Սկանդալ՝ Արմավիրի քոլեջներից մեկում․ տնօրենը հարվածում է դասախոսներին

Արմավիրի տարածաշրջանային քոլեջում կրքերը չեն հանդարտվում։ Ուսումնական հաստատության դասախոսներն, ուսանողներն ու նրանց ծնողներն այսօր բողոքի ակցիա են իրականացրել՝ փակելով Գյումրի-Արմավիր հանրապետական նշանակության ավտոճանապարհը՝ պահանջելով տնօրեն Անգին Արշակյանի հրաժարականը։

Ուսումնական հաստատությունում դեռեւս սեպտեմբերի 1-ից գործադուլ է։ Երկուշաբթի առավոտյան քոլեջում կրկին բունտ է հասունացել այն բանից հետո, երբ Անգին Արշակյանը 6 դասախոսի աշխատանքից ազատելու հրաման է տվել՝ անօրինական գործադուլ անելու հիմքով։ Վերջին օրերին իրավիճակն այնքան է լարվել, որ բանը հասել է «ձեռնամարտի»։ Հրապարակված տեսանյությում երեւում է, թե ինչպես է Անգին Արշակյանը ոստիկանների ներկայությամբ հարվածում դասախոսներին։

«Բազմիցս դիմել ենք նախարարություն՝ Արշակյանի հրաժարականի պահանջով, սակայն մեր ձայնը ոչ միայն լսելի չի դառնում, այլեւ անտեսվում է։ Արշակյանի հրաժարականի պահանջը ձեւվորվել է նրա անօրեն գործողությունների, քոլեջում բարոյահոգեբանական վիճակը պղտորելու, ճնշումների, դասախոսներին եւ ուսանողներին շահագործելու պատճառով։ Քոլեջը վերածել էր մեծ բոստանի, դասախոսներին եւ ուսանողներին դասերի ժամին տանում էր քաղհան անելու։ Անգին Արշակյանի նկատմամբ մի քանի քրեական գործեր կան հարուցված, որոնցից մեկը անօրինական ծառահատումների հիմքով»,- MediaHub-ի հետ զրույցում պատմում է քոլեջի տնտեսագիտական ամբիոնի վարիչ Թագուհի Հովակիմյանը՝ հավելելով՝ Արշակյանը յուրացրել է նաեւ արհմիության գումարները։

2021թ. նոյեմբերի 4-ին ԿԳՄՍ նախարարի տեղակալ Ժաննա Անդրեասյանը անձամբ է գնացել Արմավիրի տարածաշրջանային քոլեջ եւ ներկայացրել Անգին Արշակյանին, որպես քոլեջի ժամանակավոր պաշտոնակատար, քանի որ նախորդ տնօրենի պաշտոնավարման ժամկետը լրացել էր: Դասախոսները պնդում են՝ Արշակյանը, վայելելով ԿԳՄՍ փոխնախարար Ժաննա Անդրեասյանի հովանավորչությունը, քոլեջում իրականացնում է անօրինական գործողություններ։ Վերջինիս հրաժարականի պահանջով մի քանի անգամ ԿԳՄՍ-ի դռները թակած դասախոսները վստահեցնում են՝ ոչ միայն սայլը տեղից չի շարժվում, այլեւ ժամանակը աշխատում է Արշակյանի օգտին․ 6 դասախոսի աշխատանքից հեռացնելու հրաման է տվել։

«Քանի որ իրեն քոլեջ բերեց անձամբ Ժաննա Անդրեասյանը, ենթադրեցինք, որ խելքը գլխին մեկն է՝ սրտաբաց ընդունեցինք։ Հետո Անգին Արշակյանը սկսեց ցույց տալ իրական դեմքը, ասում էր՝ «իմ թիկունքին էնպիսի հզոր մարդիկ են կանգնած, որ մի գրչի հարվածով քոլեջը կփակեմ, եթե անգամ գնամ՝ շատ մարդ եմ հետեւիցս տանելու, քոլեջը քանդելու եմ»։ Հնարավոր չէ աշխատել այս կնոջ հետ, նա բանսարկու է, անձամբ ինձ գող է անվանում։ ԿԳՄՍ-ից մեզ հորդորում են՝ սպասել։ Ժաննա Անդրեասյանը ասում էր՝ համբերե՛ք։ Բայց որքա՞ն կարելի է սպասել, 5 տարի՞, երբ նրա սերտիֆիկատի ժամկետը կլրանա։ Մենք պահանջում ենք անհապաղ հեռացնել աշխատանքից։ Քոլեջում անհնար է դաս անցկացնել»,-ասաց քոլեջի դասախոսը։

«Հոկտեմբերյանի բոմժերը», «քոլեջը բարդակ է», «դուք ներառական եք», «մեռած հոգիներ եք», «քոլեջը գոմ ա»․ դասախոսներին եւ ուսանողներին այս խոսքերով է նախատում Անգին Արշակյանը, պատմում է Թագուհի Հովակիմյանն ու շեշտում՝ քոլեջի տնօրենը փորձում է ստորացնել իրենց։

Հռիփսիմե Հաբարձումյանն այն դասախոսն է, որին Անգին Արշակյանը հարվածներ է հասցրել բողոքի ակցիայի ժամանակ։ Դեպքից մանրամասներ է պատմում. «Ես իմ հեռախոսով նկարում էի, երբ նա ոստիկանների օգնությամբ փորձում էր մտնել քոլեջ: Ագրեսիվ շարժումներով մոտեցավ ինձ, ֆիզիկական ցավ պատճառելով փորձեց վերցնել հեռախոսս։ Եղունգս կոտրեց, ավելի ուշ տեսա, որ աչքս արյունով է լցվել»,-ասաց Համբարձումյանը՝ նշելով, որ հանցագործության մասին հաղորդում է ներկայացրել Ոստիկանություն։

Քոլեջի փոխտնօրեն Կարինե Հարությունյանը մեզ հետ զրույցում ասաց, որ ինքն էլ է այն դասախոսներից, որոնց ազատման հրաման է տվել քոլեջի տնօրենը։ Փոխտնօրենը պնդում է՝ գործադուլը անօրինական չէ։

«Գործադուլ անելու մասին տեղեկացրել ենք բոլոր պատկան մարմիններին, Արշակյանը չի բողոքարկել։ Հիմա որոշել է աշխատանքից ազատել դասախոսներին, այդ թվում նաեւ ինձ։ Ես պատշաճ չեմ ծանուցվել, նկատողություն չեմ ստացել անգամ։ Նախարարությունից ասում են՝ ձեր գործերով զբաղվում ենք, փորձաքննություն է գնում, մինչդեռ այդ ժամանակահատվածում աշխատաքից ազատման հրամաններ է տվել։ Այսինքն՝ ժամանակը աշխատել է Արշակյանի օգտին»,-շեշտեց քոլեջի փոխտնօրենը։

Դասադուլով Արմավիրի տարածաշրջանային քոլեջի ուսանողներն ու դասախոսները փորձում են պատկան մարմինների ուշադրությունը սեւեռել ամիսներ շարունակ բարձրաձայնված դժգոհությունների վրա: Քոլեջը գտնվում է՝ ԿԳՄՍ նախարարության ենթակայության տակ, այնտեղից հորդորում են ցանկացած պարագայում դասերը վերսկսել, վստահեցնում են՝ խնդրին տեղյակ են, լուծումներ են փնտրում։

Փորձեցինք պարզաբանում ստանալ նաեւ ԿԳՄՍ նախարարությունից, սակայն մամուլի խոսնակ Գեղամ Մելիքբեկյանը չպատասխանեց մեր հեռախոսազանգերին։

Մանրամասները՝ տեսանյութում