Գործող իշխանությունն իր սիրելի ժողովրդի սխալներն ուղղեց ապօրինի քրեական հետապնդման միջոցով. Վարոսյան. ArmDaily.am

«Պիտի ՔՊ-ական լինես կամ նիկոլական, որ հակառակը պնդես փողով»,- ArmDaily.am-ի հետ զրույցում ասաց Վանաձորի համայնքապետի թեկնածու Մամիկոն Ասլանյանի պաշտպան Երվանդ Վարոսյանը։ «Մամիկոն Ասլանյանին առաջադրված մեղադրանքի մեջ որոշակի փոփոխություն եղել է, այսպես ասած, պայմանական թեթևացում։ Բայց դրանից խնդրի էությունը չի փոխվում, որովհետև պրն. Ասլանյանի մեղադրանքի բովանդակությունն ի սկզբանե հանցագործության հետ կապ ունեցող որևէ փաստական հանգամանք չի պարունակել։ Դրա պատճառն էլ, դե բնականաբար, ինչպես բոլորիս հայտնի է, այն պատճառներն ու նպատակներն են, թե ինչու քրեական հետապնդում սկսվեց Մամիկոն Ասլանյանի նկատմամբ, և ինչու նա կալանավորվեց, որը կապված էր Վանաձոր քաղաքի ընտրություններում նրա ղեկավարած դաշինքի հաղթանակի հետ։ Դա գործող իշխանությունների սրտով չէր, և գործող իշխանությունները իրենց սիրելի ժողովրդի սխալներն ուղղեցին ապօրինի քրեական հետապնդման միջոցով»,-ասաց Վարոսյանը։

Մեր հարցին, թե կարո՞ղ է արդյոք այս գործընթացը որակել քաղաքական, Ասլանյանի պաշտպանն ասաց՝ այլ կարծիք ինքը չի լսել և դա բոլորին է ակնհայտ։

Վարոսյանը տեղեկացրեց, որ հայտնել են նախաքննության ավարտի մասին և ցանկանում են գործն ուղարկել դատարան.«Հիմա գործը դատարան գնացել է, չի գնացել՝ դեռ պաշտոնական տեղեկություն չունենք»։

Հարցին՝ հույս ունե՞ն, որ դատական համակարգի միջոցով կկարողանան հասնել Ասլանյանի արդարացմանը, Վարոսյանն ասաց՝ ամեն ինչ կախված կլինի իրավիճակից և դատավորի անձից։ «Այն, որ մենք վաղ թե ուշ Եվրոպական դատարանում կջախջախենք այս խայտառակ գործը՝ դա ակնհայտ է։ Բայց ցանկալի կլիներ, որ Հայաստանի Հանրապետությունը մի քիչ ավելի պակաս տուժեր այս ապօրինության հետևանքով, և արդարությանը, այնուամենայնիվ, մեր պետական ատյաններում հնարավոր լիներ հասնել»,-եզրափակեց Վարոսյանը։