Եթե նույնիսկ առաջին դեմքերի քննարկումների պարագայում միջանցքը մնա փակ, կստացվի, որ սա ունի այլ նպատակներ. Քոչարյան

Ռուսաստանի կողմից մեզ ստիպելու մասին ուղիղ ես չեմ կարող ասել, բայց որ նպատակաների մեջ տեսանելի են, որ այդպիսի ցանկություններ շրջանառության մեջ գոյություն ունեն, կարող եմ ասել: Այս մասին այսօր` դեկտեմբերի 27-ին, Հանրային հեռուստաընկերությանը տված հարցազրույցում ասաց ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը` անդրադառնալով ԱԽ քարտուղար Արմեն Գրիգորյանի այն հայտարարությանը, որ ՌԴ-ն մեզ ստիպում է միութենական պետություն կազմել:

«Ճնշումների մասին միշտ կարելի է խոսել, դեռ 90-ականներն կար միութենական պետություն ստեղծելու ծրագիր, ստորագրություններ էին հավաքում, կոորդինացիոն խումբ էր ստեղծված, Հայաստան, Ռուսաստան Բելառուս այդպիսի միության մասին էր խոսքը եւ այդ գաղափարը եկել, հասել է մինչեւ մեր օրեր: Վերջին հաշվով այս ամենը բերում, կապում են մեր անվտանգային միջավայրի կայունության եւ կայունությունը պահելու հետ, որը խոսում է այն մասին, որ այստեղ ինչ-որ բան այն չէ նպատակների ու ցանկությունների տեսանկյունից»,-ասաց նա:

Քոչարյանի խոսքով` տարօրինակ է, որ մոտ 20 օր Արցախը Հայաստանին կապող միջանցքը շարունակում է փակ մնալ եւ ՌԴ զորամիավորումները պարտավոր են այդ խնդիրը լուծել, քանի որ խնդիրը չի կարող լուծում չունենալ. «Միջանցքը փակ, նշանակում է շրջափակման մեջ պահել մեր հայրենակիցներին, իսկ դա հղի է շատ վատ հետեւանքներով: Վերջին հաշվով դա կարող է բերել պայթյունավտանգ լարվածության, որը ձեռք չի տա ոչ մեկի: Եթե նույնիսկ երկրների առաջին դեմքերի քննարկումների պարագայում միջանցքը մնա փակ, կստացվի, որ սա ունի այլ նպատակներ, կդառնա իրականություն, այդ ժամանակ մեր երկիրը, մեր ինքնիշխան պետությունը, պետք է իր քաղաքական ներուժը այնպես կառավարի, որ հնարավորինս հեռու պահենք մեր ժողովրդին հնարավոր զարգացումների նման սցենարից, բայց դա չի նշանակում,որ մենք պետք է գնանք այնպիսի զիջումների, որպեսզի իրականացվի ոչ թե մեր պետութան նպատակները, այլ ուրիշ պետությունների նպատակը»,- ասաց նա:

Հարցին, թե ինչ է անում կառավարությունը, որ միջանցքը փակելը հետագայում չկիրառվի, Անդրանիկ Քոչարյանն ասաց, որ իրենք ամեն ինչ անում են, որ անվտանգային միջավայրը վերականգնվի:

«Մենք ստեղծել ենք Ներքին գործերի նախարարություն, ՀՀ-ն ստեղծում է արտաքին հետախուզություն, ՀՀ ԶՈՒ բարեփոխումների հետ կապված մենք ընդունել ենք 6 օրենքներ, որը տալիս է ամբողջությամ, նոր, պրոֆեսիոնալ բանակ ստանալու հնարավորություն: Տարածաշրջանում խախտվել է ռազմական բալանսը, որը պատճառ հանդիսացավ պատերազմի, թե 2016 թվականի ապրիլին, թե 2020 թվականին, այդ բալանսը պետք է վերականգնվի մեր եւ հակառակորդ պետության միջեւ»,-ասաց նա:

ԱԺ պաշտպանության և անվտանգության հարցերի մշտական հանձնաժողովի նախագահի կարծիքով` պետք է շարունակել Ադրբեջանի հետ երկխոսությունը, սակայն իրավիճակը կայունացնելուց հետո:

Նշենք, որ Հայաստանի Անվտանգության խորհրդի քարտուղար Արմեն Գրիգորյանն ասել էր, որ երկրի ռազմավարական դաշնակից Ռուսաստանը Հայաստանին ստիպում է իր ինքնիշխան տարածքով միջանցք տրամադրել Ադրբեջանին, ինչպես նաև միանալ միութենական պետությանը, հայտնել էր «Ազատությունը»։

Հանրային հեռուստաընկերության եթերում նա նշել է, որ սեպտեմբերի 13-ին Ադրբեջանի ներխուժումը Հայաստանի ինքնիշխան տարածք, ինչպես նաև Լաչինի միջանցքի փակումը տեղավորվում են Հայաստանի վրա Ռուսաստանի ճնշման շրջանակում։