Եվրահանձնաժողովը խորհուրդ է տալիս ԵՄ անդամի թեկնածուի կարգավիճակ տրամադրել . Եվրահանձնաժողովը խորհուրդ չի տալիս Վրաստանը ԵՄ անդամության թեկնածու ճանաչել

Եվրահանձնաժողովը խորհուրդ է տալիս ԵՄ անդամի թեկնածուի կարգավիճակ տրամադրել Ուկրաինային, ինչը պարտադիր ֆորմալ քայլ է նախքան հարցը Եվրոպական խորհրդի մակարդակով դիտարկելը։

Այս եզրակացությունը կամ «Եվրահանձնաժողովի պաշտոնական կարծիքը» այսօր Եվրահանձնաժողովի կոլեգիայի նիստին հաջորդած մամուլի ասուլիսի ժամանակ հայտնել է նախագահ Ուրսուլա ֆոն դեր Լյայենը։

Եվրահանձնաժողովի կարծիքը ձեւավորվել է ԵՄ-ին անդամակցելու Ուկրաինայի հայտի եւ երկու հարցաշարերի վերլուծության հիման վրա, որոնցով գնահատվել է զարգացած ժողովրդավարական հասարակության համար եւ Եվրոպական միության acquis communitaire (օրենսդրության) դրույթներին համապատասխանության, այսպես կոչված, Կոպենհագենյան չափանիշները կատարելու Ուկրաինայի պատրաստականությունը։

Եվրահանձնաժողովն այսօր քննարկել է ԵՄ անդամակցության Ուկրաինայի, Մոլդովայի եւ Վրաստանի հայտերը։

Եվրոպական խորհուրդը հունիսի 23-24-ը կայանալիք նիստում կքննարկի Եվրամիության անդամակցության թեկնածուի կարգավիճակ ստանալու Ուկրաինայի հայտը։

Եվրահանձնաժողովը կարծում է, որ Վրաստանին կարող է ԵՄ թեկնածու երկրի կարգավիճակ տրվել, սակայն՝ մի շարք պայմանների կատարման դեպքում։ Այս մասին այսօր ճեպազրույցի ժամանակ հայտարարել է Եվրահանձնաժողովի ղեկավար Ուրսուլա ֆոն դեր Լյայենը:

«Երկիրը պետք է քաղաքականապես համախմբվի եւ բարեփոխումներ իրականացնի քաղաքացիական հասարակության ոլորտում։ Ելնելով դրանից՝ մենք Վրաստանին եվրոպական հեռանկարի վերաբերյալ հանձնարարական ենք տալիս եւ տեսնենք, թե ինչպես կիրագործվեն այդ հանձնարարականները, որպեսզի կրկին քննարկենք Վրաստանին կարգավիճակ տրամադրելու հարցը»,- ասել է նա։

Ուկրաինան եւ Մոլդովան Եվրահանձնաժողովն առաջարկում է ԵՄ անդամության թեկնածուներ ճանաչել՝ միաժամանակ նշելով, որ ապագայում նրանք պետք է մի շարք կարեւոր բարեփոխումներ իրականացնեն։

ԵՄ առաջնորդները Վրաստանին, Ուկրաինային եւ Մոլդովային թեկնածուի կարգավիճակ տրամադրելու կամ մերժելու վերաբերյալ վերջնական որոշումը կկայացնեն հունիսի 23-24-ը Բրյուսելում կայանալիք գագաթաժողովին: Կարգավիճակ տրամադրելու որոշմանը պետք է կողմ հանդես գան բոլոր 27 անդամ երկրները։