Ինչո՞ւ է իշխանությունը ցանկանում գլխավոր դատախազի պաշտոնին տեսնել Փաշինյանի օգնականին. տեսակետներ. Armdaily
Երեկ հայտնի դարձավ, որ ԱԺ «Քաղաքացիական պայմանագիր» խմբակցության գլխավոր դատախազի թեկնածուն Աննա Վարդապետյանն է։ Նա ներկայում զբաղեցնում է վարչապետի օգնականի պաշտոնը:
Աննա Վարդապետյանի թեկնածության վերաբերյալ ArmDaily.am-ը զրուցեց «Սիրունյան» փաստաբանական գրասենյակի ղեկավար, նախկին դատախազ Ալեքսանդր Սիրունյանի, նախկին դատախազ, փաստաբան Րաֆֆի Ասլանյանի, «Կոնցեռն Դիալոգ» փաստաբանական գրասենյակի կառավարիչ գործընկեր, փաստաբան Արամ Օրբելյանի և «Հայաստան» խմբակցության պատգամավոր Գեղամ Նազարյանի հետ։
Ալեքսանդր Սիրունյանի խոսքով՝ Աննա Վարդապետյանը լիովին համապատասխանում է առաջադրված պաշտոնին։
«Արտակարգ թեկնածու է։ Ինչ վերաբերում է այն քննադատություններին, որ Վարդապետյանը չունի գիտական աստիճան նշեմ, որ ինչպես Գևորգ Կոստանյանը, այնպես էլ Աննա Վարդապետյանն իրավաբանական գիտությունների թեկանածու են, իսկ, օրինակ ,Աղվան Հովսեփյանն առհասարակ գիտական աստիճան չի ունեցել, ու այն ձեռք է բերել միայն դատախազ նշանակվելուց հետո։ Նույնը կարող եմ ասել Արամ Թամազյանի վերաբերյալ, չնայած Թամազյանը հրաշալի մասնագետ է, սակայն նա գլխավոր դատախազ նշանակվելուց հետո է ստացել գիտական աստիճան»,-նշեց Սիրունյանը։
Նախկին դատախազի կարծիքով՝ Վարդապետյանն ունի շատ կարևոր առավելություն, և այդ առավելությունն ուներ նաև Գևորգ Կոստանյանը, մինչև գլխավոր դատախազ լինելը նրանք երբեք չեն եղել դատախազ, այսինքն՝ դատախազական համակարգից դուրս են գործունեություն ծավալել։
«Գլխավոր դատախազը չպետք է համակարգի ներսից լինի, որպեսզի ապուշության միկրոբով հիվանդ չլինի։ Ես 17 տարվա դատախազ եմ, ուստի վստահաբար կարող եմ ասել, որ համակարգից դուրս մարդիկ հաջողում են։ Այս առավելությունն ունի և՛ Աննա Վարդապետյանը, և՛ ունեցել է Գևորգ Կոստանյանը, որն, ի դեպ, բավականին լավ է աշխատել, մինչև էս գեղացիք եկան ու ոտերի տակը չքանդեցին»,- ընդգծեց Սիրունյանը։
Ի տարբերություն Սիրունյանի՝ Արամ Օրբելյանը լրջագույն խնդիր է տեսնում Աննա Վարդապետյանի բարեվարքության մեջ։
«Ես Աննա Վարդապետյանի գիտական որակներին գնահատակններ տալ չեմ կարող, բայց ես լուրջ խնդիրներ եմ տեսնում նրա բարեվարքության մեջ։ Խոսքը վերաբերում է տխրահռչակ գործընթացին, երբ հրապարկվեցին Աննա Վարդապետյանի էլեկտրոնային հաղորդագրությունները, որոնցում երևում էր, որ ինքն առաջինը՝ մուտքի հնարավորություն էր ստացել անձանց բանկային գաղտնիք հանդիսացող տեղեկատվությանը, երկրորդը՝ շտկումներ էր արել դատաիրավական փաստաթղթերում, այն դեպքում, որ նա այդպիսի իրավասություն չուներ»,- ընդգծեց փաստաբանը։
Օրբելյանի խոսքով՝ վերոնշյալից զատ, մտահոգիչ է նաև այն փաստը, որ երբ այդ ամբողջը բացահայտվեց, Վարդապետյանը դրանում որևէ խնդիր չտեսավ, հրաժարական չտվեց ու շարունակեց իր գործունեությունը՝ համարելով, որ կարող է պետական պաշտոն զբաղեցնել։
