Ինչպես է Ապարանի տարածքում հնչած կրակոցներից վիրավորված քաղաքացիների առողջական վիճակը

Ապարան համայնքի տարածքում երկու օր առաջ տեղի ունեցած կրակոցներից հետո «Արմենիա» բժշկական կենտրոնում հոսպիտալացված երկու քաղաքացիներից մեկի վիճակը շարունակում է մնալ ծայրահեղ ծանր, իսկ մյուսի առողջական վիճակը գնահատվում է կայուն ծանր։ Այս մասին NEWS.am-ի հետ զրույցում ասել է հիվանդանոցի գլխավոր տնօրենի վիրաբուժության գծով տեղակալ Աշոտ Կուրղինյանը:

«Քաղաքացին, որը գլխուղեղի վնասվածք ուներ, նույն վիճակին է՝ ծայրահեղ ծանր, բայց կայուն։ Երկրորդ քաղաքացու առողջական վիճակը կայուն ծանր է, նա կրծքավանդակի շրջանում էր վնասվածք ստացել։ Դեր վերակենդանացման բաժանմունքում է, գիտակցության է եկել, արհեստական շնչառության ապարատից անջատվել է»,– ասաց Աշոտ Կուրղինյանը:

Կրակոցների հետեւանքով «Աստղիկ» բժշկական կենտրոնում հոսպիտալացված 18–ամյա երիտասարդի առողջական վիճակը նույնպես կայուն ծանր է, նա վերակենդանացման բաժանմունքում է։

«Քաղաքացին գիտակից է, նրա կյանքին վտանգ չի սպառնում»,– NEWS.am-ին փոխանցեցին «Աստղիկ» ԲԿ–ից։

Հիշեցնենք, որ հունիսի 19–ին, Ապարանից Նիգավան գնացող ճանապարհահատվածում սպանություն էր տեղի ունեցել։

Տարբեր աստիճանի մարմնական վնասվածքներով «Ապարան» բժշկական կենտրոն էր տեղափոխվել 7 քաղաքացի: Վիրավորներից մեկը գիտակցության չգալով, մահացել էր, իսկ 6 հոգի տեղափոխվել էին Երեւանի բժշկական կենտրոններ: Ժամեր անց, սակայն, մահացել էր եւս մեկ քաղաքացի։

Հարուցված քրեական գործով 32-ամյա տղամարդ է ձերբակալվել՝ Երեւանի բնակիչ: Ըստ պաշտոնական տեղեկության, նա՝ եղբոր հետ շաբաթ օրը երեկոյան 22:30-ի սահմանում Ապարան քաղաքում, ավտոմեքենան վարելու ընթացքում ձայնային ազդանշան է տվել «Infinity» մակնիշի ավտոմեքենային, շրջանցել մեքենան ու կանգնեցրել այն, ապա մոտեցել են վարորդին, վիճել նրա հետ: Միջամտել են Ապարան քաղաքի մի խումբ բնակիչներ: Վիճաբանությունը շարունակելու նպատակով հաջորդ օրը 32-ամյա տղամարդը եղբոր եւ մի քանի անձանց հետ, նորից գնացել են Ապարան, որտեղ գտնվող գազալցակայանի տարածքում հանդիպել են նախօրդ օրը իրենց վեճին միջամտած անձանցից մեկին եւ ծեծի ենթարկել նրան:

Ավելի ուշ՝ երեկոյան, վիճաբանությունը շարունակվել է Նիգավան գյուղի աղբանոցի հարակից տարածքում՝ որի ընթացքում էլ 32-ամյա տղամարդը իր մոտ եղած հրացանից կրակոցներ է արձակել իրենց հետ վիճող անձանց ուղղությամբ: Հրազենային վնասվածքներով Ապարանի բուժկենտրոն տեղափոխված Ապարան քաղաքի երկու բնակիչները մահացել են, իսկ հինգ անձ տեղափոխվել են Երեւանի բժշկական կենտրոններ: 32-ամյա տղամարդը ձերբակալվել է: Քննչական կոմիտեից հայտնում են, որ ձեռնարկվում են միջոցառումներ՝ դեպքի բոլոր մասնակիցներին հայտնաբերելու եւ հանգամանքները պարզելու ուղղությամբ:

Ո՛չ Քննչական մարմինը, ո՛չ էլ ոստիկանությունը ձերբակալվածի անունը չեն հրապարակում։ Լրատվամիջոցների տեղեկություններով՝ նրանք եղել են Քաղաքացիական Պայմանագիր խմբակցության պատգամավոր Մաթեւոս Ասատրյանի հարազատները եւ Արագածոտնի ՔՊ-ական փոխմարզպետ Էդգար Փարվանյանի հորեղբոր որդին, իսկ վիճաբանությունը սկսվել է նրանից, որ Ապարանցի երիտասարդները հայհոյել են Նիկոլ Փաշինյանին: Ընդ որում կան տեղեկություններ, որ նրանք կրակել են ոչ թե որսորդական հրացանից, ինպես պնդում է ոստիկանությունը, այլ Կալաշինիկով տիպի ինքնաձիգից: «Քաղաքացիական պայմանագիր» խմբակցության պատգամավոր Մաթեւոս Ասատրյանը ֆեյսբուքի իր էջում հերքել է իր եւ իր ընտանիքի անդամների մասնակցությունը միջադեպին։ Այս տեղեկությունները կեղծ է որակել նաեւ փոխմարզպետ Էդգար Փարվանյանը։

Մահացած եւ տուժած բոլոր 7 քաղաքացիներն էլ Ապարանից էին։ Մահացած տղաները՝ 27–ամյա Համիկ Միքայելյանն ու Տիգրան Հարությունյանն էին։ Երկուսն էլ ամուսնացած չէին։ Համիկն աշխատում էր ՊՆ զորամասերից մեկում։ Մյուս մահացածը՝ 27-ամյա Տիգրան Հարությունյանը աշխատում էր Ապարանի «Գնթունիք» սննդի կենտրոնում: Նա Ապարանի համայնքապետ Կարեն Եղիազարյանի բարեկամն է:

Ապարանցիները NEWS.am-ի հետ զրույցում ասել են, որ ծայրահեղ ծանր վիճակում գտնվողը Սամվել Սանդրոյանն է։

18–ամյա Հրաչյա Երեմյանը եւ Տիգրան Ղազարյանը, որոնք դասընկերներ են, նույնպես այդ միջադեպի հետեւանքով վիրավորվել են եւ գտնվում են հիվանդանոցում։ Հրաչյան, ըստ ապարանցիների՝ երկու օրից պետք է զորակոչվեր բանակ, իսկ Տիգրանը երկկողմանի ծնողազուրկ լինելու պատճառով ազատված է բանակից։ Նրան խնամում է տատը։

Մյուս երկու վիրավորները նույնպես Ապարան քաղաքի բնակիչներ են, ըստ լրատվամիջոցների հրապարակումների՝ նրանց 32–ամյա Սասուն Հայրապետյանն ու 33–ամյա Արմեն Բաղդասարյանն են։ Ինչ վերաբերում է կրակող կողմին, ապարանցիները լսել են, որ նրանք Ձորագլուխ բնակավայրից են։