Առաջնորդն այս հրապարակում է ծնվելու. Արթուր Վանեցյան

«Մենք ունենք ծրագիր, որն իրագործելու ենք մինչև վերջ։ Մեր ծրագիրն է ունենալ հզոր, անվտանգ Հայաստան ու Արցախ, մեր մեծ հայրենիքում ապրող արժանապատիվ քաղաքացի։ Մենք դրա համար պատրաստ ենք անել ամեն ինչ ու անելու ենք»,- Ֆրանսիայի հրապարակում լրագրողների հետ զրույցում ասաց «Հայրենիք» կուսակցության նախագահ Արթուր Վանեցյանը։

Հարցին՝ ասում եք պայքարը վճռական փուլ է մտել, որևէ վճռական գործողություններ չենք տեսնում, ընդդիմադիր գործիչը պատասխանեց. «Վճռական գործողություն ասելով ի՞նչ եք պատկերացնում։ Վճռական գործողություն չէ՞ Ֆրանսիայի հրապարակը, Երևանի կենտրոնը փակ պահելը, վճռական գործողություն չէ՞ սուր քաղաքական ելույթները։ Վճռական գործողություններ չե՞ն օրեցօր մեր շարժմանը միացող մարդիկ, հանրության տարբեր շերտերի միացումը պայքարին։

Մենք փողոցային ավանտյուրիստներ չենք ի տարբերություն գործող իշխանությունների։ Մենք պետությունը և պետականությունը հասկացող և գնահատող մարդիկ ենք, մենք անելու ենք ամեն ինչ այնպես, որպեսզի երկրում ոչ արյուն լինի, ոչ բռնություն, մենք կարողանալու ենք մեր ժողովրդի աջակցությամբ հասնել այս իշխանության հեռացմանը»։

Ա. Վանեցյանն ասաց, որ ժողովուրդն է որոշելու, երբ պետք է փոխվի իշխանությունը․ «Ժողովուրդը հենց դուրս եկավ փողոց և իր վճռական խոսքն ասաց, որ պետք է այս իշխանությունները գնան, մենք այդ ամենը կարողանալու ենք փաթեթավորել, տանել առաջ։ Մենք լինելու ենք կանգնած առաջնագծում, առաջնորդելու ենք այս շարժումը, որևէ բան չենք խնայելու արդյունքի հասնելու համար»։

Իսկ եթե ժողովուրդը դուրս չգա փողոց, այդ սցենարը հաշվի առե՞լ եք հարցին ի պատասխան նա ասաց. «Իրականում իրավիճակ է փոխված երկրում և հատկապես Երևանում։ Երբ շրջում ենք Երևանի փողոցներով, սկսած կենտրոնից, ավարտած ծայրամասերով, մենք տեսնում ենք, որ գրեթե բոլորը 100 տոկոս քաղաքացիներ մեզ ողջունում են։ Մենք փակում ենք ճանապարհ, փակ է մնում 10, 30, 40 րոպե, բացում ենք, խցանման մեջ մնացած մեքենաները, մեր կարծիքով, որ պետք է դժգոհեն, ողջունում են մեզ, ասում են՝ լավ եք անում, ապրեք, ձեր հետ ենք։ Բայց ցավն այն է, որ այդ մարդիկ դուրս չեն գալիս փողոց, նստում են, խոսում են տներում, բակերում, աշխատասենյակներում»։

Վանեցյանը հիշեցրեց ավելի վաղ արտահայտած միտքը՝ քաղաքացիները չեն վստահում այս հարթակին, թող ձևավորեն այլընտրանքային հարթակ, թող ուրիշներն անեն, ոչ մեկ չի մոնոպոլիզացրել այս դաշտը, սա համազգային շարժում է, հայ ժողովրդի շարժումն է։

Հարցին, թե ինչո՞ւ չեն հայտարարում շարժման վարչապետի թեկնածուի անունը, որպեսզի մարդիկ իմանան, ում հետևից են գնում, նա պատասխանեց. «Այդ հարցը շատ են տալիս, բայց հարց է առաջանում՝ արդյո՞ք պետք է հայտարարենք, թե ով է լինելու վարչապետի թեկնածու, արդյո՞ք պետք է չհայտարարենք։ Չունեմ այդ հարցի պատասխանը։ Այդ հարցը պետք է քննարկենք։ Չենք քննարկել, պետք է քննարկենք, այդ հարցի պատասխանը պետք է ստանալ։ Այդ մտահոգությունն ու հարցը կա հանրության մի շրջանում։ Խոստանում եմ՝ այդ հարցը բարձրացնել շարժման առաջնորդների շրջանում և փորձենք հասկանալ»։

Վանեցյանը վստահեցրեց, որ շարժման առաջնորդներն այս հարթակում գտնվող մարդիկ են, այլ մարդիկ չկան, նշեց, որ իրենց շարքերում բաժանումներ, պառակտումներ չկան։

«Եթե դա է խնդիրը, հավատացեք, ամենահեշտ լուծվողն է, մեզանից որևէ մեկը չունի ամբիցիա լինելու միակ ու անփոխարինելի առաջնորդը։ Չկա նման մարդ։ Առաջնորդն այս հրապարակում է ծնվելու։ Եկեք չփնտրենք պատճառներ, թե ինչու չեն գալիս հրապարակ։ Դուրս եկեք հրապարակ, դուրս եկեք պայքարի, հաղթանակն անխուսափելի է լինելու»,- ասաց «Հայրենիք» կուսակցության նախագահ Արթուր Վանեցյանը։