Ինչո՞ւ է շատ ջուր խմելն օգտակար նիհարելու ժամանակ
Սննդաբան Եկատերինա Յաշչենկոն նշել է ջրի օգտագործման օգտակարության մասին, երբ փորձում եք ազատվել ավելորդ քաշից, գրել է «МедикФорум»-ը։
Մասնագետի խոսքով՝ առանց ջուր խմելու ռեժիմի եւ բալանսի պահպանման իմաստ չունի խոսել լավ ինքնազգացողության եւ ակտիվ երկարակեցության մասին։ Բայց, պարզվում է, որ ջրի օգնությամբ կարելի է նաեւ նիհարել։
«Ջուրն ավելացնում է կալորիաների ծախսը։ Բավական է խմել 500 միլիլիտր սովորական մաքուր ջուր (մոտ երկու բաժակ), եւ արդեն 10 րոպե հետո մետաբոլիզմի արագությունը կավելանա 30 տոկոսով, ընդ որում՝ էֆեկտը կտեւի մեկ ժամից ոչ պակաս»,- նշել է փորձագետը։
Եթե օրվա ընթացքում պարզապես առնվազն երկու լիտր ջուր խմեք, դա հավասարազոր է մոտ 100 կիլոկալորիա ծախսելուն։ Առանց ֆիզիկական ծանրաբեռնվածության։ Պարզապես ի հաշիվ ջրի օգտագործման։
100 կիլոկալորիայի ծախս կարելի է ստանալ լողավազանում 30 րոպեի ընթացքում հանգիստ լողալով կամ, օրինակ, ոտքով զբոսնելով։
Նիհարելու դեպքում փորձագետը խորհուրդ է տվել նախապատվությունը տալ սառը ջրին, այդ կերպ կալորիաներն ավելի շատ կծախսվեն։ Բացատրությունը բավական պարզ է եւ հասկանալի. օրգանիզմը կծախսի լրացուցիչ էներգիա ջուրը «տաքացնելու» համար եւ այդ կերպ կծախսի ավելորդ կալորիաները։
Ջրի օգտագործման եւս մեկ առավելություն. եթե ծարավը հագեցնում եք հենց ջրով, նշանակում է՝ դուք չեք բավարարում այն ուրիշ՝ ավելի կալորիական ըմպելիքներով (քաղցր գազավորված ըմպելիքով, հյութով եւ այլն)։ Այսինքն՝ օգտագործված կալորիաների ընդհանուր քանակությունը մեկ օրում ավելի քիչ կլինի։ Քաշը նվազեցնելիս սա կարեւոր է։
Բացի այդ, ջուրը կարող է զսպել ախորժակը։ Նկատի ունեցեք սա. ցանկանում եք ուտել՝ սկզբում ջուր խմեք, հետո արդեն սեղան նստեք։ Այդպես դուք, հաստատ, ավելի քիչ կուտեք։