18 զինվորի մահվան գործով նիստերը պարբերաբար հետաձգվում են. գեներալի տեղակալ Մախսուդյանը դատարան չի ներկայացել

Երևանի ընդհանուր իրավասության դատարանի՝ Ավան եւ Նոր Նորք նստավայրում, նախագահությամբ դատավոր Դավիթ Հարությունյանի, 44-օրյա պատերազմին Իշխանաձորի խաչմերուկում զոհված 16 զինծառայողի եւ 2 սպաների դեպքի գործով դատական նիստերը պարբերաբար հետաձգվում են։ Այս մասին պատմել է զոհված զինծառայող Արտաշես Խալաթյանի հայրը՝ Հակոբ Խալաթյանը։

Զոհված զինծառայողի հայրն ասաց, որ դատարանն անցել է գործով վկաների հարցաքննությանը, սակայն վկաներից գեներալի տեղակալ Միհրան Մախսուդյանը դատարան չի ներկայացել եւ այդ մասին չի տեղեկացրել նաեւ դատավորին։

«Գործով վկաներից Իշխանաձորի գյուղապետը չկարողացավ գալ, որի մասին նախապես տեղեկացրել էր դատարանին, իսկ գեներալի տեղակալ Միհրան Մախսուդյանն անհարգելի պատճառով չէր ներկայացել։ Նա նույնիսկ զանգերին չպատասխանեց, ծանուցումը ստացել էր, սակայն չէր եկել։ Մոտ 15 րոպե տեւեց նիստը եւ որոշվեց եւս մեկ ծանուցում էլ ուղարկել Պաշտպանության նախարարություն։ Եթե հաջորդ նիստին էլ չկա, ապա նրան բերման ենթարկելու որոշում կկայացվի»,- ասաց նա։

Հարցին, իր կարծիքով, ինչո՞ւ են հետաձգվում այս գործով դատական նիստերը, Հակոբ Խալաթյանն ասաց. «Իրենք պատերազմից հետո բարձր պաշտոնների են նշանակվել։ Գուցե քաղաքական բնույթի է նրանց նշանակման որոշումը, այդ պատճառով էլ դատական նիստերը պարբերաբար հետաձգվում են»։

Հիշեցնենք, որ ըստ մեղադրական եզրակացության, փոխգնդապետ Վերանյանը 2020-ի հոկտեմբերի 9-ին ստացել է հրաման` զորամասի անձնակազմը Հորադիսի շրջանից տեղափոխել Տիլ գյուղ: Իշխանաձորում լսել են ԱԹՍ-ի ձայն, բայց փոխգնդապետը հրամայել է նստել ավտոմեքենան եւ շարունակել ճանապարհը: 5 րոպե անց ԱԹՍ-ն հարվածել է Ուրալին: Զոհվել է 18 զինծառայող, մեկը ստացել է մարմնական վնասվածքներ: Զինծառայողները մինչեւ պատերազմի սկսելը ծառայում էին Մեղրիի ու Ագարակի զորամասերում։ Պատերազմի սկսելուն պես տղաներին Արցախ են տարել։ Զինծառայողներից մեկի հայրն իմանալով, որ որդուն տեղափոխում են Արցախ, իր ավտոմեքենայով մեկնել է որդու մոտ։ Հայրն ականատես է եղել, թե ինչպես են որդին ու ծառայակիցները զոհվում։

Ի սկզբանե դատական նիստը պետք է տեղի ունենար Սյունիքի մարզի ընդհանուր իրավասության դատարանում, սակայն տուժողների իրավահաջորդներն դատարանին միջնորդել էին նիստերն անցկացնել Երեւանում, քանի որ դժվար է ամեն դատական նիստին ներկա լինելու համար հասնել Սյունիք:

Նշենք, որ Անդրանիկ Վերանյանը 2 ամսով կալանավորված է եղել, պահվել է «Վարդաշեն» քրեակատարողականում, այնուհետեւ նրա խափանման միջոցը փոփոխվել է եւ ստորագրությունը որպես խափանման միջոց ընտրվել։

Թեպետ Վերանյանը մեղադրանքը չի ընդունում, սակայն զինծառայողների հարազատները պնդում են՝ նա մեղավոր է եւ պետք է պատժվի օրենքի ամբողջ խստությամբ։ Ծնողները վստահ են՝ հենց նրա սխալ հրամանի պատճառով են 18 տղաները զոհվել հոկտեմբերի 9-ին՝ Իշխանաձորի խաչմերուկում։