Ամերիկացի գիտնականները հերքել են կյանքի ծագման հիմնական տեսությունը
Պերդյուի համալսարանի քիմիկոսներն ապացուցել են, որ օրգանական միացություններն առաջանում են ոչ թե ջրում, այլ ջրի ու օդի սիմբիոզի արդյունքում։ Հետազոտողների աշխատանքը վերջերս հրապարակվել է PNAS ամսագրում:
Հետազոտողների թիմը պարզել է, որ միկրոկաթիլներում ամինաթթուները շատ ավելի արագ են վերածվում պեպտիդների, քան սովորական լուծույթներում, քանի որ դրանք չեն պահանջում կատալիզատորներ, բարդ օրգանական բաղադրիչներ, ճառագայթում կամ լրացուցիչ էլեկտրական լիցքաթափում:
Գիտնականների կարծիքով՝ ամինաթթուներից կարելի է ստանալ սպիտակուցներ, իսկ հետո առաջին կենդանի բջիջը, որն ունակ է ինքնավերարտադրման։ Նրանց կարծիքով, նախկինում պեպտիդների սինթեզի համար առավել բարենպաստ պայմաններ կարող էին առաջանալ, մասնավորապես, ծովի ալիքներից ձեւավորված մանրադիտակային կաթիլների մակերեսին, այսինքն, փաստորեն, ջրի եւ օդի բաժանարար սահմանին: Հենց այստեղ կարող էր առաջանալ յուրահատուկ միջավայր, որը թույլ է տվել հաղթահարել ջրի մեջ բիոմոլեկուլների խտացման եւ պոլիմերացման հետեւանքով առաջացած էներգետիկ խոչընդոտը։
Ինչպես պարզաբանել են գիտնականները, իրենց հայտնագործությունը կարող է օգտակար լինել ոչ միայն որպես տեսական հիմնավորում, այլեւ բավականին գործնական նպատակներով։ Օրինակ՝ բարդ օրգանական նյութերի սինթեզը եւ նոր դեղամիջոցների մշակումը արագացնելու համար։