«Պատճառաբանությունն ընդհանրապես համոզիչ ու իրավաչափ չէր,որ շատ ընկերներ ուներ ու երբեմն համապատասխան օգնություն էր ցույց տալիս։ Պատկերացրեք, որ գլխավոր դատախազը կարող է շատ ընկեր դատավորներ ունենալ, և դատավճիռներ գրելուց երբեմն օգնություն ցույց տա, դրանցում որոշակի փոփոխություններ անի և ուղարկի իր ընկեր դատավորներին՝ միաժամանակ դրանում խնդիր չտեսնի։ Իրականում դա ինքնին խնդիր է»,- նշեց Օրբելյանը։
Փաստաբանի ընդգծմամբ՝ վերջին 3-4 տարում ամենաշատ օգտագործված բառերից վեթինգն ու բարեվարքությունն էին, բայց օրինակ գլխավոր դատախազ է նշանակվում մի մարդ, ում վեթինգ անելու կարիք չկա, քանի որ ամեն ինչ առանց այն էլ արդեն պարզ է։ Օրբելյանը վստահ է՝ Վարդապետյանը նույն ոճով է շարունակելու աշխատել ու «օգնել» իր ընկերներին։
ԱԺ «Հայաստան» խմբակցության պատգամավոր Գեղամ Նազարյանն էլ իր հերթին շատ վատ է վերաբերում Աննա Վարդապետյանի թեկանածությանը, քանի որ, ըստ նրա, գլխավոր դատախազը պետք է լինի քաղաքական թիմերից հնարավորին չափ հեռու անձ։
«Եթե ինչ-որ մեկն ինչ-որ մեկի օգնականն է ու դառնում է գլխավոր դատախազ, նա իր կարգավիճակը չի փոխելու՝ շարունակելու է մնալ ինչ-որ մեկին օգնական։ Այդ նշանակումը հենց այդ նպատակն է հետապնդում»,- ընդգծեց Նազարյանը։
Գեղամ Նազարյանի խոսքով՝ դատախազությանը մոտ կանգնած աղբյուրներն ասում են, որ Աննա Վարդապետյանը դատախազական համակարգից բան չի հասկանում և շատ արագ այն ևս կազմաքանդելու է։
«Վարդապետյանի ղեկավարն իրեն նշանակում է գլխավոր դատախազի պաշտոնում, որպեսզի այդ համակարգը կազմաքանդի, իսկ այդ ամենն այս վարչախմբի՝ Հայաստանը կազմաքանդելու ծրագրերի մի մասն է։ Իրենց պատկերացմամբ Հայաստնում որևէ կայացած համակարգ չպետք է լինի»,- նշեց Նազարյանը։
Հարցին՝ արդյոք «Հայաստան» խմբակցությունը գլխավոր դատախազի թեկնածուի հետ հանդիպելու որոշում ունի՞, թե՞ ՝ոչ պատգամավոր պատասխանեց. «Խմբակցության ներսում հնարավոր հանդիպման վերաբերյալ դեռևս քննարկում չի եղել, ուստի որոշում էլ չկա։ Սակայն, իմ կարծիքով, ՔՊ-ի թեկնածուի հետ հանդիպելն իմաստ չունի»։
Նախկին դատախազ Րաֆֆի Ասլանյանի պնդմամբ էլ՝ գլխավոր դատախազի փոփոխությունը որևէ մեկի մոտ չպետք է այն մտայնությունն առաջացնի, որ մենք կունենանք օբյեկտիվ քննություն, պատերազմի հանգամանքների վերհանում և այլն։ Դրանք չեն լինելու գլխավոր դատախազի փոփոխությամբ, քանի որ դրա համար անհրաժեշտ է միայն իշխանափոխություն։
«Ես այս ամենը չեմ դիտարկում մասնագիտական դաշտում, քանի որ նախկին դատախազն այնպես չէ, որ եղել է իրավունքի ռահվիրա, բացարձակ արդարադատություն է իրականացրել այս երկրում, որ նոր եկողն էլ չի կարող անել։Գլխավոր դատախազի ցենզն աստիճանաբար այնքան է իջեցվել, որ ներկայումս ինձ արդեն այդքան էլ չի հետաքրքրում, թե ով է գլխավոր դատախազը։ Եթե ուզում ենք երկրում ունենալ օրենքի, իրավունքի գերակայություն, ունենալ պատերազմների հանգամանքների վերհանում, պատշաճ նախաքննություն, ապա պետք է լինի իշխանափոխություն, այլ ոչ թե գլխավոր դատախազի փոփոխություն»- ամփոփեց Ասլանյանը։
Աղբյուրը՝ Armdaily.am