Քննչական կոմիտեի նախագահ Արգիշտի Քյարամյանն այդ հանդիպմանը զոհվածների ծնողներին ահաբեկել է, ոչ ադեկվատ վարքագիծ է դրսևորել, ասել է՝ անձամբ կհետևեմ, որ դատվեք
Քննչական կոմիտեի նախագահ Արգիշտի Քյարամյանն այդ հանդիպմանը զոհվածների ծնողներին ահաբեկել է, ոչ ադեկվատ վարքագիծ է դրսևորել, ասել է՝ անձամբ կհետևեմ, որ դատվեք։ Այս մասին այսօր՝ հունիսի 22-ին, ՔԿ-ի բակում լրագրողների հետ զրույցում ասաց 44-օրյա պատերազմում զոհված զինծառայող Մխիթար Գալեյանի հայրը՝ Գարիկ Գալեյանը։
Նշենք, որ 44-օրյա պատերազմում զոհված զինծառայող Մխիթար Գալեյանի հորեղբայրը՝ Արթուր Գալեյանը հրավիրվել է Քննչական կոմիտե՝ քննչական գործողությունների։ Զոհված զինծառայողների հարազատներն ի աջակցություն Գալեյանի՝ հավաքվել են Քննչական կոմիտեի բակում։
«Եթե 30 ծնող սուտ են ասում, ինչի մասին է խոսքը։ Եթե Արգիշտի Քյարամյանը կարող է առանց վատ զգալու հերքի ծնողներին, որոնց շնորհիվ ինքն ու իր ընտանիքը գոյություն ունեն։ Դու ծնողներին հրավիրել ես քո աշխատասենյակ, որ նախապես ահաբեկե՞ս»,- ասաց Մխիթար Գալեյանի հայրը՝ անդրադառնալով զոհվածների ծնողների եւ ՔԿ նախագահի հետ մայիսի 20-ին տեղի ունեցած հանդիպմանը։
Զոհված զինծառայողի հայրը պատմեց, որ Քյարամյանն իրենց նկատմամբ անհարգալից վերաբերմունք է ցուցաբերել. «Վիճաբանությունից հետո մենք թողել ու դուրս ենք եկել, որովհետեւ էլ պետք չէր իր խոսել կամ մի բան ասել։ Կանչել է ռազբորկայի, բայց չեմ ուզում շատ բան ասեմ։ Ասել ենք՝ 1 տարի 9 ամիս է դու քո երեխային ես սիրում, ես սառը քար եմ պաչում»։
Անդրադառնալով ԲԴԽ նախագահի պարտականությունները կատարող Գագիկ Ջհանգիրյանի աղմակահարույց ձայնագրությանը՝ Գարիկ Գալեյանն ասաց, որ դատական համակարգից արդադատություն չեն սպասում. «Ո՞նց կարելի է այդ ձայնագրությունից հետո սպասել որ դատական համակարգի արդարդատությանը։ Ինչի որեւիցե մի համակարգ աշխատո՞ւմ է։ Իրենք մեկնաբանում են, որ անաչառ քննություն են իրականացնելու ու 1 տարի 7 ամիս է որեւէ քննչական գործողություն չեն արել, անգամ տուժողի իրավահաջորդ չենք եղել։ Գիտենք բոլորս էլ թե Գագիկ Ջհանգիրյանն ով է, Մատաղիսի տղերքի գործը պարզ դեմներս է։ Եթե կփորձեն այս գործերը ծածկադմփոց անել, ուրեմն բոլորն էլ թուրք են։ Իրենք արդեն մեր երեխեքի արյան հետ են խաղում»։