Երբ լսեցի Ջհանգիրյանի պարզաբանումները, իմ մոտ շատ հարցեր փարատվեցին. Բեքմեզյան

Քանի որ ձայնագրության մեջ ԲԴԽ նախագահի պարտականությունները կատարող Գագիկ Ջհանգիրյանի եւ ԲԴԽ նախագահ (լիազորությունները ժամանակավորապես կասեցված են) Ռուբեն Վարդազարյանի խոսակցության ձայնագրությունը մոնտաժված էր, ինչի մասին ասել է նաեւ Վարդազարյանը, ես իմ անունից նրան գրություն եմ ուղարկել, խնդրել եմ՝ տրամադրել ձայնագրության ամբողջական տարբերակը։ Այս մասին NEWS.am-ի հետ զրույցում ասաց ԲԴԽ գիտնական-անդամ Գրիգոր Բեքմեզյանը։

Բեքմեզյանի կարծիքով՝ մոնտաժված տարբերակով եզրակացություն անելը պրոֆեսիոնալ չէ.

«Ձայնագրության վերաբերյալ մենք քննարկում ենք ունեցել Ջհանգիրյանի հետ։ Ջհանգիրյանը մեզ տվել է որոշակի պարզաբանումներ, բայց չեմ կարող նշել՝ ինչ պարզաբանումներ, որովհետեւ հանդիպումը եղել է փակ։ Որոշվել է, որ Վարդազարյանի վերաբերյալ որոշումը հրապարակելուց հետո ինքը կտա նաեւ հարցազրույց եւ կպարզաբանի այդ թեման։ Երբ լսեցի պարոն Ջհանգիրյանի կողմից արված պարզաբանումները, իմ մոտ շատ հարցեր փարատվեցին, բայց նման եզրակացություն հատնելու համար ես պետք է ամբողջական ձայնագրությունը լսեմ»։

ԲԴԽ անդամը նշեց, որ կար շատ խիստ մոնտաժված խոսակցության ձայնագրություն. «Որովհետեւ երբ խոսակցությունն այլ հունով էր գնում, ես նկատում էի, որ Վարդազարյանը փոխում էր կամ անջատում։ Երբ մոտ մեկ տարի առաջ մենք քննում էինք Վարդազարյանի լիազորությունների կասեցման հարցը՝ ինչո՞ւ այդ ժամանակ խորհրդին չի ներկայացվել այդ ձայնագրությունը, որպեսզի դա լսեր խորհուրդը եւ հասկանար՝ ինչ է կատարվել»։

Հիշեցնենք, որ ԲԴԽ նախագահ Ռուբեն Վարդազարյանը հունիսի 20-ին ասուլիսում հայտարարել էր, թե ապացույց ունի, որ իր դեմ կատարվող բոլոր գործողությունները քաղաքական որոշման արդյունք են։ Որպես ապացույց նա հրապարակել էր իր, ԲԴԽ նախագահի պարտականությունները կատարող Գագիկ Ջհանգիրյանի ու ԲԴԽ անդամ Ստեփան Միքայելյանի մասնակցությամբ զրույցի ձայնագրությունը։