Պանցերին եւ Նիկոլո Ֆիգա-Տալանկան՝ իտալացի ՀԿ-ի ղեկավարը, որը կասկածվում է Եվրախորհրդարանի պատգամավորներին վճարումներ կատարելու մեջ:

Չորսն էլ մեղադրվում են հանցավոր կազմակերպության, կոռուպցիայի եւ փողերի լվացման մեջ։

Հունաստանը եւ Իտալիան սկսել են իրենց սեփական հետաքննությունը ենթադրյալ կոռուպցիայի վերաբերյալ: