Իսրայելցի կինը դատական հայց է ներկայացրել Երուսաղեմում իր վրա հարձակված ԱՄՆ Գաղտնի ծառայության գործակալի դեմ
Իսրայելցի կինը հայց է ներկայացրել ԱՄՆ Գաղտնի ծառայության գործակալի դեմ, որը հարձակվել է իր վրա Երուսաղեմում, որտեղ գտնվել է նախագահ Ջո Բայդենի այցը նախապատրաստելու համար։
Թամարա Բեն-Հաիմը հայց է ներկայացրել Կոլումբիայի շրջանի դաշնային դատարան Գաղտնի ծառայության անանուն գործակալի դեմ՝ կապված հուլիսի 12-ի հարձակման հետ, որը տեղի է ունեցել նրբանցքում, երբ նա տուն գնալիս է եղել գիշերը ժամը 1-ի սահմաններում:
30-ամյա դիզայներն ասում է, որ երբ ատրճանակով տղամարդը «սկսել է ծեծել իրեն եւ ապտակել», ինքը մտածել է, որ «դա իր վերջին րոպեներն են Երկրի վրա»:
Տղամարդը «ամուր բռնել է Թամարային, մի քանի անգամ հարվածել է նրա կրծքին եւ դեմքին, ինչի հետեւանքով նրա ականջօղն ու ականջակալն ընկել են գետնին»,- ասվում է դատական փաստաթղթերում։
Նա օգնություն է կանչել, բայց ոչ ոք չի արձագանքել, քանի դեռ հարձակվողին ուղեկցող տղամարդը հետ չի քաշել նրան։ Կինը «դրանից անմիջապես հետո» հարձակման մասին հայտնել է ոստիկանությանը, եւ ոստիկանությունը ձերբակալել է ենթադրյալ հարձակվողին, բայց ի վերջո ազատ է արձակել նրան ու հետ ուղարկել ԱՄՆ:
Ավելի ուշ նա իմացել է, որ այդ մարդը Գաղտնի ծառայության գործակալ է, որը եկել էր Բայդենի այցը նախապատրաստելու:
Բեն Հաիմը պնդում է, որ միջադեպը տրավմա է պատճառել իրեն եւ քնի հետ կապված խնդիրներ, ինչպես նաեւ անհանգստություն, դեպրեսիա եւ հոգնածություն առաջացրել: Կինը նաեւ պնդում է, որ այժմ պետք է պարբերաբար այցելի հոգեբանի եւ հոգեբույժի՝ տրավման հաղթահարելու համար։
Նրա փաստաբան Մարկ Զելն ասել է, որ Գաղտնի ծառայությունը պաշտպանում է կնոջ վրա հարձակվողին։ «Ամբաստանյալը, ինչպես նաեւ ամբաստանյալի գործատուն, փորձում են խուսափել արդարադատությունից՝ հրաժարվելով բացահայտել իր ինքնությունը»,- ասվում է հայցում։
Բեն Հաիմը հայտարարել է, որ տեղեկատվության ազատության մասին օրենքի համաձայն ինքը դիմել է, որպեսզի պարզի անձի ինքնությունը, ինչը Գաղտնի ծառայությունը մերժել է։
Հարձակումից անմիջապես հետո տված հարցազրույցում Բեն Հաիմը Fox News-ին ասել է, որ «խոշոր տղամարդը» հարվածել է իրեն «կրկին ու կրկին», ինչպես ըմբիշ։
Նրա խոսքով՝ ինքը ստիպված է եղել երեք օր պառկել անկողնում՝ չկարողանալով շարժվել ցավից։ Գործակալի մուտքը Գաղտնի ծառայության համակարգեր եւ օբյեկտներ կասեցվել է քանի դեռ հետաքննություն է ընթանում:
Երբ Բեն Հաիմը իմացել է, որ նա Գաղտնի ծառայությունից է, ասել է. «Ես պարզապես զայրույթ զգացի, ոչ թե ցավ: Նա փողոցի բոմժ չէ։ Նա մարզված մարտիկ է»: