Ինքս լինելով այդ հրմշտոցի մեջ, ամեն ինչ ֆիքսել եմ. Կոնկրետ նվաստացման տեսարաններ էին փորձում բեմադրել. Աննա Մկրտչյան
Ինքս լինելով այդ հրմշտոցի մեջ, ամեն ինչ ֆիքսել եմ՝ ոստիկանների դեմքերով, կարմիր բերատավոր կոչված վայրենիներով, որոնք մարդկանց խեղդամահ անելով, հրելով, գցելով, մեջքը հարվածելով ասֆալտին եւ քարերին: Այս մասին այսօր՝ մայիսի 30-ին, կառավարության 3-րդ մասնաշենքի մոտ «Դիմադրության» շարժման ակցիայի ժամանակ լրագրողների հետ զրույցում նշեց աժ «Պատիվ ունեմ» խմբակցության պատգամավոր Աննա Մկրտչյանը:
«Կոնկրետ նվաստացման տեսարաններ էին փորձում բեմադրել: Բավարարելու են միլիարդավոր պարգեւավճարներըւ, որոնք ստացել են: Սա մեկ նպատակ ունի՝ մեզ շեղելու մեր նպատակից, որ իր նախարարիկներին հարցնենք՝ դուք հայկական շա՞հն եք պաշտպանում, Ադրբեջանի կողմից Հայաստանին ներկայացվող պահանջներում արդյոք ինչ դիրքորոշում պետք է ունենաք դուք: Մենք այդ հարցի պատասխանն այսօր ստանալու ենք:
Ոստիկանները գնում են նախարարներից ճշտում են՝ արդյոք ուզում են պատգամավորների հետ հանդիպել, թե ոչ: ՀՀ որեւէ վարչական շենք պատգամավորի համար չի կարող նախնական թույլտվության անհրաժեշտություն պահանջել:
Այս բոլոր հիմնարկներն իշխանազավթված են: Այստեղ շատ քիչ թվով հայրենասեր մարդիկ են մնացել: Մնացած բոլորը Նիկոլի պարգեւավճարի ու թուրք-ադրբեջանական ստացած փողերից իրենց բաժինը պահանջողներ են, որոնք Հայաստանում տեղ չեն ունենալու»,-հայտարարեց նա:
Նշենք, որ «Դիմադրության» շարժման երթը հասել է Կառավարության 3-րդ մասնաշենք, որտեղ ընդդիմադիր երկու խմբակցությունների պատգամավորները ցանկացան մուտք գործել շենք: Փոխոստիկանապետ Կամո Ցոցուլյանն ասաց, որ կճշտի նախարարների հետ՝ արդյոք պատրաստ են ընդունել պատգամավորներին, որից հետո թույլ կտան ընդդիմադիր պատգամավորներին մուտք գործել շենք:
Որոշ ժամանակ անց իրավիճակը լարվեց, ցուցարարները սկսեցին հրել շղթա կազմած ոստիկաններին, վերջիններս կարողացան դիմադրել եւ թույլ չտվեցին ցուցարարները մուտք գործեն շենք: Ուժեղ հրմշտոց սկսեց, մի քանի քաղաքացիներ թեթեւ վնասվածքներ ստացան, ոստիկաններից մեկն ուշագնաց եղավ: Բացի այդ, ոստիկանները քարշտ տալով ու ձեռքերն ոլորելով հեռացրին պատգամավոր Գեղամ Մանուկյանին: Կարմիր բերետավորներն էլ բիրտ ուժի գործադրեցին պատգամավոր Արամ վարդեւանյանի նկատմամբ՝ ձեռքով սեղմելով պարանոցը:
Հիշեցնենք, որ ավելի վաղ ԱԺ փոխխոսնակ Իշխան Սաղաթելյանը ներկայացրել էր իրենց հայտարարության տեքստում ամրագրված պահանջները. «Յուրաքանչյուր պաշտոնյա հայտնի հստակ դիրքորոշում.
Հայաստանն աջակցելու է Արցախի ժողովրդի ինքնորոշման իրավունքի լիարժեք իրացմանը:
Արցախը երբեք չի լինելու Ադրբեջանի կազմում:
Հայաստանի Հանրապետության և Արցախի Հանրապետության միջև պետք է լինի հուսալի ցամաքային կապ․ Արցախն անկլավ չի լինելու:
Հայաստանի Հանրապետությունն Արցախի ժողովրդի անվտանգության և ինքնորոշման իրավունքի իրացման երաշխավորն է:
Սահմանագծման և սահմանազատման աշխատանքները պետք է իրականացվեն ՀՀ ինքնիշխան տարածքից Ադրբեջանի զորքերի դուրս բերման նախապայմանով:
Սահմանագծման և սահմանազատման աշխատանքների արդյունքում բացառվում է Հայաստանի Հանրապետության ամբողջականության խաթարումը:
Հայ-թուրքական հարաբերությունների կարգավորման գործընթացում բացառվում է որևէ համաձայնություն, որը հարցականի տակ կդնի Հայոց ցեղասպանությունը:
Ադրբեջանի և Թուրքիայի հետ ճանապարհների ապաշրջափակումը չի կարող տեղի ունենալ միջանցքային տրամաբանությամբ»: