Արտակարգ դեպք՝ Երևանում․ ոստիկանությունը պարզում է հանգամանքները
Երեկ՝ դեկտեմբերի 7-ին, արտակարգ դեպք է տեղի ունեցել Երևանում։ Ժամը 19։00-ի սահմաններում դեռևս անձը չպարզված քաղաքացու կողմից ահազանգ է ստացվել ՀՀ ոստիկանություն և Արտակարգ իրավիճակների նախարարության Փրկարար ծառայության 911 ճգնաժամային կառավարման կենտրոն, որով հայտնել են, որ Նորք Մարաշ 7-րդ փողոցում վթար է տեղի ունեցել և ավտոմեքենան այրվում է։
Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են ԱԻՆ ՓԾ Երևանի թիվ 8-րդ հրշեջ-փրկարարական ջոկատից 1 մարտական հաշվարկ։
Դեպքի վայրում տեղեկություններ էին տարածվել, որ թիվ 59 տան մոտ տեղի է ունեցել գողացված ավտոմեքենայի մասնակցությամբ ճանապարհատրանպորտային պատահար, հրդեհի բռնկմամբ։
Պարզվել է, որ Ford Transit մակնիշի ավտոմեքենան վարելիս է եղել 19-ամյա Արսեն Գևորգյանը, ով ավտոմեքենան կայանել է փողոցում և իջել, գնացել է ավտոլվացման կետ, պարզելու համար՝ երբ է հնարավոր ավտոմեքենան տեղափոխի «մոյկա», որտեղից հետ վերադառնալով, նկատել է, որ ավտոմեքենան իր կողմից կայանված վայրում չէ։
Ապա փնտրել և հայտնաբերել է, որ մեքենան վնասված վիճակում գտնվում է 7-րդ փողոցում։
Ford-ի բախման հետևանքով վնասվել է նաև նշված փողոցի թույլատրելի հատվածում կայանված 64-ամյա Հակոբ Գրիգորյանին պատկանող ГАЗ 24 մակնիշի ավտոմեքենան։
Տեղի ունեցածը ավտոմեքենայի առևանգո՞ւմ է, թե՞ Ford-ի վարորդի կողմից երթևեկության անվտանգության կանոնների չպահպանելը, պարզվում է։