Կարմիր խաչի միջազգային կոմիտեի ներկայացուցիչները Գեղարքունիքի մարզպետարանում քննարկել են սահմանամերձ բնակավայրերում նախատեսվող սոցիալ-տնտեսական ծրագրերը
Հունիսի 24-ին Գեղարքունիքի մարզպետն ընդունել է Կարմիր խաչի միջազգային կոմիտեի Իջևանի ենթապատվիրակության նախկին ղեկավար Էլիան Շահվանին, ում պաշտոնավարման ժամկետն արդեն լրացել է, ենթապատվիրակության նորանշանակ ղեկավար Լաուրա Դի Ֆրանչեսկանտոնիոյին, տարածքային ներկայացուցիչ Ավետիք Փաշայանին, տնտեսական անվտանգության մասնագետ Նինո Սաբաշվիլիին, Հայկական Կարմիր խաչի Գեղարքունիքի մարզի նախագահ Մակիչ Մնացականյանին։ Տեղեկացնում է Գեղարքունիքի մարզպետարանը։
Հանդիպման ընթացքում մարզպետը ներկայացրել է Ղարաբաղյան հակամարտության հետևանքով Գեղարքունիքի մարզում տուժած սահմանամերձ բնակավայրերի անվտանգային և հումանիտար իրավիճակը՝ հանգամանորեն անդրադառնալով նաև տեղի բնակիչների սոցիալական վիճակին, բնակավայրում առկա խնդիրներին և պետական աջակցությամբ նախատեսվող ծրագրերին։ Հույս է հայտնել, որ միջազգային կազմակերպությունները ևս իրենց նպաստը կունենան սահմանամերձ բնակավայրերում առկա խնդիրների բարելավմանը և բարոյահոգեբանական առողջ մթնոլորտի ձևավորմանը։
Կարմիր խաչի ներկայացուցիչները խոսել են Գեղարքունիքի մարզում և հատկապես սահմանամերձ բնակավայրերում Կարմիր խաչի միջազգային կոմիտեի կողմից սոցիալ-տնտեսական, կրթության հասանելիության ապահովման, առողջապահական ոլորտում իրականացվող ներդրումների, սանիտարահիգենիկ պայմանների բարելավման, բնակարանային պայմաններ բարեկարգման, ենթակառուցվածքների բարելավման և այլ ոլորտներին ուղղված ծրագրերի մասին, որոնց մի մասն արդեն իրականություն են դարձել։ Մարզի սահմանամերձ բնակավայրերում բնակչության սոցիալական կարիքների բարելավման նպատակով Կարմիր խաչը նախատեսել է իրականացնել մեղվաբուծության զարգացման և միկրոձեռնարկության աջակցության ծրագրեր՝ շահառուներին տրամադրելով համապատասխան գիտելիքներ և անհրաժեշտ սարքավորումներ՝ ծրագրի արդյունավետության բարձրացման համար։
Կազմակերպության կողմից ներկայացվող ծրագրերը մեծ կարևորություն և նշանակություն ունեն Գեղարքունիքի մարզի սահմանամերձ և հակամարտությունից տուժած բնակավայերի համար, և ես հույս ունեմ, որ մենք Կարմիր խաչի նոր ղեկավարի հետ ևս կշարունակենք նույն փոխգործակցությամբ աշխատել, որպեսզի հնարավորինս մեղմենք նշված բնակավայրերի տնտեսությունների սոցիալական ծանր վիճակը։ Կցանկանամ նաև, որ նման հանդիպումները հաճախակի լինեն, որպեսզի մենք կարողանանք համատեղել ՀՀ կառավարության աջակցությամբ և Կարմիր խաչի կողմից իրականացվող ծրագրերին ուղղված գաղափարները, տալով ավելի նպատակային և արդյունավետ լուծումներ,-նշել է Գեղարքունիքի մարզպետը։։
Կարմիր խաչի միջազգային կոմիտեի ներկայացուցիչները իրենց գոհունակությունն են հայտնել ՝ ծրագրերի ընդունման և իրականացման հարցերում առավել հստակ ուղղորդելու համար։
Կարեն Սարգսյանը շնորհակալություն է հայտնել Կարմիր խաչի միջազգային կոմիտեի Իջևանի ենթապատվիրակության նախկին ղեկավար Էլիան Շահվանին՝ արդյունավետ և համագործակցված աշխատանքի համար, միաժամանակ վստահ լինելով, որ փոխհամագործակցությունը բարձր մակարդակով կընթանա նաև նոր ղեկավարի հետ։